1. Le Atua e,o lē ‘ou te vivi‘i atu i ai,‘aua ne‘i e lē tali mai.
2. Auā ‘ua fa‘amaga mai ‘iā te a‘u le gutu o lē amio leaga,ma le gutu o lē taupelopelo;‘ua latou fai ‘upu mai ‘iā te a‘u i le laulaufaiva pepelo.
3. ‘Ua latou si‘osi‘o ‘iā te a‘u ma ‘upu fa‘a‘ino‘ino,ma ‘ua latou tau fua mai le tau‘a ‘iā te a‘u.
4. ‘Ua fai a‘u mo latou fili e taui a‘i lo‘u alofa;a o a‘u nei, ‘ou te tatalo.
5. ‘Ua tu‘uina mai i latou ‘iā te a‘u o le leaga e taui a‘i le lelei,ma le ‘ino‘ino e taui ai lo‘u alofa.
6. “‘Ia e tofia sē ‘ua amio leaga e pule ‘iā te ia,ma sē ‘ua fai o ia ma fili e tu i lona itū taumatau.
7. ‘Ia fa‘asalaina o ia pe a fa‘amasinoina;‘ia fai fo‘i ma agasala lana tatalo.
8. ‘Ia fa‘aitiitia ona aso;‘ia ‘avea lona faiva mo se tasi.
9. ‘Ia ‘avea ana fānau e aumatuā,o lana avā fo‘i ia fai ma fafine ‘ua oti lana tane.
10. ‘Ia feoa‘i solo lana fānau, ma ‘aisi,ma ‘ia sā‘ili‘ili mea e ‘ai ‘iā latou mea ‘ua fa‘atafunaina.
11. ‘Ia maua ana mea uma lava e lē ‘ua ia ‘aitalafu i ai;‘ia faoa fo‘i e tagata ‘ese o mea ‘ua na galue ai.
12. ‘Aua ne‘i fa‘ao‘o atu e se tasi le alofa ‘iā te ia;‘aua fo‘i ne‘i agalelei atu se tasi i lana fānau ‘ua aumatuā.
13. ‘Ia lē au lona gafa;‘ia sōloi‘esea o latou igoa i le tupulaga amulī.
14. ‘Ia manatua le amio leaga a ona tamā i luma o le ALI‘I;‘aua ne‘i sōloia le agasala a lona tinā.
15. ‘Ia i ai pea lava i luma o le ALI‘I,‘ina ‘ia tineia e ia o latou fa‘amanatuga a‘i le lalolagi.
16. Auā e le‘i manatu ia e fai mea alofa,a ‘ua fa‘asauā i le tagata ‘ua puapuagātia ma le mativa,‘ina ‘ia fasiotia e ia lē ‘ua loto momomo.
17. Na loto o ia i le fetu‘u, ‘ia o‘o fo‘i ‘iā te ia;na lē fiafia fo‘i o ia i le fa‘amanuia,o lea ‘ia vāvā mamao ai ma ia.
18. Na pulupulu o ia i le fetu‘u e pei o se ‘ie pulupulu,‘ia o‘o fo‘i lea e pei o le vai i totonu ‘iā te ia,‘ia pei o le suāu‘u fo‘i i ona ivi.
19. ‘Ia ‘iā te ia e pei o le ‘ofu ‘ua ‘ofu ai o ia,ma le fusi ‘ua fusi ai o ia e lē aunoa.”
20. O le taui lava lea mai i le ALI‘I i ē fai a‘u mo latou fili,ma ē ‘ua fai ‘upu leaga ‘ia oti ai a‘u.
21. A o oe, le ATUA e, lo‘u Ali‘i,‘ia e agalelei mai ‘iā te a‘u ‘ona o lou suafa;auā e lelei lou alofa, ‘ia e lavea‘i mai ‘iā te a‘u.
22. Auā o a‘u ‘ua puapuagātia ma le mativa,‘ua manu‘a lo‘u loto i totonu ‘iā te a‘u.
23. ‘Ua ‘ou mavae atu pei o le ata ‘ua lafoia;‘ua lūlū‘eseina a‘u e pei o le sē akerise.
24. ‘Ua vaivai o‘u tulivae i le anapogi, ma ‘ua tino vale lava a‘u.
25. O a‘u nei fo‘i ‘ua fa‘alumaina a‘u e i latou;e va‘ai mai i latou ‘iā te a‘u ma lialia‘i o latou ulu.
26. Le ALI‘I e, lo‘u Atua, ‘ia e fesoasoani mai ‘iā te a‘u;‘ia e fa‘aola mai ‘iā te a‘u e tusa ma lou alofa;
27. ‘ina ‘ia iloa ai e i latou, o lou ‘a‘ao lava lenei;o oe, le ALI‘I e, na e faia lava.
28. O i latou, ‘ia fetu‘u mai pea i latou,a o oe, ‘ia e fa‘amanuia mai;‘ua latou tutū mai, a ‘ia mamā i latou,a ‘ia fiafia lava lau ‘au‘auna.
29. ‘Ia ‘o‘ofu i le māsiasi ē ‘ua fai a‘u mo latou fili,‘ia ufitia i latou i lo latou lava mā pei o le ‘ofu tele.
30. ‘Ou te matuā vivi‘i atu i le ALI‘I i lo‘u gutu,‘ou te fa‘ane‘ene‘e atu ‘iā te ia i totonu o le to‘atele.
31. Auā e tula‘i o ia i le lima taumatau o lē ‘ua puapuagātia,‘ina ‘ia fa‘aola ‘iā te ia i ē fa‘asala ‘iā te ia ‘ia oti.