1. ‘Ua uma ‘ona osi lea feagaiga, ‘ona toe fo‘i atu lea o Lusia i le tupu, a ‘ua sagai o tagata Iutaia i le fa‘ato‘a o latou fanua.
2. A o ta‘ita‘i o le lau‘ele‘ele, o Timoteo ma Apoloni, le atali‘i o Kenaio, ‘atoa fo‘i ma Ieronimo ma Temofo ma Nikanora le kovana o Kuperu, sa latou fa‘alavelave i le nofo lelei ma le filemū o le nu‘u.
3. A o tagata Iopa ‘ua latou faia le amio matuā leaga: ‘ua latou tagi atu i tagata Iutaia sa latou nonofo fa‘atasi, ‘ia latou ō fa‘atasi ma a latou avā ma a latou fānau, i luga o va‘a na saunia, e peiseaī lava ‘ua leai se mea e tasi latou te tigā ai ‘iā i latou.
4. ‘Ua fa‘amaonia lea mea e le fono aofia o le ‘a‘ai, ‘ona talia lea le tagi e tagata Iutaia ma le leai se māsalosalo, auā o lo latou vā lelei; ‘ae ‘ua latou taunu‘u atu i le loloto, ‘ona lafoina lea i le vasa o Iutaia pe itiiti le lua selau.
5. ‘Ua iloa e Iuta lenā sauāga ‘ua faia i tagata o lona nu‘u, ‘ona poloa‘i atu loa lea i fitafita sa fa‘atasi ma ia; ‘ua latou tatalo atu i le Atua, le fa‘amasino amiotonu.
6. ‘Ona latou ō atu lea e tau ma ē na fasioti i o latou uso ma ‘ua susunu i le po le taulaga, ‘ua susunu fo‘i ma va‘a sa i ai; a o i latou na sao i le afi, ‘ua na fasiotia i le pelu.
7. ‘Ua uma lenā mea, ‘ona alu lea o ia ma le manatu o le a toe fo‘i atu i se aso na te fa‘aumatia tagata Iopa uma lava.
8. A ‘ua logo ‘iā te ia ‘ua loto fo‘i o tagata Iamenia e fa‘asauā fa‘apea i tagata Iutaia sa nonofo i lo latou ‘a‘ai.
9. ‘Ona oso fo‘i lea o ia i le po i tagata Iamenia ma ‘ua na susunuina le taulaga ma va‘a ‘ua i ai; sa iloa atu ai le mumū o le afi i Ierusalema, e tolu sefulu maila lo la vāvāmamao ma Iamenia.
10. ‘Ona latou ō lea, pe ‘ua tusa ma le maila la latou sāvavali e sagai atu ai e tau ma Timoteo, ‘ona feosofi lea ‘iā te i latou o tagata Arapi, e tusa ma le lima afe o fitafita ma le lima selau o tagata e ti‘eti‘e i solofanua.
11. ‘Ua velavela le tau‘a, a ‘ua i‘u manuia i le fesoasoani mai a le Atua, a o ē sa totoe o tagata Arapi ‘ua faia‘ina, ‘ua latou tagi atu ‘iā Iuta ‘ina ‘ia tu‘uina mai lona lima taumatau, o folafola atu ‘iā te i latou te tu‘u atua o vao e fafaga ai manu, latou te fesoasoani atu fo‘i ‘iā te ia i ni isi ala.
12. A o Iuta ‘ua manatu ifo, e moni, e aogā i latou i mea e tele, ‘ona ia folafola atu ai lea o le a fa‘alelei; ‘ua lūlū o latou lima, ‘ona latou ta‘alolo atu lea i o latou fale ‘ie.
13. ‘Ua oso fo‘i o ia i le tasi ‘a‘ai nofo ‘olo, ‘ua si‘omia i pavali ma puipui fa‘aalalaupapa, sa nofoia e le vao o tagata mai nu‘u ‘ese‘ese, o Kasepi lona igoa.
14. A o tagata ‘ua i le ‘a‘ai, ‘ua fa‘alagolago i le malosi o pavali ma le tele o a latou mea e ‘ai, ‘ua fa‘alēmafaufau i latou, o lafo ni ‘upu taufetu‘u ‘iā Iuta ma ni ‘upu fāifai ma ni ‘upu ‘ua sa ‘ona tautala ai.
15. A o Iuta ‘ua vala‘au atu i le suafa o le Ali‘i sili o le lalolagi, lē na lepetia ai o Ieriko, i ona po o Iosua, e aunoa ma ni la‘au tu‘ipavali po o ni mea e fana a‘i; ‘ona oso lea o ia ma le malosi i le pavali.
