1. A o Lusia, o le fa‘atamā o le tupu, o le tagata tonu fo‘i o lona ‘āiga, sa ia tausia le mālō, ‘ua matuā tigā lona loto i mea na tutupu; ‘ua mavae atu ni nai aso,
2. ‘ona ia fa‘apotopoto ai lea le valugafulu o afe o fitafita ma le ‘au ‘ato‘atoa o ē ti‘eti‘e i solofanua ma ‘ua oso mai i tagata Iutaia ma lona manatu o le a maua e ia le ‘a‘ai, na te faia ma nofoaga o tagata nu‘u ‘ese;
3. na te faia fo‘i le malumalu ma alātupe mo ia, e pei o isi lava malumalu o nu‘u ‘ese; na te fa‘atau fo‘i i tupe i tausaga ta‘itasi uma le tofiga o ositaulaga.
4. ‘Ua leai lava sona manatu i le mana o le Atua, a ‘ua matuā fefete lona loto i le to‘atele o lana ‘au e sāvavali, mōna tagata e afe ma afe e ti‘eti‘e i solofanua, māna elefane e valugafulu.
5. ‘Ua ulu mai o ia i le ‘ele‘ele o Iuta, ‘ua fa‘alatalata mai i le ‘a‘ai o Petesura, ‘ua lē ‘atoa le maila e tasi lona mamao ma Ierusalema ma ‘ua na fai le oso i lenā ‘olo.
6. A ‘ua iloa e Iuta ma ē sa fa‘atasi ma ia o lo‘o fai le oso i ‘olo, ‘ona latou tagi atu lea i le Ali‘i ma loimata ma le tagi auē, fa‘atasi lava ma le motu ‘atoa o tagata, ‘ina ‘ia ‘auina mai lana agelu lelei na te lavea‘i ‘iā Isaraelu.
7. A ‘ua muamua o Makapaio ‘ona tago i lona ‘au‘upega ma ‘ua apoapoa‘i atu i ni isi uma ‘iā latou fa‘atasi ma ia i le fa‘afeagai ma le mea faigatā ma le fesoasoani atu i o latou uso.
8. A ‘ua ō atu fa‘atasi i latou ma le loto filigā, ‘ona aliali lea i Ierusalema i o latou luma le tasi fitafita ‘ua ti‘eti‘e i le solofanua, ‘ua ‘ofu o ia i le ‘ofu sinasina ma le ‘ofu tau auro, o luelue lana tao.
9. ‘Ona latou fa‘amanū uma lea ma le lotogatasi i le Ali‘i agaalofa ma ‘ua fa‘amalosia o latou loto, ‘ua latou nofo sauni ai e tau ma tagata ‘atoa lava ma manu fe‘ai, po o le lepeti fo‘i o pavali u‘amea.
10. O lenei sa latou sāvavali ma le filigā, ‘ona ‘ua latou maua le fesoasoani mai le lagi ma ‘ua alofa le Ali‘i ‘iā te i latou.
11. E pei o ni leona, na latou feosofi ma le malosi i le fili ma ‘ua latou fasia ai o fitafita sāvavali e sefulu ma le tasi o afe ma fitafita e ti‘eti‘e i solofanua e afe ma le ono selau;
12. ma ‘ua latou tulia le ‘au uma lava, a o ni isi e to‘atele na manunu‘a ‘ua sōsōla ma lafoa‘i o latou ‘au‘upega; a o Lusia fo‘i ia ‘ua sao ‘ona ‘ua sola o ia ma le māsiasi.
13. A ‘ua lē aunoa o ia ma le mafaufau lelei, o lea ‘ua manatu ai i le faia‘ina o ia, ‘ua lagona ifo e lē mafai ‘ona fa‘ato‘ilaloina o tagata Eperu ‘ua fa‘alagolago i le fesoasoani mai a le Atua e ona le mana uma ma ‘ua ‘auina atu ana savali ‘iā i latou;
14. ma ‘ua folafola atu o le a talia e ia matā‘upu uma ‘ua tusa ma tatau ‘ona talia, na te u‘una‘i atu fo‘i i le tupu ‘ia faia lava o ia ma uō iā i latou.
15. ‘Ua talia fo‘i e Iuta talosaga a Lusia, o fa‘atatau i mea e lelei mo le nu‘u ‘atoa; a o mea uma fo‘i sa tusia e Makapaio ‘iā Lusia e uiga i tagata Iutaia, ‘ua ioe lava i ai le tupu.
16. Auā na tusia e Lusia lana tusi i tagata Iutaia, ‘ua fa‘apea mai:“O Lusia e alofa atu i le nu‘u o tagata Iutaia.
17. O Ioane ma Apisaloma, na ‘auina mai e ‘outou, na la tu‘u mai la ‘outou tusi, o tagi mai ‘ia ‘ou talia o matā‘upu o lo‘o fa‘amauina ai.
