1. A o Iuta Makapaio ma i latou sa fa‘atasi ma ia, sa ulu atu fa‘ananā i ai o Iuta; sa latou vala‘au i o latou ‘āiga ma a latou uō, sa fa‘apotopoto fo‘i o ē sa fa‘amaoni i le lotu a Mose ma ‘ua latou fa‘atasia ai o tagata tau e ono afe.
2. Sa latou ‘ai‘oi atu fo‘i i le Ali‘i ‘ina ‘ia silasila ifo i lona nu‘u ‘ua solipalaina e tagata uma; ‘ia alofa fo‘i i lona malumalu ‘ua fa‘aleagaina e tagata e lē mata‘u i le Atua.
3. ‘Ia alofa fo‘i o ia i le ‘a‘ai ‘ua fa‘atafunaina, toetoe a fa‘alaugatasia ma le fogā‘ele‘ele ma ‘ia fa‘afofoga i le leo o le toto ‘ua ‘alaga atu ‘iā te ia.
4. ‘Ia manatua fo‘i o le agasala leaga o le fasiga o tamaiti ‘ua lē nofosala, ‘atoa ma ipu leaga ‘ua fāifaia ai lona suafa ma ‘ia fa‘aali lona to‘atama‘i i mea uma ia.
5. A o Makapaio ‘ua na fa‘apotopoto lana vaega ‘au e to‘atele lava ma ‘ua lē toe mafai i nu‘u ‘ese ‘ona tete‘e atu ‘iā te ia; auā ‘ua liliu i le agaalofa le to‘asā o le Atua.
6. Sa oso fa‘afuase‘i o ia i ‘a‘ai ma ‘olo ma ‘ua na susunuina, sa api o ia i tulaga lelei ma ‘ua lafoia so‘o e ia o ‘au a le fili.
7. ‘Ae maise lava o le po sa ia oso so‘o ai fa‘apea, ma ‘ua o‘o ‘ina logo i nu‘u uma lava le tala i lona malosi.
8. A ‘ua iloa e Filipo le alualu i luma o lenā tagata, ‘ua tupu atili pea lava ‘ona mālō so‘o o ia, ‘ona ia tusi atu lea ‘iā Tulomaio, le ta‘ita‘i o Koile-Suria ma Foinie, o tagi atu ‘ia fesoasoani mai ia i le mālō o le tupu.
9. ‘Ua ‘auina mai loa e Tulomaio o Nikanora, le atali‘i o Patarakelu, o le tasi o uō sili a le tupu; ‘ua tu‘u atu ‘iā te ia o tagata tau pe itiiti le luasefulu o afe; mai nu‘u ‘ese‘ese, ‘ina ‘ia fa‘aumatia e ia le nu‘u ‘atoa o Iuta, ma ‘ua na tofia fa‘atasi ma ia o Korekia, o le ta‘ita‘i ‘au poto ma le masani tele i mea a le tau‘a.
10. A ‘ua tonu ‘iā Nikanora na te tu‘u atu lava i le tupu o taleni e lua afe, e maua mai i le fa‘atau fa‘apologa o tagata Iutaia, e totogi a‘i lana lafoga i tagata Roma.
11. ‘Ua ‘auina atu loa ana savali i ‘a‘ai tumatafaga, o vala‘au mai ‘iā i latou i le fa‘atau o pologa Iutaia, o folafola atu latou te maua o pologa e to‘aivagafulu i le taleni e tasi; a ‘ua lē mātau e ia o le a taia lava ia e lē e ona le mana uma, na te taui ma sui ‘iā te ia.
12. A ‘ua iloa e Iuta le sau o Nikanora, ‘ona fa‘ailoa atu lea i tagata Iutaia sa fa‘atasi ma ia.
13. O ni isi o i latou ‘ua fefefe ma ‘ua lē fa‘alagolago i le fa‘amasinoga tonu a le Atua, ‘ona sōsōla lea i latou.
14. A o ni isi ‘ua latou fa‘atau atu o nai mea sa totoe ‘iā te i latou ma ‘ua latou ‘ai‘oi atu fo‘i i le Ali‘i ‘ia lavea‘iina i latou a‘i le amio leaga a Nikanora, ‘ua na fa‘atauina i latou a o le‘i tau lava ma i latou.
15. ‘Āfai fo‘i e lē lavea‘iina mai ‘ona o i latou lava, ‘ae se‘i lavea‘iina ‘ona o le feagaiga ‘ua osia ma o latou tamā, ‘ona o le vala‘auina fo‘i i luga o i latou o lona suafa pa‘ia ma le mamalu.
16. A ‘ua fa‘apotopotoina e Makapaio le fitu afe o tagata sa fa‘atasi ma ia, ‘ona fai atu lea ‘iā te i latou: ‘Ia ‘aua lava le fa‘alelei ma le fili, ‘aua fo‘i le mata‘u i le to‘atele o fili ‘ua fa‘asagatau ‘iā te i latou ma le loto leaga, a ‘ia latou tete‘e atu i ai ma le loto tele,
17. o sagai o latou manatu i le fa‘aleaga na fa‘ao‘o, ma le lē tatau lava, i le mea pa‘ia e i latou ia ma le fa‘aleagaina o le ‘a‘ai, ‘ua ‘avea ma tauemuga, ‘atoa fo‘i ma le lepetia o tulafono a o latou tua‘ā.
18. Auā ‘ua fa‘apea lana ‘upu, “O i latou ia ‘ua fa‘alagolago i lo latou ‘au‘upega ‘atoa ma lo latou malosi;” “a o i tatou ‘ua fa‘alagolago i le Ali‘i e ona le mana uma, ‘ua mafai ‘iā te ia, i le ‘emo o le mata, ‘ona ia fa‘aumatia i latou ‘ua oso mai ‘iā te i tatou i le tau‘a, fa‘apea fo‘i ma le lalolagi uma.”