16. ‘Ua maua le ‘a‘ai, ‘ona o le finagalo o le Ali‘i ma ‘ua lē mafaitaulia le to‘atele o ē na fasia ai; o le vailepa ‘ua lata ane i le ‘a‘ai, e tusa ma le kuata maila lona lautele, ‘ua mata lava ‘ua tumu i le toto o ē fasia na tafe i ai.
17. ‘Ona latou sāvavali ai lea e tusa ma le iva sefulu lima maila; ‘ua o‘o atu ai i Karaka, o le mea e mau ai o tagata Iutaia ‘ua ta‘ua o Tupiu;
18. ‘ae ‘ua latou lē maua lava o Timoteo i lea mea; auā na taliu ai lana ‘au, ‘ona ‘ua lē mafai sa latou mea, a ‘ua tu‘ua le leoleoga malosi i le tasi ‘olo.
19. A o ta‘ita‘i ‘au e to‘alua o le ‘au a Makapaio, o Tositeu ma Sosipatera, ‘ua la faia le oso i lenā ‘olo ma ‘ua fasia ai o ē na tu‘uina i ai e Timoteo, o fitafita e tasi le mano.
20. A o Makapaio ‘ua na fa‘apotopoto lana ‘au, o fitafita e ono afe ma tu‘u fa‘avasega, ‘ona alu lea e tau ma Timoteo, ‘ua ‘iā te ia o fitafita sāvavali e selau afe ma le lua sefulu o afe, ‘atoa ma le lua afe ma le lima selau o ē ti‘eti‘e i solofanua.
21. A ‘ua logo ‘iā Timoteo ‘ua lata mai o Iuta, ‘ona ia momoli atu lea o fafine ma tamaiti ma a latou meaafale i le ‘olo ‘ua igoa ‘iā Karenaimo, auā o le ‘olo matuā malosi lea ma le mauagatā ‘ona o le vāapiapi o ala e tau atu i lea mea.
22. A ‘ua aliali mai le vaega ‘au muamua a Iuta, ‘ona mata‘utuia lea o le fili, auā ‘ua tu mai ai le Atua na te silasila i mea uma lava ma ‘ua tutulia i latou, o le tasi e le tasi; ‘ua o‘o ‘ina lafoia i latou e o latou lava tagata ma ‘ua fasia lava i latou i le tuia ‘iā latou lava pelu.
23. A o Iuta ‘ua tuliloa ‘iā te i latou ma le filigā, o fa‘asala i tagata amio leaga lava ia ma ‘ua na fasia le tolugafulu o afe o i latou.
24. A o Timoteo fo‘i ia ‘ua pu‘eolaina e le ‘au a Tositeu ma Sosipatera, ‘ua tagi atu lava i ai ma le matuā ‘ai‘oi atu ‘ia tu‘uina ia e alu ma le saogalemū, auā ‘ua i lana pule o mātua ma uso o ni isi e to‘atele o tagata Iutaia, o le a pagātia lava i latou pe ‘āfai e oti o ia.
25. Ma ‘ua tautō lava ia na te toe fa‘afoisia i latou e tusa ma la latou feagaiga; ‘ona latou tu‘uina lea o ia e alu ma le saogalemū, ‘ona o le fia fa‘aola i o latou uso.
26. A o Iuta ‘ua alu atu i Karenaimo ma ‘ua na fasia ai le luafulu ma le lima afe o tagata.
27. ‘Ua uma ‘ona tulia ma fasia i latou, ‘ona ia ta‘ita‘i ai lea lana itūtau‘a i Eferona, o le ‘a‘ai nofo ‘olo sa mau ai le vao tagata o nu‘u ‘ese‘ese; sa tutū fo‘i o taulele‘a malolosi i luma o pavali ma puipui o le ‘olo ma le loto tele; sa i ai fo‘i i le ‘a‘ai o mea e fana a‘i e tele lava, ma ni u e tele.
28. A ‘ua vala‘au atu o Iuta i le Silisili‘ese, na te nutilili‘i le malosi o le fili i lona lava mana, ‘ona latou maua ai lea le ‘a‘ai ma ‘ua latou fasia le luafulu ma le lima afe o tagata sa i ai.
29. ‘Ona latou ō lea i le ‘a‘ai o tagata Sekutopoli, e tusa ma le fitu sefulu lima maila lona mamao ma Ierusalema.
