1. ‘Ua mavae atu ni nai aso, ‘ona ‘auina mai lea e le tupu le tasi toeaina mai Anetioka, na te u‘una‘i atu i tagata Iutaia ‘ia tu‘ulafoa‘i e i latou o tulafono a o latou tua‘ā ma tulafono a le Atua;
2. ‘ina ‘ia fa‘a‘ele‘elea fo‘i e ia le malumalu ‘ua i Ierusalema ma fa‘aigoa ia malumalu o Seu Olumepu, fa‘apea fo‘i le malumalu o i Keresema, ‘ia fa‘aigoa ia Seu Talimālō, o fa‘atatau i le aga a tagata o nu‘u ia e lua.
3. O se mea matuā leaga ma le fa‘atigā i tagata uma o lenā oso mai o mala;
4. auā sa tumu le malumalu i tupe ‘ele‘elea ma faigā‘ai a tagata nu‘u ‘ese, ‘atoa ma i latou sa fa‘atasi ma fafine talitane; sa oso fua fo‘i o fafine i le mea pa‘ia ma avatu i ai o mea ‘ua vaosia.
5. Sa tumu fo‘i le fatafaitaulaga i mea ‘ele‘elea, ‘ua vaosia i le tulafono.
6. Sa lē tausia fo‘i o sapati, sa lē ta‘utino fo‘i e se to‘atasi o ia o le tagata Iutaia.
7. O le fa‘amalosi sa ta‘ita‘iina ai i latou ma le loto musuā i taulaga i le aso fānau o le tupu; o aso fo‘i sa fa‘amamaluina ai le tupua o Taionuso, ‘ua fa‘amalosia ai i latou e feoa‘i solo o fa‘apaleina i ni laula‘au.
8. O le fa‘aoso fo‘i a Tulomaio na alu ai le poloa‘iga i ‘a‘ai o tagata nu‘u ‘ese ‘ua felāta‘i, ‘ina ‘ia fa‘apea fo‘i ‘ona latou fa‘asauā i tagata Iutaia, ma u‘una‘i ‘iā i latou ‘ia fai taulaga;
9. a ‘ia fasiotia i latou sa mumusu ‘ona talia o tulafono a nu‘u ‘ese. Sa tino mai lava le puapuagātia o tagata,
10. auā na molia mai o fafine e to‘alua ‘ona ‘ua la peritomeina o a la tama; ‘ua ta‘ita‘iina i lā‘ua i le ‘a‘ai i luma o tagata, o tautau o a lā‘ua tamaiti i susu, ‘ona fa‘atitō ifo lea ‘iā te i lā‘ua nai le pavali.
11. A o ni isi na ō atu i ana e felāta‘i ma o latou ‘a‘ai, ‘ina ‘ia fa‘amamalu fa‘ananā ai i le aso sapati, na molia i latou ‘iā Filipo, ‘ona susunuina lea i latou i le afi, auā sa fefefe ‘ona tagolima e fesoasoani i latou ‘iā te i latou, ‘ona o le pa‘ia o le aso ma le tulafono.
12. ‘Ae ‘ou te tagi atu ‘iā te i latou uma o le a faitau i lenei tusi, ‘aua ne‘i latou tausuai ‘ona o puapuagā lava ia, ‘ae ‘ia latou tāofi ifo o mea na tutupu, o mea lava e a‘oa‘oina a‘i o lo tatou nu‘u, ‘ae lē o mea e fa‘aumatia a‘i.
13. Auā o le fa‘ailoga lea o le agaalofa tele, pe a le tu‘utu‘u i aso e tele o tagata agasala e fai mea ‘ua latou loto i ai, a ‘ua lavea loa i latou i le fa‘asalaga,
14. auā o nu‘u ‘ese e fa‘atalitali ai le Ali‘i ma le ‘onosa‘i ‘ina ‘ia fa‘asala atu ‘iā te i latou pe a fa‘atumuina le fua o a latou agasala.
15. ‘Ae lē fa‘apea ‘ona fai e ia ‘iā i tatou, e lē fia tolo atu le fa‘asalaga o i tatou se‘ia o‘otia le tapula‘a o a tatou agasala.
16. O le mea fo‘i lea na te lē ‘ave‘esea lava lona agaalofa ‘iā te i tatou; ‘ae ‘ua fa‘asala i lona nu‘u i ni puapuagā ma ‘ua lē tu‘ulafoa‘i lava ‘iā te i latou.
17. Tau ‘ina ta‘u atu mea ia i ni nai ‘upu, e lapata‘i atu ai i ē faitau i lenei tusi; a ‘ia toe amataina loa le sologa o le tala.
