1. O ona po lava ia ‘ua toe fo‘i mai ai o Atioko nai Peresia ma le māsiasi.
2. Auā na ulu atu o ia i le ‘a‘ai e igoa ‘iā Peresepoli, ma ‘ua taumafai ‘ona vete ai le malumalu ma fa‘apologa i le ‘a‘ai; a ‘ua tago le motu o tagata i o latou ‘au‘upega ma ‘ua tulia o ia ma lana ‘au; e fa‘apea ‘ona sola o Atioko ma ‘ua toe fo‘i atu ma le māsiasi.
3. Ma ‘ua taunu‘u i Epatana, ‘ua logo ai ‘iā te ia o mea na o‘o ‘iā Nikanora ma Timoteo,
4. ‘ona oso ai lea o lona ita ma ‘ua manatu o le a mafai ‘iā te ia ‘ona taui ma sui i tagata Iutaia mo le leaga na fa‘ao‘o ‘iā te ia e i latou ‘ua latou tulia o ia. O lea na poloa‘i ai ‘ia fa‘ata‘alise lona nofoa fa‘ata‘avalevale, ‘ua alu lē utuvā lava, o pulunaunau ‘iā te ia le fa‘amasinoga tonu a le Atua, ‘ona ‘ua fa‘apea ane lana ‘upu fa‘asausili, “E alu atu lava ia i Ierusalema na te liua lea ‘a‘ai ma fanua oti o tagata Iutaia.”
5. A o le Ali‘i, le Atua o Isaraelu, lē ‘ua na silafia mea uma, ‘ua na taia o ia i ona tōtōga i se ma‘i e lē mafai ona fō‘ia. Auā ‘ua uma ana ‘upu ia, ‘ua ogotia loa o ia i se tigā tele i ona ga‘au ma le matuā gaoi o ona tōtōga;
6. ma ‘ua tatau lava lea, auā na saeia fo‘i e ia o tōtōga o ni isi, i ni fa‘asauāga e tele ma le fou i le fa‘alogo; a ‘ua lē māui ai lava lona loto leaga.
7. ‘Ae peita‘i, ‘ua tumu pea lava ia i le fa‘amaualuga, ‘ua ‘a‘asa le ita o lona loto i tagata Iutaia ma ‘ua poloa‘i ‘ia fa‘ata‘alise le malaga, ‘ona pa‘ū lea o ia nai lona nofoa ta‘avalevale sa alu ma le masau lava, i le o lona palasi leaga ‘ua tigāina ai uma ona itūtino.
8. O lona fa‘asausili, ‘ua lē onomea i se tagata, sa ia manatu ifo ai ‘ua mafai lava ‘iā te ia ‘ona poloa‘i i peau o le vasa ma fuafua le maualuga o mauga i se fua fa‘atautau, a o lenei ‘ua fa‘amaulaloina lava ia i le fogā‘ele‘ele ma ‘ua fa‘ae‘etia i le nofoa e fata, ‘ua ‘avea ai o ia ma molimau malamalama lava o le mana o le Atua.
9. Sa o‘o fo‘i ‘ina sasao mai o ilo e tele mai le tino o lea tagata amio leaga, sa to‘ulu le ‘a‘ano o lona tino ola ma le matuā puapuagā lava, sa ‘avea ma mea fa‘asoesā i le itūtau‘a uma le namu leaga o lona tino elosia.
10. Sa manatu ifo analeilā ‘ua na mafaia ‘ona pa‘i atu i fetū o le lagi, a o lenei ‘ua leai nisi ‘ua mafai ‘ona fata o ia ‘ona ‘ua lē lava tali e i latou lona namu leaga.
11. O le mea lea na mafua ai ‘ona tia‘i e ia lona fa‘amaualuga tele ma maua ai le malamalama i lona ia fa‘atauva‘a, talu o le a‘oa‘iga ma le sasa a le Atua, ‘ua saga tupu atili ai pea i itūlā uma ona puapuagā.
12. ‘Ua o‘o ‘ina le lavā fo‘i o ia e ‘o‘ono i lona ia manogi leaga, ‘ona ia fai ane lea, “E matuā tatau lava ‘ona fa‘amaulalo i luma o le Atua, ‘ia ‘aua lava le fia tusa ma le Atua le tagata ‘augavale.”