30. A ‘ua molimau tagata Iutaia na i le ‘a‘ai, ‘ua agalelei tagata Sekutopoli ‘iā te i latou ma agaalofa fo‘i ‘iā te i latou i aso o latou puapuagā;
31. ‘ona fa‘afetai atu lea e Iuta ‘iā te i latou, o apoapoa‘i atu ‘ia tumau pea lo latou agalelei i le fānau a Isaraelu, ‘ona latou fo‘i atu ai lea i Ierusalema ‘ina ‘ua lata le aso mamalu o vaisapati.
32. ‘Ua mavae atu aso o le Penetekoso, ‘ona latou ō atu lea e tau ma Korekia, o le kovana o Itumaia.
33. A o ia ‘ua fa‘afetaia‘i ‘iā te i latou, o ‘iā te ia o fitafita sāvavali e tolu afe ma le fa selau o ē ti‘eti‘e i solofanua.
34. ‘Ua tau le tau‘a, ‘ona mao fasia lea o ni isi e to‘aitiiti o tagata Iutaia.
35. A o Tositeu, o le tasi fitafita e ti‘eti‘e i solofanua o le ‘au a Pakeno, o le tagata loto tele, ‘ua na pu‘e ‘iā Korekia; sa loto fo‘i ‘ia pu‘eolaina, a ‘ua oso ‘iā te ia le tasi fitafita e ti‘eti‘e i solofanua o le ‘au a Tarake ma ‘ua na vavae ‘ese lona tau‘au, ‘ona sola ai lea o Korekia i Marisa.
36. A ‘ua leva ‘ona tau le tau‘a e le ‘au sa fa‘atasi ma Eseti, ‘ua tauāu ‘ina vaivai, ‘ona vala‘au atu lea o Iuta i le Ali‘i e fai o ia mo latou fesoasoani mo latou ta‘ita‘i i le tau‘a.
37. ‘Ona usu ai lea lana ‘alaga tau ma ni pese i le gagana a ona tua‘ā, ‘ua oso o ia i fitafita a Korekia ma lafoia la latou ‘au.
38. A ‘ua fa‘apotopoto e Iuta lana itūtau‘a ma ‘ua latou ō atu i le ‘a‘ai o Atulama ma ‘ua o‘o i lona fitu o aso, ‘ua uma fo‘i ‘ona fa‘amamāina i latou e tusa ma le masani, ‘ona latou fa‘amamalu lea i le sapati i lea mea.
39. ‘Ua o‘o i le taeao, ‘ona alu atu lea o Iuta mōna tagata e ‘ave tino o ē na fasia, ‘ina ‘ia tu‘uina i latou fa‘atasi ma o latou ‘āiga i tu‘ugamau o o latou tamā.
40. A ‘ua latou maua i ‘ofu o ē na fasia o mea na momoli i tupua ‘ua i Iamenia, o mea lava ‘ua vaosia i tagata Iutaia e le tulafono; ‘ona malamalama ai lea i tagata uma o le mea lava lea na fasia ai i latou.
41. O lea ‘ua latou vivi‘i atu ai i le fa‘amasinoga tonu a le Ali‘i, na ia fa‘aalia o mea sa lilo.
42. ‘Ona latou fa‘asaga atu ai lea i le tatalo, o ole atu i le Atua ‘ia fa‘amāgaloina e ia le agasala na faia. A o Iuta, le tagata matuā loto tele, ‘ua ia apoapoa‘i atu i le nu‘u, ‘ia latou ‘alo ‘ese ma le agasala, auā ‘ua tepa ifo o latou mata i mea na faia ‘ona o agasala a ē na fasia.
43. ‘Ua na faia fo‘i se aotelega ma ‘ua ‘auina atu i Ierusalema pe lua afe tupe ario, e fai ai se taulaga mo agasala, auā o lona manatu tonu ma le pa‘ia i le toetū a‘e.
44. Auā ana le fa‘amoemoe o ia e toe tutū a‘e i latou ia na fasia, po o se mea ‘ua fai fua lava ma le valea, le tatalo mo tagata ‘ua oti.
45. ‘Āfai fo‘i ‘ua manatu o ia e teuina le taui matagofie mo ē ‘ua momoe i le amio Atua, o le manatu pa‘ia lea ma le aogā.
46. O le mea lea na ia fa‘atonu ai lenei taulaga mo agasala a ē na oti, ‘ina ‘ia lavea‘iina ‘iā latou agasala.