18. O mea uma sa mafai ‘ona fa‘ataunu‘u atu i le tupu, na fa‘ao‘o atu lava i ai ma ‘ua ioe o ia i mea uma ‘ua mafai ‘ona talia.
19. ‘Āfai la o le a fa‘amaoni pea ‘outou i lea feagaiga, o le a ‘ou taumafai fo‘i ‘ona ‘ou galue pea ‘ina ‘ia ‘outou manuia ai.
20. A o ni isi fo‘i matā‘upu na ‘ou fa‘atonuina ta‘itasi lava ‘iā te i lā‘ua na, e fa‘apea fo‘i i a‘u sāvali, ‘ina ‘ia latou talatala ai ma ‘outou.
21. ‘Ia soifua ‘outou! O le tausaga e tasi le selau ma le fagafulu ma le valu, i le aso luafulu ma le fa o le masina o Tiosekuru.”
22. A o le tusi a le tupu ‘ua i ai o ‘upu nei:“O le tupu o Atioko ‘ua alofa atu i lona uso o Lusia.
23. O lenei ‘ua faiilagi le folauga a lo matou tamā; a o lo matou loto, ‘ia fa‘asaga atu o tagata o lo matou mālō ‘iā latou lava fe‘au e aunoa ma se fa‘alavelave.
24. A ‘ua matou fa‘alogo ‘ua mumusu o tagata Iutaia e ‘ana‘ana i lo‘u tamā i le tali ai le aganu‘u fa‘a-Eleni, ‘ae ‘ua latou fia tāofi pea ‘iā latou lava masaniga ma ‘ua latou tagi mai ai ‘ia fa‘amaonia e i matou a latou lava tulafono.
25. ‘Ua matou loto ‘ia filemū fo‘i ma lenā nu‘u, o lea ‘ua matou faia ai le i‘uga ma le poloa‘i, ‘ia toe fa‘afoisia ‘iā te i latou lo latou malumalu ma ‘ia latou tausia ai pea o sauniga a o latou tua‘ā.
26. E lelei la pe a e ‘auina atu ni sāvali ‘iā te i latou ma tu‘u atu ‘iā te i latou lou lima taumatau ‘ina ‘ia latou iloa ai lo matou loto ma ‘ia latou loto malosi ai ma fa‘asaga atu ‘iā latou lava fe‘au ta‘ito‘atasi.”
27. A o le tusi lenei a le tupu i tagata Iutaia:“O le tupu o Atioko ‘ua alofa atu i le ‘au toeaina o tagata Iutaia, ‘atoa ma tagata Iutaia uma.
28. ‘Āfai ‘ua mālōlōina ‘outou, ‘ua fiafia ai lava o lo matou loto; a o matou fo‘i ‘ua mālōlō lelei.
29. ‘Ua sau Menelao ‘iā te i matou, o fa‘aali mai lo ‘outou mana‘o, ‘ia toe malaga mai ‘outou i o ‘outou tagata o lo‘o ‘iā te i matou.
30. O lea, ‘ua matou fa‘atonu atu ‘ia ‘aua le fa‘alavelavea o i latou uma e malaga mai, e o‘o i le aso tolusefulu o le masina o Sanetiku.
31. ‘Ia mafai lava i tagata Iutaia ‘ona fai o a latou mea e ‘ai ma a latou sauniga, e pei lava ‘ona fai i aso ‘ua mavae atu, ‘aua fo‘i le fa‘alavelavea se tasi o i latou ‘ona o mea na latou mua‘i faia ma le lē iloa.
32. ‘Ua matou ‘auina atu fo‘i o Menelao na te talatala fa‘atasi ma ‘outou.
33. ‘Ia soifua ‘outou! O le tausaga e tasi le selau ma le fagafulu ma le valu, i le aso sefulu ma le lima o le masina o Sanetiku.”
34. Na ‘auina mai fo‘i ma le tusi a tagata Roma ‘ua fa‘apea mai:“O Koinetu Memiu ma Tito Maniu, o sāvali a tagata Roma, ‘ua la alolofa atu i le nu‘u o tagata Iutaia.
35. O mea na tu‘u atu ‘iā te ‘outou e Lusia, le uso o le tupu, ‘ua matou tu‘u atua fo‘i.
36. A o matā‘upu na tonu ai ‘iā te ia e fa‘ao‘o atu i le tupu, ‘ia ‘outou filifili lava i ai ma le filigā ma ‘ia ‘outou ‘auina mai ai sa ‘outou sāvali, se‘i matou fai ai se tonu e tusa ma le mea e aogā ‘iā te ‘outou, auā o le a malaga atu i mā‘ua i Anetioka.
37. O lea, ‘ia ‘outou tusi fa‘avave mai, ‘ina ‘ia iloa tino e i mā‘ua le mea tou te loto i ai.
38. ‘Ia soifua lelei lava ‘outou! O le tausaga e tasi le selau ma le fagafulu ma le valu, i le aso sefulu ma le lima o le masina o Sanetiku.”