1. Lo‘u atali‘i e,‘aua ne‘i galo ‘iā te oe la‘u tulafono;a ‘ia tausia a‘u poloa‘iga i lou loto.
2. Auā e fa‘aopoopoina ai ‘iā te oe o aso e tele,ma tausaga ‘e te ola ai, ‘atoa ma le manuia.
3. ‘Aua ne‘i te‘a ma oe le alofa ma le fa‘amaoni,‘ia asoa ai i lou ua; ‘ia e tusi ai i le papa o lou loto;
4. ‘ona e maua ai lea o le alofa ma le manuia lelei i luma o le Atua, ‘atoa ma tagata.
5. ‘Ia e fa‘atuatua i le ALI‘I ma lou loto ‘atoa;‘ae ‘aua le fa‘alagolago i lou lava atamai.
6. ‘ia e manatua o ia i ou ala uma,‘ona fa‘atonuina ai lea e ia lava ou ala.
7. ‘Aua ‘e te fa‘afiapoto; ‘ia e mata‘u i le ALI‘I,‘ia ‘alo ‘ese i le leaga;
8. e fai lea ma mea e malosi ai lou pute ma mea e su ai ou ivi.
9. ‘ia e āva i le ALI‘I i lou ‘oa ma le fa‘apolopolo o au mea uma e tutupu;
10. ‘ona tūtūmu ai lea ou fale saito i le mau;e feosofi fo‘i au tu‘ugāuaina i le uaina fou.
11. Lo‘u atali‘i e,‘aua le fa‘atauva‘a ‘iā te oe le a‘oa‘iga a le ALI‘I;‘aua fo‘i ‘e te ‘ino‘ino pe a a‘oa‘iina oe e ia.
12. Auā o lē ‘ua alofagia e le ALI‘I,e a‘oa‘iina o ia e ia;e pei o le tamā ‘ona a‘oa‘iina o lona atali‘i ‘ua ia fiafia i ai.
13. ‘Amu‘ia le tagata na te maua le poto ma le tagata na te maua le mafaufau;
14. auā e sili ‘ona lelei o lona fa‘ataui lo le fa‘atau o le ario ma mea e maua ai e sili lea i le auro.
15. E sili ‘ona lelei o ia i penina ma au mea fa‘afiafia uma lava e lē tusa ma ia.
16. O lo‘o i lona lima taumatau le ola tulu‘i;a o i lona lima tauagavale le ‘oloa ma le vi‘iga.
17. O ona ala o ala matagofie; ma ona magāala uma o i ai le manuia.
18. O ia o le la‘au o le ola i ē tago atu ‘iā te ia;‘amu‘ia fo‘i i latou o ē tāofi atu ‘iā te ia.
19. O le poto na fa‘avaeina ai e le ALI‘I le lalolagi;‘ua fa‘atumauina le lagi i le mafaufau.
20. O lona poto ‘ua vaeluaina ai moana;o ao fo‘i ‘ua to‘ulu ai le sau.
21. Lo‘u atali‘i e,‘aua ne‘i te‘a ‘ese nei mea i ou luma;‘ia e tāofi mau i le poto ma le mafaufau;
22. e fai ia mea ma ola o lou agaga ma mea matagofie i lou ua.
23. ‘Ona e savali ai lea ma le saogalemū i lou ala;e le tu‘ia fo‘i lou vae;
24. a e ta‘oto ‘e te lē fefe; ‘e te ta‘oto lava, e malie fo‘i au moe.
25. ‘Aua ‘e te mata‘u i le fefe fa‘afuase‘ima le malaia o ē amio leaga pe a o‘o mai.
26. Auā o le ALI‘I, e fai o ia mou fa‘atuatuaga;na te leoleo fo‘i i lou vae, ne‘i maua.
27. ‘Aua ne‘i e fa‘afiti se mea lelei i ē ‘ua tatau i ai,pe a ‘ua e mafai ‘ona faia.
28. ‘Aua ne‘i e fai atu i lē lua te tuā‘oi,“Alu ia, ‘inā toe sau, a taeao, ‘ona ‘ou avatu ai lea;”a o lo‘o i ai lava le mea ‘iā te oe.
29. ‘Aua ne‘i e fai togafiti e leaga ai lē lua te tuā‘oi;a o ia o lo‘o nofo fa‘atalanoa fa‘atasi ma oe.
30. ‘Aua ne‘i finau fua ma se tasi tagata;‘āfai ‘ua na lē faia se mea leaga ‘iā te oe.
31. ‘Aua ‘e te matau‘a i le tagata fa‘asauā;‘aua fo‘i ‘e te filifili i se tasi o ona ala.
32. Auā e ‘inosia e le ALI‘I le tagata agapi‘opi‘o;‘ae fefa‘auōa‘i o ia ma ē ‘ua sao a latou amio.
33. O le fetu‘u a le ALI‘I o lo‘o i le fale o lē amio leaga;a ‘ua fa‘amanuia e ia le mea e nofo ai ē amiotonu.
34. O ē tauemu e tauemua fo‘i i latou e ia;‘ae foa‘i mai e ia le alofa tunoa i ē agamalū.
35. O ē popoto e fai mo latou tofi le vi‘iga;a o ē vālelea, e fai mo latou tomai le mā.#