13. Sa tagi atu i le Atua lenei tagata amio leaga, a ‘ua lē toe au maua mai ai lona agaalofa.
14. O le ‘a‘ai fo‘i sa aga‘i atu i ai ma le televave ‘ina ‘ia fa‘alaugatasia ma le fogā‘ele‘ele, ‘ina ‘ia ‘avea ma tu‘ugamau o ona lava tagata, o lenei ‘ua mana‘o o ia ‘ina ‘ia fa‘asa‘olotoina;
15. o tagata Iutaia sa ia fa‘aali ai o lona tāofi ‘ua lē aogā i latou ‘ina tanumia, a ‘ia tu‘uina i latou e ‘aina e manu felelei ma manu fe‘ai, ‘ia fa‘aumatia ai lava i latou fa‘atasi ma a latou fānau; a o lenei ‘ua folafola atu na te fa‘atutusaina i latou ma tagata Atenai,
16. o le malumalu pa‘ia sa na mua‘i veteina, ‘ua ia loto nei teuteuina i mea alofa aupito tāua ma le fa‘ateleina o ona ipu pa‘ia ma le totogi atu i ana lava tupe o mea uma e aogā mo le osiga o taulaga;
17. ma le tasi fo‘i, ‘ua folafola atu o le a liua lava ia ma tagata Iutaia ma savali solo i itū uma o le lalolagi, o tala‘i atu ai le mana o le Atua.
18. A ‘ua lē mapu ai o ia i ona puapuagā, auā ‘ua o‘otia o ia i le fa‘amasinoga tonu a le Atua; ‘ona vaivai ai lea o lona loto ma ‘ua tusi atu ai i tagata Iutaia lana tusi, ‘ua pei o se tusi talosaga, o fa‘apea mai:
19. “O Atioko, o le tupu ma le ta‘ita‘i ‘au, e alofa tele atu i tagata Iutaia, o ona tagata aupito lelei; ‘ia mālōlōina ‘outou ma ‘ia manuia.
20. ‘Āfai ‘ua mālōlōina ‘outou, ‘atoa ma a ‘outou fānau ma ‘ua sololelei mea uma ‘iā te ‘outou, ‘ona matou matuā fa‘afetai atu ai lea i le Atua.
21. A o a‘u nei ‘ua maua i le ma‘i, a ‘ua ‘ou manatua pea ‘outou ma le alofa; ‘ua ‘ou fo‘i mai nai le lau‘ele‘ele o Peresia, ‘ua maua ai a‘u i le tino vaivai lava, ‘ona ‘ou manatu ai lea ‘ua tatau ‘iā te a‘u ‘ona ‘ou teuteu o mea tau lo tatou mālō.
22. ‘Ou te lē loto vaivai e uiga lava ‘iā te a‘u, o lo‘o malosi lo‘u fa‘amoemoe e fa‘amālōlōina a‘u i lenei ma‘i.
23. A ‘ua ‘ou manatua lo‘u tamā, i aso sa na ta‘ita‘iina ai le itūtau‘a i le lau‘ele‘ele o le atumauga, sa na fa‘asinomia o lē na te tago i le pule pe a mavae atu o ia;
24. ‘ina ‘ia lē atuatuvale ai o tagata o le lau‘ele‘ele pe a o‘o ‘ina tupu se fa‘alavelave po ‘ua maua e i latou se tala vale, auā ‘ua latou iloa lē ‘ua tu‘u atu i ai le pule aoao.
25. ‘Ua ‘ou manatua fo‘i o tupu o nu‘u tuā‘oi, po o ē pule i itūmālō ‘ua lata mai, ‘ua latou lamalama i lo‘u mālō o fa‘atalitali i se mea a tupu, ‘ona ‘ou tofia ai lea ma tupu o lo‘u atali‘i o Atioko, o ia lea na ‘ou tagi atu ai i ni isi e to‘atele o ‘outou, i aso faiso‘o na ‘ou fealua‘i ai i le lau‘ele‘ele o le atumauga, ‘ina ‘ia ‘outou alolofa ‘iā te ia ma ‘ua ‘ou tusi atu fo‘i ‘iā te ia le tusi ‘ua ‘i‘inei lona ata.
26. O le mea lea ‘ou te tagi atu ai ma ‘ai‘oi atu ai ‘iā te ‘outou, ‘ia manatua lo‘u agalelei i lo ‘outou mālō ‘atoa ma ‘outou ta‘ito‘atasi ma ‘ia ta‘itasi ma tausi pea i lona fa‘amaoni ‘iā te i mā‘ua ma lo‘u atali‘i.
27. Auā ‘ua ‘ou fa‘amoemoe o le a agamalū lava ia ma le agamālie; e ‘ana‘ana fo‘i o ia i a‘u apoapoa‘iga ma fa‘aali atu lona alofa ‘iā te ‘outou.”
28. O lenā fasioti tagata, o lē sa fāifai i le Atua, o lenei ‘ua taia leaga lava ia, e pei ‘ona ia fa‘ataugā fo‘i i ni isi; ‘ua fa‘amavae o ia ma lenei olaga, ‘ua oti malaia i le atumauga, i le nu‘u ‘ese.
29. A ‘ua ‘avea lona tino e Filipo, o le tama a lona tinā tausi, ‘ua ia mata‘u i le atali‘i o Atioko ma ‘ua alu atu ai ‘iā Tulomaio Filometo i Aikupito.