1. ‘Ua mavae ia mea, ‘ona toe fa‘aali lea o Iesu i le ‘au so‘o i le vai o Tiperia; ‘ua fa‘apea ‘ona fa‘aali o ia.
2. Sa fa‘atasi Simona Peteru, ma Toma ‘ua igoa ‘iā Titumo, ma Natanielu o le Kana i Kalilaia, ma atali‘i o Sepetaio, ma nisi o ona so‘o e to‘alua.
3. ‘Ua fai atu Simona Peteru ‘iā te i latou, “‘Ou te alu, ‘ou te fagota.”‘Ua fai mai i latou ‘iā te ia, “Tatou te ō fo‘i ma oe.” ‘Ua latou ō atu, ‘ona latou ō a‘e loa lea i le va‘a; ‘ae le‘i maua se i‘a e tasi i lea po.
4. ‘Ua o‘o i le taeao, ‘ua tu Iesu i le ‘auvai, ‘ae le‘i iloa e le ‘au so‘o o Iesu lea.
5. ‘Ona fetalai atu lea o Iesu ‘iā te i latou, “Le fānau e, pe i ai ‘ea ni a ‘outou mea e ‘ai?”‘Ua latou tali mai ‘iā te ia, “E leai.”
6. ‘Ua fetalai atu o ia ‘iā te i latou, “‘Inā lafo ia le ‘upega i le itū taumatau o le va‘a, ‘ona ‘outou maua ai lea.” ‘Ona latou lafo lea; a ‘ua lē toe mafai e i latou ‘ona toso a‘e, ‘ona ‘ua tumu i i‘a.
7. ‘Ona fai atu lea o le so‘o ‘ua alofaina e Iesu ‘iā Peteru, “O le Ali‘i.” ‘Ua fa‘alogo Simona Peteru, o le Ali‘i o ia, ‘ona ‘ofu lea o ia i lona ‘ofu, auā na fa‘asau o ia; i le ‘ua oso i le vai.
8. A ‘ua ō mai isi so‘o i le va‘a itiiti; auā e lē vāvā mamao ma uta, pe lima sefulu gafa.
9. ‘Ua latou tuta, ‘ona iloa lea o le afi malala, o le i‘a fo‘i ‘ua tunu ai, ma le areto.
10. ‘Ua fetalai atu o Iesu ‘iā te i latou, “‘Aumai ia nisi i‘a ‘ua ‘outou maua nei.”
11. ‘Ona alu ane lea o Simona Peteru, ma toso mai le ‘upega i uta, ‘ua tumu i i‘a tetele; e selau ma le lima sefulu ma le tolu; e ui lava ‘ina tele o i‘a, ‘ae le‘i māsae lava le ‘upega.
12. ‘Ua fetalai atu Iesu ‘iā te i latou, “Ō mai ia, ‘inā ‘a‘ai.” ‘Ae le‘i fa‘amalosi se tasi o le ‘au so‘o e fesili atu ‘iā te ia, “O ai ‘ea oe?” Auā ‘ua latou iloa, o le Ali‘i lava ia.
13. ‘Ona maliu ane lea o Iesu, ‘ua tago i le areto, ma avatu ‘iā te i latou; ‘ua fa‘apea fo‘i ma le i‘a.
14. O lona fa‘aali fa‘atolu mai lea o Iesu i ona so‘o, talu ‘ona toetū mai o ia nai ē ‘ua oti.
15. ‘Ua uma ‘ona latou ‘a‘ai, ‘ona fetalai atu lea o Iesu ‘iā Simona Peteru, “Simona e, le atali‘i o Ioane, pe sili mai lou alofa ‘iā te a‘u, i o latou nei?”‘Ua fai mai o ia ‘iā te ia, “Ioe, le Ali‘i e, ‘ua e silafia, ‘ou te alofa ‘iā te oe.”‘Ona fetalai atu lea o Iesu ‘iā te ia, “‘Ia e fafaga i a‘u tama‘i mamoe.”
16. ‘Ua toe fetalai atu fa‘alua Iesu ‘iā te ia, “Simona e, le atali‘i o Ioane, pe ‘e te alofa mai ‘iā te a‘u?”‘Ua fai mai o ia ‘iā te ia, “Ioe, le Ali‘i e, ‘ua e silafia, ‘ou te alofa ‘iā te oe.”‘Ona fetalai atu lea o Iesu ‘iā te ia, “‘Ia e leoleo i a‘u mamoe.”
17. ‘Ua fetalai fa‘atolu atu Iesu ‘iā te ia, “Simona e, le atali‘i o Ioane, pe ‘e te alofa mai ‘iā te a‘u?”‘Ua tigā Peteru, auā ‘ua ia fetalai fa‘atolu ‘iā te ia, “Pe ‘e te alofa mai ‘iā te a‘u?”‘Ua fai mai ‘iā te ia, “Le Ali‘i e, ‘ua e silafia mea uma lava, ‘ua e silafia, ‘ua ‘ou alofa lava ‘iā te oe.”‘Ona fetalai atu lea o Iesu ‘iā te ia, “‘Ia e fafaga i a‘u mamoe.
18. E moni, e moni, ‘ou te fai atu ‘iā te oe, ‘ua e fusi oe ‘ina o e taule‘ale‘a, ma e fealua‘i i mea na e loto i ai; ‘ae pe a e toeaina, e fa‘aloaloa ou lima, e fusifusi fo‘i ‘iā te oe e se tasi, e ‘ave fo‘i oe i le mea ‘e te lē loto i ai.”
19. ‘Ua ia fetalai atu lea ‘upu e fa‘ailoa atu ai le uiga o lona oti e vivi‘i atu ai o ia i le Atua. ‘Ua fetalai atu lea mea, ‘ona fa‘apea atu lea o Iesu ‘iā te ia, “‘Ia e mulimuli mai ‘iā te a‘u.”
20. ‘Ua fāliu Peteru, ‘ona va‘ai atu lea o ia i le so‘o ‘ua alofaina e Iesu, o lo‘o mulimuli mai, o ia fo‘i na fa‘alagolago i le fatafata o Iesu ‘ina o fai le talisuaga, ‘ua fai atu fo‘i o ia, “Le Ali‘i e, o ai ‘ea e fa‘alataina oe?”
21. ‘Ua iloa atu o ia e Peteru, ‘ona fai mai lea o ia ‘iā Iesu, “Le Ali‘i e, pe fa‘apefea o ia nei?”
22. ‘Ua fetalai atu Iesu ‘iā te ia, “‘Āfai ‘ou te loto ‘ina ‘ia tumau pea o ia se‘ia ‘ou sau, pe se a lea mea ‘iā te oe? ‘Ia e mulimuli mai oe ‘iā te a‘u.”
23. ‘Ona salalau ai lea o lenei tala i le ‘au uso, e lē oti lava lea so‘o; ‘ae le‘i fa‘apea atu Iesu ‘iā te ia, e lē oti ia; ‘ae fa‘apea, “‘Āfai ‘ou te loto ‘ina ‘ia tumau pea o ia se‘ia ‘ou sau, pe se a lea mea ‘iā te oe?”
24. O le so‘o lenā o lē molimau i ia mea ma na tusia ia mea; ‘ua tatou iloa fo‘i e moni lava lana mau.
25. O isi mea fo‘i e tele na faia e Iesu, ‘āfai e tusia uma lava, o la‘u tāofi e lē mafai ‘ona ofi i le lalolagi ‘ia tusi pe a tusia.#