1. ‘Ua o‘o fo‘i ‘ina pu‘eina o le ‘au uso e to‘afitu ma lo latou tinā, sa u‘una‘i atu e le tupu ‘ina ‘ia latou ‘a‘ai o ‘a‘ano o pua‘a ‘ua vaosia e le tulafono, sa fa‘asauāina i ni sasa maea ma ni sasa pa‘u povi.
2. A o le tasi o i latou, o le ulumatua, ‘ua fai atu, “Se a se mea ‘e te mana‘o i ai, se a fo‘i se mea ‘e te fia su‘esu‘e ‘iā i matou? ‘Ua matou nofo sauni i le oti, ‘ae lē mafai ‘ona matou solia o tulafono o lo matou nu‘u ‘ua maua mai i le Atua.”
3. O le mea lea na ita ai le tupu, ‘ua poloa‘i ‘ia tutu le afi i lalo o ‘ogāumu ma ‘ulo ‘apamemea; ‘ua ‘a‘asa,
4. ‘ona poloa‘i lea ‘ia tipi ‘ese le laulaufaiva o lē na mua‘i tautala; ‘ua fofo‘e fo‘i o lona ulu, fa‘amutu ona lima ma ona vae, o matamata i ai o ona uso ma lona tinā.
5. ‘Ua māe‘a ‘ona fa‘amutu uma ona itūtino, ‘ona poloa‘i lea ‘ia tu‘uina o ia i luga o le afi ma ‘ia tunu i le ‘ogāumu a o ola pea o ia; a o puapuagātia fa‘aumiumi ai o ia, ‘ona feapoapoa‘i ai lea o ona uso ma lona tinā ‘ia latou oti ma le loto malosi,
6. o fai ane, “E silafia e le Ali‘i le Atua le mea moni, e fa‘amafanafanaina o ia ‘ona o i tatou, e pei ‘ona fa‘aalia e Mose i le pese ‘ua ‘ai‘oi atu ai, o fai ane: ‘E fa‘amafanafanaina fo‘i o ia i ana ‘au‘auna.’”
7. A ‘ua oti fa‘apenā le uso muamua, ‘ona latou ta‘ita‘i ane lea i lē ‘ua pito atu i ai ma fa‘atauemu mai i ai; ‘ua fofo‘e‘esea le pa‘u o le ulu mōna lauulu, ‘ona fesili lea i ai, “Pe ‘ai lava ia, a o le‘i fa‘asalaina lona tino ‘atoa i ona itūtino ta‘itasi.”
8. A o ia ‘ua tali atu i le gagana o lona nu‘u, ‘ua fai atu, “E leai lava.” O le mea lea ‘ua mulimuli atu ai i le ulumatua i le sauāga lava e tasi;
9. a ‘ua tali oti o ia, ‘ona fai atu lea, “O oe lava ‘ua sili le amio leaga, ‘ua e fasiotia i matou i le olaga nei; a o le tupu o le lalolagi na te toe fa‘atūina i matou i le toetū o le ola e fa‘avavau, auā ‘ua oti i matou ‘ona o ana tulafono.”
10. ‘Ua oti lenā, ‘ona fa‘atauemuina lea o lona to‘atolu; ‘ua tu‘utu‘u atu loa lona to‘atolu; ‘ua tu‘utu‘u atu loa lona laulaufaiva, e tusa ma le poloa‘i, ma fālō ona lima ma le lotomau,
11. ma ‘ua fai atu ma le fa‘alagolago tele, “O mea nei ‘ua ‘ou maua mai le Atua, ‘ae ‘ou te ta‘ufa‘atauva‘a lava i ai i le itūlā nei ‘ona o tulafono pa‘ia a le Atua, auā o lo‘u fa‘amoemoe ‘ou te toe talia mai lava i lana afioga.”
12. E i ai ‘ona ofo le tupu, ‘atoa ma i latou sa fa‘atasi ma ia, i le loto tele o lenā taule‘ale‘a, ‘ua pei o le leai ‘iā te ia o mea fa‘atigā.
13. Ma ‘ua fa‘apea ‘ona oti lenā, ‘ona latou fa‘atigā lea i lona to‘afa o le ‘au uso, o fa‘asauā ‘iā te ia i le ala lava e tasi.
