1. Le ALI‘I e, lo‘u malosi,‘ou te alofa lava ‘iā te oe.
2. O le ALI‘I o lo‘u papa ia ma lo‘u ‘olo ma lo‘u fa‘aola;o lo‘u Atua, o lo‘u papa, ‘ou te fa‘atuatua ‘iā te ia;o lo‘u talitā ma le nifo o lo‘u olataga, o lo‘u ‘olo maualuga.
3. ‘Ou te vala‘au i le ALI‘I, e tatau ‘ona vi‘ia o ia;o lea e fa‘aolaina ai a‘u i ē ‘ua ita mai ‘iā te a‘u.
4. Na si‘osi‘omia a‘u i mailei e oti ai,na fa‘amata‘utia fo‘i a‘u i tāfega a ē ulavavale.
5. Na si‘omia a‘u i mailei a seoli;na ‘ou lumana‘i o matāsele a le oti.
6. ‘Ona ‘ou vala‘au atu ai lea i le ALI‘I i lo‘u puapuagā,ma ‘ou ‘alaga atu i lo‘u Atua;na fa‘afofoga mai o ia i lona malumalu i lo‘u leo,na o‘o atu ‘iā te ia la‘u ‘alaga i ona lava fofoga.
7. ‘Ona lūlūina ai lea ma mafui‘e le lalolagi;‘ua gatete fo‘i fa‘avae o mauga,‘ua lūlūina i latou, auā na to‘asā lava o ia.
8. ‘Ua alu a‘e le asu i ona pogaiisu;o le afi mai lona fofoga ‘ua ma‘ama‘ai lea;‘ua mū ai malala ola.
9. Na lolo‘u ifo e ia le lagi ma afio ifo;o le pogisā fo‘i sa i lalo o ona ‘a‘ao.
10. Na ti‘eti‘e ia i le kerupi, ma ‘ua lele;na lele ia i ‘apa‘au o le matagi.
11. Na faia e ia o le pouliuli ma mea e lilo ai o ia;o lona apitaga ‘ua si‘omia ai o ia, o le vai pouliuli,o ao uliuli o le lagi.
12. Na mavae ‘ese atu o ana ao‘ona o le pupula na i ona luma;o uato‘a ma malala ola o le afi.
13. Na faititili fo‘i le ALI‘I mai le lagi,na tulei ifo e le Silisili‘ese o lona si‘ufofoga;o uato‘a ma malala ola o le afi.
14. Na fana atu e ia ana ū fanafana,ma fa‘ata‘ape‘ape ‘iā te i latou;ma ana uila e tele, ‘ua tuli ai ‘iā te i latou.
15. ‘Ona iloa atu ai lea o ‘iliti vai,‘ua aliali mai o fa‘avae o le lalolagi i lau a‘oa‘iga,le ALI‘I e, o le mapugatama‘i o ou fofoga.
16. ‘Ua ia ‘a‘apa mai lona ‘a‘ao mai luga ma tago ‘iā te a‘u,‘ua ia fa‘aea ‘iā te a‘u a‘i vai e tele.
17. ‘Ua ia lavea‘i mai ‘iā te a‘u a‘i le tagata malosi na ita mai,ma ē na ‘ino‘ino ‘iā te a‘u;auā na sili lo latou malosi i lo‘u.
18. Na latou lumana‘i a‘u i le aso o lo‘u malaia;a o le ALI‘I, o ia na ‘ou fa‘alagolago i ai.
19. ‘Ua ia ‘aumaia a‘u i le mea lautele;‘ua ia lavea‘i ‘iā te a‘u,auā ‘ua finagalo alofa mai o ia ‘iā te a‘u.
20. ‘Ua tauia mai a‘u e le ALI‘I e tusa ma la‘u amiotonu;‘ua taui mai e ia ‘iā te a‘u e tusa ma o‘u lima mamā.
21. Auā ‘ua ‘ou tausia ala o le ALI‘I,ma a‘u lē lafoa‘i fa‘alēmata‘u i lo‘u Atua.
22. Auā ‘ua ‘ou lumana‘i pea ana fa‘amasinoga uma;na ‘ou lē tu‘u‘eseina fo‘i ana tulafono ‘iā te au.
23. Na ‘ou amiotonu i ona luma,na ‘ou tāofia a‘u ‘ina ne‘i ‘ou agasala.
24. O lenei, ‘ua tauia a‘u e le ALI‘I e tusa ma la‘u amiotonu,e tusa ma o‘u lima mamā i ona luma.
25. ‘E te amio alofa oe i lē ‘ua alofa;‘e te amiotonu oe i le tagata amiotonu.
26. ‘E te amio mamā oe i lē ‘ua amio mamā;‘e te fa‘api‘opi‘o fo‘i oe i lē ‘ua fa‘api‘opi‘o.