19. ‘Ua fa‘amanatu fo‘i ‘iā te i latou i le fesoasoani mai a le Atua na fa‘ao‘o mai i o latou tua‘ā, na fa‘aumatia ai o tagata o le ‘au a Sanerivi, e selau valusefulu ma le lima o afe;
20. ma le tau‘a na latou tau i Papelonia ma tagata Kalatia; ‘ua fai le oso, ‘ona fa‘alotolotolua lea o tagata Maketonia, o latou fesoasoani; ‘ua na o i latou lava, ‘ua na o le ono afe, a ‘ua latou fasia le selau luasefulu o afe, ‘ona o le fesoasoani mai lugā na tu‘uina mai ‘iā te i latou ma ‘ua latou maua mai ai o mea alofa e tele lava.
21. O ‘upu ia ‘ua fa‘amausalīina ai o latou loto ma ‘ua nofo sauni ai i latou e oti mo lo latou nu‘u.
22. ‘Ona tofia lea e ia ona uso, o Simona ma Iosefa ma Ionatana, latou te ta‘ita‘i i ‘au ta‘itasi ma ‘ua tu‘uina atu ‘iā te i latou ta‘ito‘atasi o tagata e tasi le afe ma le lima selau.
23. ‘Ua uma fo‘i ‘ona faitau e Esera ‘iā te i latou i le tusi pa‘ia ma ‘ua tu‘u atu ‘iā te i latou le ‘alagataua: “O le Fesoasoani a le Atua,” ‘ona oso loa lea le ta‘ita‘i lava ia ma le ‘au muamua e tau ma Nikanora.
24. Ma ‘ua ‘avea o lē ona le mana uma ma o latou fesoasoani, ‘ua latou fasia ai o tagata pe itiiti le iva o afe; a o le vaega tele o le itūtau‘a a Nikanora ‘ua vaivai i o latou manu‘a, ‘ua tulia i latou ma ‘ua sōsōla.
25. ‘Ua latou ‘ave fo‘i mā latou o tupe a ē na ō mai e fa‘atau ‘iā i latou ma ‘ua latou tuliloaina le fili.
26. A ‘ua toe fo‘i mai i latou ‘ona ‘ua pu‘upu‘u le itūlā, auā o le aso e muamua i le sapati lea: o le mea lea na latou le saga fai pea le tuliga.
27. ‘Ona latou fa‘aputu ai lea o latou ‘au‘upega ma la latou vete ma ‘ua latou fa‘amamalu i le sapati, o vivi‘i atu i le Atua ‘ua na lavea‘iina i latou i lea aso, o liligi ai ‘iā te i latou le fua muamua o lona agaalofa.
28. A ‘ua mavae atu le sapati, ‘ona latou tufatufa ai lea le vetega i tagata vaivai ma ē mātua oti ma fafine ‘ua oti a latou tane; a o mea na totoe ai na fai mā latou ma o latou ‘āiga.
29. ‘Ua māe‘a o mea ia, ‘ona latou sagai fa‘atasi ai lea i le talosaga, o fa‘atoga atu i le Ali‘i agaalofa, ‘ia toe fa‘alelei ‘ato‘atoa o ia ma ana ‘au‘auna.
30. Ma ‘ua latou fasia o tagata e itiiti le luasefulu o afe o ē sa tau le tau‘a ma i latou fa‘atasi ma Timoteo ma Pakite ma ‘ua latou mauaina ‘olo maualuluga ma ‘ua latou maua le vete matuā tele ma ‘ua latou vaeluaina tutusa, o le vaega mo i latou lava ma le tasi mo tagata vaivai ma ē mātua oti ma fafine ‘ua oti a latou tane, ‘atoa fo‘i ma toeaina.
31. Ma ‘ua latou fa‘aputu ma le filigā o latou ‘au‘upega ma ‘ua latou teuina i ni tulaga tatau; a o mea e totoe o le vete ‘ua latou ‘ave i Ierusalema.
32. Ma ‘ua latou fasioti i le ta‘ita‘i ‘au sa fa‘atasi o ia ma Timoteo, o le tagata amio leaga lava sa na fa‘ataugā i tagata Iutaia i mea e tele.
33. A o aso sa faia ai i Ierusalema o fiafia o le manumālō, ‘ua latou maua ai o Kalisene, o ia lea ‘ua na susunuina faitoto‘a o le malumalu, sa lafi o ia i se fale, ‘ona latou susunuina ai fo‘i lea o ia, o taui atu ‘iā te ia le taui tatau o lana solitulafono.
34. A o Nikanora, o lē ‘ua sili le amio leaga, lē na vala‘au mai i fa‘atau‘oloa e to‘aafe latou te ō mai i le fa‘atauina o tagata Iutaia.
35. ‘Ua fa‘amaulaloina o ia, i le fesoasoani mai a le Ali‘i, e i latou lava sa na ta‘ufa‘atauva‘aina; ‘ua na ‘ave‘esea ona ‘ofu mamalu ma ‘ua sola fa‘asulusulu na o ia lava ma ‘ua fo‘i atu i Anetioka, o momomo lona loto i le fa‘aumatia o lana itūtau‘a.
36. O ia sa na folafolaina i tagata Roma o le a totogi atu le lafoga ‘iā te i latou i tupe e maua i le fa‘apologaina o Ierusalema, a o lenei ‘ua tala‘i lava e ia o le Atua o le puipui o tagata Iutaia ma ‘ua lē āu faia‘ina i latou auā ‘ua latou ‘ana‘ana i tulafono ‘ua tu‘uina mai e ia ‘iā te i latou.