1. O fa‘ata‘oto fo‘i nei a Solomona, na tusia mai e tagata o Esekia le tupu o Iuta.
2. O le mamalu o le Atua ‘ia natia ai mea;a o le mamalu o tupu ‘ia su‘esu‘e ai mea.
3. O le lagi e maualuga lea ma le lalolagi e maulalo lea;o loto fo‘i o tupu e le ma su‘esu‘eina.
4. ‘Ia fa‘ate‘a le otaota i le ario,‘ona maua ai lea o se ipu mo le tufuga fai mea u‘amea;
5. ‘ia fa‘ate‘a lē ‘ua amio leaga i luma o le tupu,‘ona fa‘atumauina ai lea o lona nofoāli‘i i le amiotonu.
6. ‘Aua ‘e te fa‘alialia i luma o le tupu;‘aua fo‘i ‘e te tu i le mea e i ai ali‘i sili.
7. Auā e lelei ‘ona ia fai atu ‘iā te oe, “Sau ia i luga nei;”‘ae leaga ‘ona fa‘amaulaloina oe i luma o le ali‘i ‘ua e va‘ai i ai.
8. ‘Aua ne‘i e alu fa‘ata‘alise e fai le finauga; ‘ina ne‘i femēmēa‘i oe,pe a o‘o i lona i‘uga, ‘ina ‘ua fa‘amāina oe e lē lua te tuā‘oi.
9. ‘Ia fai la ‘oulua finauga ma lē lua te tuā‘oi;‘ae ‘aua le fa‘aali atu le ‘upu fa‘alilo a le tasi tagata;
10. ne‘i fa‘alumaina oe e lē ‘ua fa‘alogo i ai;‘ona lē te‘a lea ‘iā te oe ‘ona ta‘uleagaina.
11. O le ‘upu ‘ua fai fa‘atatauina,o molī auro ia i ‘ato ario togitogi fa‘amamanuina.
12. O le tagata ‘ua a‘oa‘i ma le poto i taliga ‘ua fa‘alogo mai,o le mama auro lea, ma le asoa auro lelei.
13. E pei o le malūlū o le kiona i ona po o le seleselegāsaito;e fa‘apea le ‘avefe‘au fa‘amaoni i ē ‘auina o ia;na te fa‘afoisia mai agaga o ona ali‘i.
14. O le tagata ‘ua tautala tele i ana mea e foa‘i,‘ae pepelo, o ao ma matagi ia, ‘ae leai se timuga.
15. O le fa‘ato‘ato‘a e fa‘aoleoleina ai le ta‘ita‘i;ma le laulaufaiva filemū e gau ai le ivi.
16. ‘Ua e maua ‘ea le meli? ‘ia e ‘ai fa‘atatau i ai;ne‘i e mā‘ona tele ai, ‘ona e pua‘i ai lea.
17. ‘Ia seāseā ‘ona e alu atu i le fale o lē lua te tuā‘oi;ne‘i musu o ia ‘iā te oe ma ‘ino‘ino ‘iā te oe.
18. O le tagata ‘ua molimau pepelo i lē la te tuā‘oi,o le uatogi lea ma le pelu ma le ū fanafana e ma‘ama‘ai.
19. O le nifo ‘ua gau ma le vae ‘ua mapeva,o le fa‘atuatua lea i le tagata pepelo i le aso vale.
20. O lē ‘ua ‘ave ‘ese le ‘ofu i le aso malūlū, i le ma le vineka i luga o le neteri,e fa‘apea i lē ‘ua lagi ni siva i le loto ‘ua fa‘anoanoa.
21. ‘Āfai e fia ‘ai lē ‘ua ita ‘iā te oe, ‘ia e fafaga ‘iā te ia;‘āfai e fia inu o ia, ‘ia e fa‘ainu ‘iā te ia i le vai;
22. auā ‘e te ‘ava‘e ai malala ola i luga o lona ulu;e tauia fo‘i oe e le ALI‘I.
23. O le matagi mai le itū i matū e tupu ai timuga;ma le laulaufaiva fa‘atuaupua e tupu ai mata ita.
24. E lelei ‘ona nofo i le tumutumu i luga o le fale;‘ae leaga ‘ona nofo ma le fafine fa‘amisa i le fale tele.
25. O le vai malūlū i le tagata ‘ua lailoa i le fia inu,o le tala lelei lea mai le nu‘u mamao.
26. O le vaipuna ‘ua fa‘agāepu ma le vaipuna ‘ua fa‘aleagaina,o le tagata amiotonu lea ‘ua pa‘ū i luma o lē ‘ua amio leaga.
27. O le ‘ai tele i meli, e lē lelei lea;o le su‘esu‘ega fo‘i o lo latou mamalu, o le mea e mafatia ai lea.
28. O le tagata ‘ua lē mafai ona ia pulea lona loto,‘ua pei o le ‘a‘ai ‘ua fa‘atafunaina, ‘ua leai ni ona ‘aupā.