18. O lenei, sa latou u‘una‘i ‘iā Eleasaro, o le tasi ia o ta‘imua o le ‘au tusi‘upu, o le tagata ‘ua leva ona tausaga ma le mata mamalu lava, ‘ina ‘ia ‘ai le ‘a‘ano o le pua‘a, sa fafao fa‘amalosi i lona gutu.
19. ‘Ae ‘ua fa‘asili e ia le oti ma le mamalu tele i se ola ‘ua tusa i ai le ‘ino‘ino; o lea sa mua o ia i le savali i le oti ma le loto malie.
20. ‘Ua mātau e ia o mea o le a tigāina ai ma ‘ua na talia ma le ‘onosa‘i; o tonu i lona loto na te lē faia se mea ‘ua vaosia ‘ona o le naunau i le ola.
21. A o ē sa tutū ai, ‘ua o‘otia o latou loto i le alofavalea ‘ona o la latou fa‘auō ma ia i tausaga e tele; na latou fa‘alatalata atu fa‘ananā ‘iā te ia, ma tagi atu ‘ia ‘aumaia o le ‘a‘ano ‘ua taga ‘iā te ia ‘ona ‘ai ai, ‘ina ‘ia fa‘atagā ‘ai i ‘a‘ano o le taulaga, e tusa ma le poloa‘iga a le tupu,
22. ‘ona lavea‘iina ai lea o ia a‘i le oti; sa fa‘apea ‘ona agaalofa i latou ‘iā te ia ‘ona o la latou fa‘auō i tausaga e tele.
23. A o ia, ‘ua sagai lona manatu i le mamalu tele ‘ua ala mai i le tele o ona tausaga ma lona ulusinā ‘ua fa‘apaleina ai ona mata fa‘atamaali‘i, ‘atoa ma lona matuā amiotonu talu mai i lona itiiti; ma ‘ua ia tali atu loa, e tusa ma le poloa‘iga a le tulafono pa‘ia na faia e le Atua, o fai atu: ‘ua loto ‘ia vave ‘auina ifo o ia i le tu‘ugamau.
24. “Auā,” fai mai a ia, “E lē tusa le fa‘a‘ole‘ole ma i matou toeaina, ‘ona o le to‘atele o taulele‘a o le a tāofi ifo i latou o Eleasaro, ‘ua ivasefulu ona tausaga, ‘ua ia fa‘asaga atu i tulafono a nu‘u ‘ese;
25. ‘ona fa‘asesēina ai lea i latou, auā o la‘u fa‘a‘ole‘ole, ‘ona o ni nai aso o le ola ‘augavale; ‘ona ‘ou aogā ai lea i le ta‘uleagaina ma le fāifaia o o‘u tausaga mulimuli.
26. Auā, tigā ‘ona lavea‘iina o a‘u i le fa‘asauā a tagata i aso nei, ‘ae ‘ou te lē ‘alo ‘ese lava, i lo‘u ola po o lo‘u oti, i le ‘a‘ao o lē ona le mana uma.
27. O le mea lea ‘ou te fa‘amāvae ai ma lenei olaga ma le loto malosi, ‘ona latou iloa ai lea ‘ua ‘ou fa‘amamalu i le tele o o‘u tausaga.
28. ‘Ou te tu‘u atu ai fo‘i i taulele‘a o se fa‘aa‘oa‘o o le fa‘amalosi, pe ‘āfai ‘ua ‘ou talia fa‘alelei le oti ma le loto malie ma le loto malosi ‘ona o tulafono ‘ua sili le mamafa ma le pa‘ia.”‘Ua uma o ‘upu ia, ‘ona ta‘ita‘iina ai lea i le mea e fa‘asauāina ai o ia.
29. A o i latou sa ta‘ita‘i ‘iā te ia, o ē sa agaalofa analeilā ‘iā te ia, ‘ua liliu nei o latou loto i le ita, ‘ona o ‘upu na faia e ia, fa te i latou o lona fa‘asausili na fa‘apea ‘ona tautala ai.
30. A ‘ua o‘o ‘ina tali oti i le sasaga, ‘ona mapuitigā lea ma ‘ua fai ane, “Le Ali‘i e, e ou le poto pa‘ia, ‘ua e silafia tonu sa mafai lava ‘iā te a‘u ‘ona ‘alo ‘ese i le oti, ‘ae peita‘i ‘ua ‘ou talia nei o puapuagā ‘ua mamafa lava i lo‘u tino; a o lo‘u agaga ‘ua ‘ou talia ai ma le fiafia o nei puapuagā ‘ona o le mata‘u i lau afioga.”
31. Ma ‘ua fa‘apea lava ‘ona fa‘amavae o ia ma le ola, o tu‘u mai i taulele‘a, e fa‘apea fo‘i i le nu‘u ‘ato‘atoa, le manatu i lona oti e fai ma fa‘aa‘oa‘o o le amiotonu ma le loto malosi.