1. O lo‘o i le tagata sauniga o le loto;a o lo‘o mai le ALI‘I le tali a le laulaufaiva.
2. O ala uma o le tagata, e lelei ia i lona lava manatu;a o le ALI‘I, na te fuatia loto.
3. ‘Ia e tu‘uina atu i le ALI‘I o au galuega;‘ona fa‘amauina ai lea o ou mānatunatuga.
4. ‘Ua faia mea uma e le ALI‘I, e i‘u ai lona lava finagalo;o lē ‘ua amio leaga fo‘i mo le aso vale.
5. E ‘inosia e le ALI‘I ‘atoa uma ē ‘ua loto fa‘amaualuga;e tago lea lima i lea lima, ‘ae lē fa‘asaoina i latou.
6. ‘Ua togiolaina le amioletonu i le alofa ma le fa‘amaoni;o le mata‘u fo‘i i le ALI‘I, ‘ua ‘alo ‘ese ai tagata i le leaga.
7. A fiafia le ALI‘I i ala o le tagata,‘ona fa‘atupuina lea e ia o le leleiga ma ia o ē ita ‘iā te ia.
8. E sili ‘ona lelei o se mea itiiti, a o i ai le amiotonu,i mea e tele pe a le o i ai le tonu.
9. E filifili i le loto o le tagata lona ala;a o le ALI‘I na te fa‘atonuina le mea e ui ai o ia.
10. ‘Ua se ‘upu a lē ‘i‘ite poto le ‘upu ‘ua i laugutu o le tupu;e lē tautala fa‘api‘opi‘o lona fofoga i le fa‘amasinoga.
11. O le fua ma le fua fa‘atautau ‘ua tonu, o a le ALI‘I ia;o lana lava galuega o ma‘a uma e fua a‘i o i le taga.
12. O le mea e ‘ino‘ino i ai tupu, e fai amio leaga;auā e fa‘atumauina le nofoāli‘i i le amiotonu.
13. O le mea e fiafia ai tupu, o laugutu e tautala i ‘upu tonu;ma lē ‘ua tautala i ‘upu sa‘o, e alofagia lea e i latou.
14. O le to‘asā o le tupu, o le sāvali o le oti lea;a o le tagata poto na te fa‘alaulelei i ai.
15. O lo‘o i ai le ola i le malamalama o fofoga o le tupu;o lona alofa mai, e tusa lea ma le ao o le uaga mulimuli.
16. ‘Ia maua le poto, e sili ‘ona lelei lea i le auro;‘ia maua fo‘i le atamai, ‘ia sili ‘ona mana‘omia lea i le ario.
17. O le ala tele o ē amio sa‘o, o le ‘alo ‘ese lea i le leaga;o lē na te leoleo lona ala, na te fa‘asaoina lona ola.
18. E muamua le fa‘amaualuga i le malaia;e muamua fo‘i le loto fa‘asiasia i le pa‘ū.
19. E lelei ‘ona maulalo o le loto fa‘atasi ma ē ‘ua agamalū;‘ae leaga ‘ona tufa le vete fa‘atasi ma ē fa‘amaualuga.
20. O lē ‘ua fa‘autauta i se mea, e maua e ia le mea lelei;o lē fa‘atuatua fo‘i i le ALI‘I, ‘amu‘ia o ia.
21. O lē ‘ua poto le loto, e ta‘ua ia o lē mafaufau;o le suamalie fo‘i o laugutu e tupu ai pea lona poto.
22. O le puna o le ola le poto i lē ‘ua i ai;a o le a‘oa‘o atu o ē vālelea, o le valea lava lea.
23. O le loto o lē ‘ua poto, e poto ai lona gutu;e fa‘aopoopoina ai fo‘i le poto i ona laugutu.
24. O ‘upu matagofie, o le meli ‘ua sisina ifo ia;e suamalie i le loto ma le mea e mālōlō ai ivi.
25. O i ai le ala ‘ua tonu i le manatu o le tagata;a o lona taunu‘uga, o ala ia e oti ai.
26. O le tagata e galue, ‘ua galue o ia mo ia lava;auā ‘ua fa‘atauānauina o ia e lona gutu.
27. O le tagata ulavale, na te matuā saunia le leaga;o lo‘o i ona laugutu o ‘upu e peiseaī o le afi mumū.
28. O le tagata fa‘api‘opi‘o, e fa‘atupuina e ia le misa;ma lē fa‘atuaupua, na te fa‘ate‘a‘eseina uō.
29. O le tagata fa‘asauā, na te fa‘a‘ole‘ole i lē la te tuā‘oi;na te ta‘ita‘iina fo‘i o ia i le ala e lē lelei.
30. O lo‘o moe ona mata e mānatunatu ai i mea fa‘api‘opi‘o;o lo‘o memu ona laugutu e fa‘ataunu‘u ai le leaga.
31. O le pale matagofie le ulu sinā,pe a ‘ua i ai i le ala o le amiotonu.
32. E sili ‘ona lelei o lē ‘ua gesegese i le ita i lē ‘ua malosi;e sili fo‘i lē ‘ua pule i lona loto i lē na te ā‘ea le ‘a‘ai.
33. E faia le vili i le fatafata o le ‘ofu;‘ae mai le ALI‘I lona fa‘atonuga uma lava.#