1. A o le‘i o‘o i le tausamiga o le paseka, ‘ua silafia e Iesu ‘ua o‘o mai ona po e tu‘ua ai e ia lenei lalolagi, ‘ae maliu atu i le Tamā; ‘ua na alofa i ona tagata o i le lalolagi, ‘ua ia alofa ‘iā i latou ‘ua o‘o i le gata‘aga.
2. ‘Ua fai le talisuaga, a ‘ua tu‘u e le tiapolo i le loto o Iuta le Sekara, le atali‘i o Simona ‘ia fa‘alata ‘iā te ia.
3. ‘Ua silafia e Iesu ‘ua tu‘uina mai e le Tamā mea uma lava i ona ‘a‘ao, ‘ua maliu mai fo‘i o ia mai le Atua, o le a toe maliu atu fo‘i o ia i le Atua;
4. ‘ona tu lea o ia i luga a o fai le talisuaga, ‘ua tu‘u ‘ese ona ‘ofu, ‘ua tago fo‘i i le ‘ie sōloi, ‘ua fusi ‘iā te ia.
5. ‘Ona liligi lea e ia o le vai i le ipu e mulumulu ai, ‘ua mulumulu i vae o ona so‘o, ma sōloi ai i le solo ‘ua ia fusi ai.
6. ‘Ona o‘o atu lea o ia ‘iā Simona Peteru; a ‘ua fai mai o ia ‘iā te ia, “Le Ali‘i e, ‘e te mulumulu ‘ea o‘u vae?”
7. ‘Ua tali atu Iesu ‘iā te ia, ‘ua fa‘apea atu, “O le mea ‘ou te faia, ‘e te lē iloa nei, ‘ae mulimuli ane ‘e te iloa.”
8. ‘Ua fai mai Peteru ‘iā te ia, “‘E te lē mulumulu lava o‘u vae e o‘o i le fa‘avavau.”‘Ua tali atu Iesu ‘iā te ia, “‘Āfai ‘ou te lē mulumulu ‘iā te oe, e leai sou tofi fa‘atasi ma a‘u.”
9. ‘Ona fa‘apea mai lea o Simona Peteru ‘iā te ia, “Le Ali‘i e, ‘aua lava na o o‘u vae, a o o‘u lima fo‘i, ‘atoa ma lo‘u ulu.”
10. ‘Ona fa‘apea atu lea o Iesu ‘iā te ia, “O lē ‘ua tā‘ele, ‘ia tau o ona vae, ‘ae mamā uma ai, e lē aogā ‘ona mulumulu uma. ‘Ua mamā fo‘i ‘outou, ‘ae lē o ‘outou uma lava.”
11. Auā ‘ua silafia e ia lē na te fa‘alataina o ia; o le mea lea na ia fetalai atu ai, “‘Ua lē mamā ‘outou uma lava.”
12. ‘Ua uma ‘ona mulumuluina e ia o latou vae, ‘ua tago fo‘i i ona ‘ofu, ma toe nofo i lalo, ‘ona fa‘apea atu lea o ia ‘iā te i latou, “‘Ua ‘outou iloa ‘ea le mea ‘ua ‘ou faia ‘iā te ‘outou?
13. Tou te ta‘ua mai a‘u, o le a‘oa‘o ma le Ali‘i; ‘ua lelei fo‘i la ‘outou fai mai lea ‘upu, auā o a‘u lava lea.
14. O lenei, ‘āfai o a‘u o le Ali‘i, ma le a‘oa‘o, ‘ua ‘ou mulumuluina o ‘outou vae, e tatau ‘ona ‘outou femulumulua‘i o ‘outou vae.
15. Auā ‘ua ‘ou avatu le fa‘aa‘oa‘o ‘iā te ‘outou, e pei ‘ona ‘ou faia ‘iā te ‘outou, ‘ia fa‘apea lava e ‘outou ‘ona fai.
16. E moni, e moni, ‘ou te fai atu ‘iā te ‘outou, e lē sili le ‘au‘auna i lona ali‘i; e lē sili fo‘i lē ‘ua ‘auina i lē e ana le fe‘au.
17. ‘Āfai ‘ua ‘outou iloa ia mea, ‘amu‘ia ‘outou pe a ‘outou faia.
18. “E lē o ‘outou uma ‘ou te fai atu ai, ‘ua ‘ou iloa i latou na ‘ou filifilia; ‘ae peita‘i ‘ia taunu‘u ai le Tusi, ‘O lē ‘ai fa‘atasi ma a‘u ‘ua a‘a mai o ia ‘iā te a‘u i lona mulivae.’
19. ‘Ou te fai atu nei lava ‘iā te ‘outou, a o le‘i o‘o mai, ‘ina ‘ia ‘outou talitonu pe a taunu‘u, o a‘u o lē ola.
