1. “E moni, e moni, ‘ou te fai atu ‘iā te ‘outou, o lē lē ui atu i le faitoto‘a i totonu o le lotoā mamoe, ‘ae alu a‘e o ia i se tasi mea, o le gaoi lea ma le fao mea.
2. A o lē ui atu i le faitoto‘a, o le leoleo mamoe lava lea.
3. E tatala mai ‘iā te ia le faitoto‘a e le leoleo faitoto‘a; e fa‘alogo fo‘i mamoe i lona leo; e vala‘au e ia i ana lava mamoe i o latou igoa; na te ta‘ita‘i atu fo‘i ‘iā te i latou.
4. Pe ā tu‘uina atu e ia ana lava mamoe, e muamua atu o ia i ai; ‘ona mulimuli atu ai lea o mamoe ‘iā te ia, auā ‘ua latou iloa lona leo.
5. ‘Ae lē mulimuli atu i latou i se tagata ‘ese, ‘ae sōsōla ‘ese ‘iā te ia; auā latou te lē iloa leo o le tagata ‘ese.”
6. ‘Ua fetalai atu Iesu ‘iā te i latou lenā fa‘ata‘oto, ‘ae le‘i malamalama i latou i mea ‘ua ia fetalai atu ai ‘iā te i latou.
7. ‘Ona toe fetalai atu lea o Iesu ‘iā te i latou, “E moni, e moni, ‘ou te fai atu ‘iā te ‘outou, o a‘u nei o le faitoto‘a o mamoe.
8. O i latou uma o ē na muamua ‘iā te a‘u, o gaoi i latou ma fao mea; ‘ae le‘i fa‘alogo mamoe ‘iā te i latou.
9. O a‘u nei o le faitoto‘a; ‘āfai e ui mai se tasi ‘iā te a‘u, e fa‘aolaina o ia, e alu atu ma ulu fafo, e maua fo‘i o ia le mea e ‘ai.
10. O le gaoi, e leai se tasi mea e sau ai na ‘ona ia gaoi, ma fasi, ma fa‘aumatia; ‘ua ‘ou sau ‘ina ‘ia latou maua le ola, ‘ia maua atili ai lava.
11. “O a‘u o le leoleo mamoe lelei; e tu‘u atu e le leoleo mamoe lelei o lona ola e sui a‘i mamoe.
12. A o le ‘au‘auna, e lē o le leoleo fo‘i o ia, e le ana le lafu mamoe; ‘ua va‘ai atu o ia i le luko ‘ua sau, ‘ona lafoa‘i lea e ia o mamoe, ‘ae sola; ‘ona pu‘ea lea o mamoe e le luko ma fa‘asalalauina.
13. E sola le ‘au‘auna, auā o le ‘au‘auna lava o ia, e le manatu fo‘i o ia i mamoe.
14. O a‘u nei o le leoleo mamoe lelei; ‘ua ‘ou iloa a‘u mamoe, ‘ua iloa fo‘i a‘u e a‘u mamoe;
15. pei ‘ona silafia a‘u e le Tamā ma ‘ou iloa le Tamā. ‘Ou te tu‘uina atu fo‘i lo‘u ola e sui a‘i mamoe.
16. ‘Ua ‘iā te a‘u fo‘i isi mamoe e lē o i lenei lotoā; e tatau ‘ona ‘ou ta‘ita‘iina mai o i latou fo‘i, e fa‘alogo fo‘i i latou i lo‘u leo; ‘ona tasi ai lea o le lafu mamoe, ma le leoleo mamoe e to‘atasi.
17. “O le mea lea, e alofa mai ai le Tamā ‘iā te a‘u, auā ‘ou te tu‘uina atu lo‘u ola, ‘ina ‘ia ‘ou toe ‘aumai ai.
18. E leai se tasi na te ‘ave‘eseina mai ‘iā te a‘u, ‘ae peita‘i o a‘u, ‘ou te tu‘uina atu e a‘u lava. O ‘iā te a‘u le pule e tu‘uina atu, o ‘iā te a‘u fo‘i le pule e toe ‘aumai ai; ‘ua ‘ou maua lenā poloa‘iga mai lo‘u Tamā.”
19. ‘Ona toe vaeluaina lea o Iutaia i ia ‘upu.