14. ‘Ua o‘o ‘ina ‘ua lata le itūlā o lona oti, ‘ona fai atu lea, “O le mea sili, ‘ona ‘ua mafai ‘iā te i latou ‘ua fasiotia e tagata ‘ona fa‘amoemoe i le Atua na te toe fa‘atūina i latou; a o oe, ‘e te lē toetū lava oe i le ola.”
15. ‘Ona latou ‘aumaia lea o lona to‘alima ma ‘ua latou fa‘asauā ‘iā te ia. A ‘ua tepa a‘e o ia i le tupu, o fai atu,
16. “‘Ua tu‘ufaitalia nei o oe, auā e ui ‘ina ‘augavale o oe, a ‘ua ‘iā te oe le pule fa‘aletagata; ‘ae ‘aua ne‘i e fa‘apea ifo ‘ua tu‘ulafoa‘iina lo matou nu‘u e le Atua.
17. Tau ‘ina e fa‘atalitali teisi, ‘ona e iloa ai lea o lona mana tele pe a fa‘atigāina e ia o oe ‘atoa ma lau fānau.”
18. ‘Ona ‘aumaia ai lea o lona to‘aono; a ‘ua lata ‘ona oti o ia, ‘ona fa‘apea atu lea, “‘Aua ne‘i sesē fa‘avalea o oe; auā ‘ua tigāina lava i matou ‘ona ‘ua matou agasala i lo matou nei mea e ofo ai le loto.
19. A o oe, ‘aua ‘e te tāofi ifo e lē o‘o se sala ‘iā te oe, ‘ona ‘ua e fa‘asaga tau ma le Atua.”
20. A o le tinā lava ia ‘ua lē mafa‘amatalaina lona loto tele, ‘ua tatau ‘ona manatua pea lava e tagata lelei; sa va‘ava‘ai atu i le fasiotia o ana tama e to‘afitu i le aso lava e tasi, a ‘ua ia tali ma le loto malosi, ‘ona o lona lava fa‘alagolago i le Atua;
21. sa ia apoapoa‘i ma fa‘amalosi ‘iā te i latou ta‘ito‘atasi, i le gagana o lo latou nu‘u, o tumu lava ia i le poto; ‘ua na fa‘aopoopo le loto fa‘atamatane i ona manatu fa‘afafine,
22. o fai atu ‘iā te i latou, “‘Ou te lē iloa pe fa‘apefea ‘ona tutupu ‘outou i lo‘u manava; auā e lē o a‘u na tu‘u atu ‘iā te ‘outou le agaga ma le ola; e le‘i fa‘atasia lava e a‘u o ‘outou itūtino;
23. a o le Tupu‘aga lava ia o le lalolagi, ‘ua na fa‘atonutonuina le fānau mai o le tagata ma ‘ua pogai ‘iā te ia le tupu mai o mea uma lava, o ia na te toe foa‘i atu ‘iā te ‘outou, i lona agaalofa, le agaga ma le ola, ‘ona ‘ua ‘outou ta‘ufa‘atauva‘a nei ‘iā te ‘outou lava ‘ona o lana tulafono.”
24. A o Atioko, ‘ua manatu ‘ua fa‘atauemuina o ia, ‘ua lē fa‘aeteete lava i latou i ana a‘oa‘iga; sa totoe na o le ui‘i, ‘ona ia apoapoa‘i lea ‘iā te ia, e lē gata i ni ‘upu, a ‘ua ia ta‘utino atu fo‘i ma le tautō na te fa‘amanuiaina ma fa‘a‘oloaina lava ia pe ‘āfai na te tu‘ulafoa‘iina tulafono a ona tua‘ā, ‘ona ia faia lea o ia māna uō ma avatu ‘iā te ia mea uma e tusa ai.
25. A ‘ua lē o‘otia lava le loto o le taule‘ale‘a i mea ia, ‘ona vala‘au ai lea le tupu i le tinā ma ‘ua apoapoa‘i atu ‘iā te ia ‘ia ‘avea lava o ia ma fa‘aolataga o lana tama.
26. ‘Ua faia ana ‘upu e tele lava ‘iā te ia, ‘ona folafola atu ai lea e le tinā na te fa‘aliliuina le loto o lana tama.