20. E moni, e moni, ‘ou te fai atu ‘iā te ‘outou, o lē talia se tasi ‘ou te ‘auina atu, e talia e ia o a‘u; o lē talia fo‘i o a‘u, e talia e ia lē ‘ua ‘auina mai a‘u.”
21. ‘Ua fetalai atu e Iesu ia mea, ‘ua ātu ai lona finagalo, ‘ona ta‘utino atu lea o ia, ‘ua fa‘apea atu, “E moni, e moni, ‘ou te fai atu ‘iā te ‘outou, e fa‘alataina a‘u e se tasi o ‘outou na.”
22. ‘Ona feva‘aia‘i lea o le ‘au so‘o, ma latou māsalosalo pe na fetalai mai o ia ‘iā te ai.
23. ‘Ua ta‘oto ane fo‘i i le fatafata o Iesu le tasi o ona so‘o, o lē ‘ua alofaina e Iesu.
24. ‘Ona genogeno lea o Simona Peteru ‘iā te ia, e fesili atu po o ai ‘ua ia fetalai i ai.
25. ‘Ua fa‘alagolago mai o ia i le fatafata o Iesu, ‘ona fai mai lea ‘iā te ia, “Le Ali‘i e, o ai ‘ea?”
26. ‘Ua tali atu Iesu, “O lē ‘ou te avatu i ai sina mea e ‘ai pe a uma ‘ona ‘ou fuia, o ia lea.” ‘Ona fuifui lea e ia o le mea e ‘ai, ma avatu ‘iā Iuta le Sekara le atali‘i o Simona.
27. ‘Ua mavae atu le mea e ‘ai, ‘ona uluitinoina lea o lea tagata e Satani. ‘Ona fa‘apea atu lea o Iesu ‘iā te ia, “O le mea ‘e te faia, ‘ia vave ia ‘ona fai.”
28. ‘Ae le‘i iloa e se tasi o i latou sa ta‘o‘oto le mea ‘ua ia fetalai atu ai lea ‘upu ‘iā te ia.
29. Auā ‘ua masalo isi ‘ua fetalai atu Iesu, ‘ina ‘ua ‘iā Iuta le ‘ato tupe, “‘Inā fa‘atau mai ia ni mea e tatau ‘iā te i tatou i le tausamiga; pe avatu se mea i ē matitiva.”
30. ‘Ua talia fo‘i e ia le mea e ‘ai, ‘ona alu loa lea o ia i fafo; ‘ua po.
31. ‘Ua alu ia i fafo, ‘ona fa‘apea atu lea o Iesu, “‘Ua vi‘ia nei le Atali‘i o le tagata, ‘ua vi‘ia fo‘i le Atua ‘iā te ia.
32. ‘Āfai e vi‘ia le Atua ‘iā te ia, e vi‘ia fo‘i o ia e le Atua ‘iā te ia lava, e vave fo‘i ‘ona vivi‘i o ia ‘iā te ia.
33. La‘u fānau e, e toe itiiti nai aso ‘ou te i ai ‘iā te ‘outou, tou te sā‘ili mai ‘iā te a‘u, ‘ae pei ‘ona ‘ou fai atu ‘iā Iutaia, ‘O le mea ‘ou te alu i ai, tou te lē mafai ‘ona ō i ai; e fa‘apea fo‘i ‘ona ‘ou fai atu nei ‘iā te ‘outou.’
34. O le poloa‘iga fou ‘ou te tu‘u atu ai ‘iā te ‘outou, ‘ia ‘outou fealofani; fa‘apei ‘ona ‘ou alofa atu ‘iā te ‘outou, ‘ia fealofani fo‘i ‘outou.
35. O le mea lea e iloa ai e tagata uma lava o o‘u so‘o ‘outou, pe ‘āfai ‘ua ‘outou fealofani.”
36. ‘Ua fai mai Simona Peteru ‘iā te ia, “Le Ali‘i e, po o fea ‘e te maliu atu i ai?”‘Ua tali atu Iesu ‘iā te ia, “O le mea ‘ou te alu i ai, ‘e te lē mafai ‘ona mulimuli atu nei ‘iā te a‘u; a o se aso ‘e te mulimuli atu ai ‘iā te a‘u.”
37. ‘Ua fai mai Peteru ‘iā te ia, “Le Ali‘i e, pe se a le mea ‘ou te lē mafai ai ‘ona mulimuli atu nei ‘iā te oe? ‘Ou te tu‘uina atu lo‘u ola ‘ona o oe.”
38. ‘Ua tali atu Iesu ‘iā te ia, “‘E te tu‘uina atu ‘ea lou ola ‘ona o a‘u? E moni, e moni, ‘ou te fai atu ‘iā te oe, e lē vivini moa, se‘ia e fa‘afiti fa‘atolu mai ‘iā te a‘u.