1. ‘Aua ‘e te losilosi i tagata amio leaga; ‘aua fo‘i ‘e te fia to‘aga ‘iā i latou.
2. Auā ‘ua mafaufau o latou loto i le sauāga; ‘ua tautalatala o latou laugutu i mea e fa‘atigā ai.
3. ‘Ua atiina a‘e le fale i le poto; ‘ae fa‘amausalīina i le fa‘autauta;
4. o le poto fo‘i e tūtūmu ai afeafe i ‘oloa uma lava e tāua ma le matagofie.
5. O le tagata poto ‘ua malosi ia; ma le tagata atamai e tupu lona malosi;
6. auā o le filifili lelei ‘e te fai ai lou tau‘a; o le to‘atele fo‘i o faipule e saogalemū ai.
7. ‘Ua maualuga le poto i le vale; na te lē tautala lava i le faitoto‘a.
8. O lē ‘ua mafaufau e fai mea leaga, e ta‘ua o ia o le tagata fai togafiti leaga.
9. O le manatu o le vale o le agasala lea; e ‘inosia fo‘i e tagata lē ‘ua fa‘atauemu.
10. ‘Āfai ‘e te fa‘avaivai i le aso vale, ‘ua itiiti lava lou malosi.
11. ‘Ia e lavea‘i i ē ‘ua pu‘ea ‘ia oti, ma ē a o‘o ‘ina fasia.
12. ‘Āfai ‘e te fa‘apea, “Fa‘auta, matou te le‘i iloa lenei tagata;” o lē ‘ua fuatia loto, na te lē lagona ‘ea? o lē ‘ua tausia lou agaga, na te lē silafia ‘ea? na te lē taui atu ‘ea i le tagata e tusa ma lana galuega?
13. Lo‘u atali‘i e, ‘ia e ‘ai i le meli, auā e lelei; ‘atoa ma le meli sisina, e suamalie i lou gutu;
14. ‘ia e iloa, e fa‘apea fo‘i le poto i lou agaga; ‘āfai ‘ua e maua, ‘ona i ai lea o le i‘uga; e le i‘u vale fo‘i lou fa‘amoemoe.
15. Le tagata amio leaga e, ‘aua ‘e te lamalama i le mea e nofo ai le tagata amiotonu; ‘aua ‘e te fa‘atafunaina le mea e ta‘oto ai o ia.
16. Auā e atu fitu ‘ona pa‘ū lē amiotonu, ‘ae toetū o ia; a o ē amio leaga, e pa‘u‘ū i latou i le malaia.
17. A pa‘ū lē ‘ua ita ‘iā te oe, ‘aua ‘e te fiafia i ai; a tausuai fo‘i o ia, ‘aua le ‘oli‘oli ai lou loto;
18. ne‘i silafia e le ALI‘I, ‘ona leaga ai lea i ona luma; ma na fa‘aliliu mai lona to‘asā ai ‘iā te ia.
19. ‘Aua ‘e te fa‘ameo i ē ‘ua fai mea leaga; ‘aua fo‘i ‘e te losilosi i ē amio leaga.
20. Auā e le i‘u i se lelei lē ‘ua amio leaga; e tineia le lamepa a ē amio leaga.
21. Lo‘u atali‘i e, ‘ia e mata‘u i le ALI‘I ‘atoa ma le tupu; ‘aua ‘e te fefa‘auōa‘i ma ē feliuliua‘i.
22. Auā e fa‘afuase‘i ‘ona tula‘i mai o lo latou mala; o ai fo‘i sē na te iloa le malaia mai ‘iā te‘i lā‘ua uma?
23. E i ai fo‘i nei mea i ē popoto:O le fa‘ailogaina o tagata i le fa‘amasinoga e lē lelei lea.
24. O lē ‘ua fai atu i lē amio leaga, “O oe le amiotonu;”e fetu‘uina o ia e le nu‘u; e fa‘afanoina o ia e tagata.
25. A o ē ‘ua a‘oa‘i atu ‘iā te ia, latou te fiafia;e o‘o ‘iā i latou le fa‘amanuia e lelei ai.
26. E taufeasogi tagata uma ma lē ‘ua tali atu i ‘upu tonu.
27. ‘Ia sauniuni i fafo lau galuega, ma e teuteu ai i le vao;mulimuli ane, ‘ona e faia lea o lou fale.
28. ‘Aua ne‘i fai fua oe ma molimau i lē lua te tuā‘oi ‘ae leai se mafua‘aga;‘e te pepelo ‘ea i ou laugutu?
29. ‘Aua ne‘i e fa‘apea ane,“E pei ‘ona faia e le tagata ‘iā te a‘u, e fa‘apea lava ‘ona ‘ou faia ‘iā te ia;‘ou te taui atu ‘iā te ia e tusa ma lana mea ‘ua fai.”
30. Na ‘ou alu ane i le fanua o le tagata paiē;ma le tōvine o le tagata ‘ua leai se mafaufau;
31. fa‘auta fo‘i, ‘ua tutupu a‘e ‘ua so‘o lava i la‘au tuitui,‘ua ufitia uma lava i le vao ogoogo, ma lana pā ma‘a ‘ua solo.
32. ‘Ona ‘ou va‘ava‘ai lava lea ma ‘ou matuā mānatunatu;‘ua ‘ou iloa ma ‘ua a‘oa‘oina ai a‘u;
33. se‘i toe itiiti sina moe, toe itiiti se matamoe,toe itiiti se pi‘ilima e ta‘oto ai.
34. ‘Ae o‘o mai lou mativa e pei o le tagata faomea;ma lou lē tagolima pei o le tagata ‘ua sauni lana ‘au‘upega.