27. Auā o oe lava, ‘e te fa‘aolaina le nu‘u ‘ua tigāina;a o ē ‘ua mata fa‘asiasia, ‘e te fa‘amaualaloina i latou.
28. Auā fo‘i ‘e te tutu mai la‘u lamepa;e fa‘amalamalamaina lo‘u pouliuli e le ALI‘I lo‘u Atua.
29. Auā o oe na ‘ou sofa‘i ai le ‘au;o lo‘u Atua na ‘ou osopuna ai i le pā.
30. O le Atua, e sa‘o lava lona ala;‘ua se ario ‘ua te‘a ma le otaota afioga a le ALI‘I;o ia lava o le talitā o i latou uma o ē fa‘atuatua ‘iā te ia.
31. Auā o ai ‘ea le Atua, ‘ua na o le ALI‘I?O ai ‘ea le papa, ‘ua na o lo tatou Atua?
32. O le Atua lea o lo‘o fusia a‘u i le malosi,‘ua ia fa‘alaulelei fo‘i i lo‘u ala.
33. ‘Ua na faia o‘u vae ‘ia pei o vae o ‘aila;‘ua ia fa‘atūina lava a‘u i a‘u mea maualuga.
34. ‘Ua ia a‘oa‘o i o‘u lima e tau ai le tau‘a;‘ua lolo‘u ai e o‘u lima le ‘aufana ‘apamemea.
35. ‘Ua e foa‘iina fo‘i ‘iā te a‘u le talitā o le olataga mai ‘iā te oe;‘ua fa‘atumauina a‘u e lou ‘a‘ao taumatau;o lou agamalū ‘ua fa‘asilisiliina ai a‘u.
36. ‘Ua fa‘alauteleina e oe le mea ‘ou te savali ai,ne‘i mapeva o‘u vae.
37. Na ‘ou tuliloa i ē na fai a‘u mo latou fili ma ‘ou maua;na ‘ou fa‘aumatia i latou, ‘ona ‘ou fa‘ato‘ā fo‘i mai lea.
38. Na ‘ou fasia i latou, ‘ua latou lē mafaia ‘ona tutū i luga;na pa‘u‘ū i latou i lalo o o‘u vae.
39. ‘Ua e fusia a‘u i le malosi mo le tau‘a;‘ua e fa‘ato‘ilalo i ē na laga mai ‘iā te a‘u.
40. O oe ‘ua liutuaina mai ai ‘iā te a‘u o ē ‘ua fai a‘u mo latou fili;‘ua fano fo‘i ‘iā te a‘u o ē na ‘ino‘ino mai ‘iā te a‘u.
41. Na ‘alalaga i latou, a ‘ua leai sē fa‘aola,na ‘alalaga i latou i le ALI‘I,a ‘ua na lē tali atu ‘iā te i latou.
42. ‘Ona ‘ou nutinini‘i lea ‘iā te i latou,e pei o le efuefu ‘ona lelea i le matagi;na ‘ou sasa‘aina atu i latou e pei o le palapala i le ala.
43. Na e lavea‘i ‘iā te a‘u a‘i fefinaua‘iga ma le nu‘u;‘ua e tofia a‘u ‘ia ‘ou pule i nu‘u ‘ese;e ‘au‘auna mai ‘iā te a‘u le nu‘u na ‘ou lē iloa.
44. A latou lagona, ‘ona latou fa‘alogo ai lea ‘iā te a‘ue fa‘atagā vivi‘i mai ‘iā te a‘u tagata ‘ese.
45. E mavae atu tagata ‘ese;e tetemū i latou i mea ‘ua latou puipuia mo i latou.
46. O lo‘o soifua le ALI‘I, ‘ia fa‘afetaia fo‘i lo‘u papa;ma ‘ia vi‘ia le Atua o lo‘u fa‘aolataga.
47. O le Atua lea o lo‘o faia le taui ma sui mo a‘u;o lē ‘ua fa‘ato‘ilaloina fo‘i le nu‘u ‘iā te a‘u.
48. O lē ‘ua lavea‘iina a‘u i ē ‘ua ita mai ‘iā te a‘u;‘ua e fa‘asilisiliina fo‘i a‘u i ē na laga mai ‘iā te au;‘ua e lavea‘iina a‘u i le tagata fa‘asauā.
49. O le mea lava lea, le ALI‘I e,‘ou te vivi‘i atu ai ‘iā te oe i luma o nu‘u ‘ese;‘ou te pese atu fo‘i i lou suafa.
50. O lē ‘ua faia le olataga tele i lana tupu;e agalelei fo‘i o ia i lē na ia fa‘au‘uina,o Tavita lava lea, ‘atoa ma lana fānau e o‘o i le fa‘avavau.