27. O lea, ‘ua ia fa‘asaga ifo ‘iā te ia, o tauemu i le tupu sauā ma ‘ua fai atu ‘ia ai i le gagana o lo latou nu‘u, “La‘u tama e, ‘ia e alofa mai ‘iā te a‘u! o a‘u na ‘ave o oe i lo‘u manava i masina e iva, na ‘ou fa‘asusu ‘iā te oe i tausaga e tolu ma fafaga ‘iā te oe ma tausi ‘iā te oe se‘ia o‘o mai lava i o‘u nei tausaga.
28. La‘u tama e, ‘ou te ‘ai‘oi atu, ‘ia tepa ou mata i le lagi ma le lalolagi ma mea uma ‘ua i ai; ‘ina ‘ia e lagona ifo ‘ua faia e le Atua ai le leai o mea ia, ‘atoa ma le fānauga a tagata;
29. ‘ona e lē mata‘u ai lea i lenei fasioti tagata, ‘ae aogā lava oe ‘ona e fa‘atasi mou uso i le tali o le oti, ‘ina ‘ia ‘ou toe talia mai oe fa‘atasi mou uso i le agaalofa o le Atua.”
30. ‘Ua lē uma ana ‘upu, a ‘ua fai atu e le taule‘ale‘a, “Se a se mea ‘ua ‘outou fa‘atalitali ai? ‘Ou te lē usita‘i lava i le poloa‘iga a le tupu, a o le poloa‘iga a le tulafono ‘ua tu‘uina mai e Mose ‘iā i matou ‘ou te ‘ana‘ana i ai.
31. A o oe ‘ua fai ma pogai o mea leaga uma ‘ua pesi i tagata Eperu, ‘e te lē ‘alo ‘ese lava i le ‘a‘ao o le Atua.
32. Auā o i matou, ‘ua matou tigāina i nei mea ‘ona o a matou agasala;
33. ‘āfai fo‘i na to‘atama‘i teisi le Ali‘i, o lo matou Atua, ‘iā te i matou, e fai ma a‘oa‘iga ma fa‘asalaga, ‘ae toe fa‘alelei lava ia māna ‘au‘auna.
34. A o oe, le tagata agasala, o lē ‘ua aupito amio leaga i tagata uma lava, ‘aua ne‘i e fa‘aea lou loto i le fa‘amoemoe fa‘avalea, e pa‘ū fua lou ita i ‘au‘auna a le Atua;
35. auā ‘e te le‘i ‘alo ‘ese lava i le fa‘amasinoga a le Atua e ona le mana uma, na te silafia mea uma lava.
36. Auā o o‘u uso, ‘ona ‘ua latou talia sina puapuagā pu‘upu‘u, ‘ua latou ulu atu nei i le feagaiga o le ola e fa‘avavau; a o oe, ‘e te totogi atu lava i le fa‘amasinoga a le Atua le sala ‘ua tatau ma lou fa‘amaualuga.
37. A o a‘u nei, e pei lava o o‘u uso, ‘ou te tu‘u atu lo‘u tino ma lo‘u agaga ‘ona o tulafono a o matou tua‘ā, o tagi atu i le Atua agaalofa ‘ina ‘ia vave fa‘aalia mai lona agalelei i lo matou nu‘u, ‘ae ‘ia fa‘aaogāina o le sasa ma le puapuagā ‘ina ‘ia e ta‘utino mai ai o ia o le Atua e to‘atasi lava.
38. A o le a gata mai ‘iā te a‘u nei mo‘u uso le to‘asā o lē ona le mana uma, ‘ua na fa‘ao‘oina mai, ma le fa‘amasinoga tonu lava, i lo matou nu‘u ‘atoa uma.”
39. ‘Ona o‘otia lea le tupu i le ita tele; ‘ua sili ona fa‘asauāina leaga o lenei taule‘ale‘a i ni isi uma, auā ‘ua matuā loto tigā o le tupu ‘ona ‘ua tauemuina o ia.
40. O lea fo‘i, na oti lava lenei ma le loto mamā, o fa‘alagolago ‘ato‘atoa lava i le Atua.
41. ‘Ae ‘ua i‘u fo‘i ‘ina fasiotia ma le tinā e mulimuli atu i ana tama.
42. O lenei, ‘ua lava o tala ia e uiga i le faigātaulaga ma sauāga leaga anoanoa‘i a Atioko.