1. E sili ‘ona lelei o le tagata mativa ‘ua savali i lana amiotonu,i lē ‘ua laugutu fa‘api‘opi‘o, o ia fo‘i o le vale.
2. E lē se mea lelei fo‘i ‘ina ‘ia aunoa le tagata ma le poto;o lē ‘ua fa‘ata‘alise fo‘i i ona vae e sesē o ia.
3. O le valea o le tagata e fa‘api‘opi‘o ai lona ala;‘ua ita fo‘i lona loto i le ALI‘I.
4. O le ‘oloa e fa‘aopoopo mai ai uō e to‘atele;a o lē ‘ua mativa, e te‘a ‘ese o ia ma lana uō.
5. E lē fa‘asaoina le molimau pepelo;ma lē ‘ua tala pepelo, e lē sao lava ia.
6. E to‘atele latou te ole atu i luma o le ali‘i;e uō tagata uma lava ma le tagata foa‘i mea.
7. O uso uma o le tagata mativa, latou te ‘ino‘ino ‘iā te ia;a o ana uō, latou te fa‘amamao ma ia;na te tuliloa ‘iā te‘i latou i ‘upu, ‘ae lē maua i latou.
8. O lē ‘ua maua le poto, ‘ua alofa o ia ‘iā te ia lava;o lē ‘ua tausi le fa‘autauta, e maua e ia le mea lelei.
9. E lē fa‘asaoina le molimau pepelo;ma lē ‘ua tala pepelo, e fano lava o ia.
10. O mea fa‘afiafia, e le ono ia i le vale;e matuā le ono fo‘i i le ‘au‘auna ‘ona pule i ali‘i.
11. O le mafaufau o le tagata e fa‘agesegese ai lona ita;o lona vi‘iga fo‘i lea, ‘ina ‘ua lē manatua lona agaleagaina.
12. O le to‘asā o le tupu, e tusa lea ma le tagi o le leona ta‘anoa;a o lona alofa, e tusa lea ma le sau i le mutia.
13. O le atali‘i valea, o le malaia lea o lona tamā;o fa‘amisa fo‘i o le avā, o le tutulu so‘o lea.
14. O le fale ma ‘oloa, o le tofiga lea a mātua;a o le avā mafaufau, mai le ALI‘I lava ia.
15. O le paiē e tupu ai le moe gase;ma le tagata fa‘avaivai, e fia ‘ai lava ia.
16. O lē ‘ua tausia le poloa‘iga, ‘ua tausia e ia lona lava ola;a o lē ‘ua fa‘atalalē ona ala, e oti lava ia.
17. O lē ‘ua alofa i le tagata mativa, na te avatua ana mea i le ALI‘I;e tauia mai fo‘i e ia ana mea na avatu ‘iā te ia.
18. A‘oa‘i atu i lou atali‘i, manū o fai sou fa‘amoemoe;‘ae ‘aua le naunau lou loto ‘ia oti ai o ia.
19. O le tagata ita tele e fa‘asalaina o ia;auā ‘āfai ‘e te lavea‘i ‘iā te ia, ‘e te toe fa‘apea fo‘i.
20. ‘Ia e fa‘alogo i le fa‘atonu mai, ma e talia le a‘oa‘o atu;‘ina ‘ia e poto ai pe a o‘o i ou tausaga amulī.
21. E tele mafaufau o lo‘o i le loto o le tagata;a o le pule a le ALI‘I, e tumau lava lea.
22. O le mea e mana‘omia i le tagata o lona alofa lea;e sili ‘ona lelei o le tagata mativa i le tagata pepelo.
23. O le mata‘u i le ALI‘I e i‘u lea i le ola;o lē ‘ua i ai, e mā‘ona pea o ia; e le a‘afia o ia e le mala.
24. ‘Ua fa‘alilo e le paiē lona lima i le tanoa;‘ae lē fa‘afo‘i mai ai lava i lona gutu.
25. ‘Ia e sasa i lē ‘ua tauemu, ‘ona tupu ai lea o le fa‘autauta o lē ‘ua faigofie;ma ‘ia e a‘oa‘i atu i lē ‘ua mafaufau, ‘ona iloa ai lea e ia o le poto.
26. O lē ‘ua fa‘amaumau mea a lona tamā ma tuli ‘ese i lona tinā,o le atali‘i lea e tupu ai le mā ma le māsiasi.
27. Lo‘u atali‘i e,sōia ‘e te fa‘alogo i le a‘oa‘o atu e fa‘asesē ai i ‘upu e poto ai.
28. O le molimau ulavale, e tauemu o ia i le fa‘amasinoga;o gutu fo‘i o ē amio leaga e fologia ai le agasala.
29. ‘Ua saunia fa‘amasinoga mo ē tauemu;o ta fo‘i mo tua o ē vālelea.#