20. ‘Ua fa‘apea ane nisi o i latou e to‘atele, “‘Ua ‘iā te ia le temoni, o le vale fo‘i o ia; pe se a le mea tou te fa‘alogologo ai ‘iā te ia?”
21. A ‘ua fa‘apea ane nisi, “E lē ni ‘upu ia a se tagata ‘ua uluitinoina; e mafai ‘ea e se temoni ‘ona ia fa‘apupulaina mata o tauaso?”
22. ‘Ua fai i Ierusalema le tausamiga o le Fa‘aulufalega, o ona po fo‘i o le tausaga malūlū.
23. ‘Ua femaliua‘i Iesu i le malumalu o le fa‘apaologa o Solomona.
24. ‘Ona vagavagai lea o Iutaia ‘iā te ia, ‘ua latou fa‘apea mai ‘iā te ia, “A fa‘alētonu o matou manatu ‘iā te oe se‘ia afea? ‘Āfai o oe o le Keriso, ‘ia matuā ta‘utino mai ‘iā te i matou.”
25. ‘Ua tali atu Iesu ‘iā te i latou, “‘Ua uma ‘ona ‘ou ta‘u atu ‘iā te ‘outou, a ‘ua ‘outou lē fa‘atuatua mai lava. O galuega ‘ou te faia i le suafa o lo‘u Tamā, e molimau mai ia ‘iā te a‘u.
26. A ‘ua ‘outou lē fa‘atuatua mai lava ‘outou; auā e lē ni a‘u mamoe ‘outou, pei ‘ona a‘u fai atu ‘iā te ‘outou.
27. O a‘u mamoe e fa‘alogo mai i latou i lo‘u leo, ‘ua ‘ou iloa fo‘i i latou, ‘ua latou mulimuli mai fo‘i ‘iā te a‘u.
28. ‘Ou te avatu fo‘i le ola e fa‘avavau ‘iā te i latou; latou te lē oti lava e o‘o i le fa‘avavau, e lē mafai lava e se tasi ‘ona fao ‘iā te i latou a‘i lo‘u lima.
29. O lo‘u Tamā o lē na foa‘iina mai i latou ‘iā te a‘u, e sili o ia i nisi uma lava; e lē mafai e se tasi ona faoa i latou i le lima o lo‘u Tamā.
30. O a‘u nei ma le Tamā, e tasi lava i mā‘ua.”
31. ‘Ona toe fetāgofi lea o Iutaia i ma‘a, e fetogi ‘iā te ia.
32. ‘Ona fa‘apea atu lea o Iesu ‘iā te i latou, “E tele galuega lelei ‘ua ‘ou fa‘aalia ‘iā te ‘outou mai lo‘u Tamā; o fea ‘ea o ia galuega tou te fetogi mai ai ‘iā te a‘u.”
33. ‘Ua tali mai Iutaia ‘iā te ia, ‘ua fa‘apea mai, “E lē o galuega lelei matou te fetogi ai oe, a o le ‘upu leaga; auā o oe o le tagata, a ‘ua e fai oe ma Atua.”
34. ‘Ua tali atu Iesu ‘iā te i latou, “E le‘i tusia ‘ea i la ‘outou tulafono, ‘Na ‘ou fai atu o atua ‘outou?’
35. ‘Āfai na ta‘ua e ia ‘o atua’ i latou ē ‘ua i ai le afioga a le Atua, e lē mafai fo‘i ‘ona fa‘alēaogāina le Tusi;
36. tou te fa‘apea ‘ea i lē ‘ua fa‘apa‘iaina ma ‘auina mai e le Tamā i le lalolagi, ‘Ua e ‘upu leaga, auā ‘ua ‘ou fai atu, ‘O a‘u nei o le Atali‘i o le Atua?’
37. ‘Āfai ‘ou te lē faia galuega a lo‘u Tamā, auā tou te talitonu mai ‘iā te a‘u.
38. ‘Ae ‘āfai ‘ou te faia, e ui lava ‘ina ‘outou lē talitonu mai ‘iā te a‘u, ‘ia ‘outou talitonu i galuega; ‘ina ‘ia iloa e ‘outou, ma ‘ia talitonu, o i totonu ‘iā te a‘u le Tamā, o a‘u fo‘i o i totonu ‘iā te ia.”
39. ‘Ona toe fia pu‘e lea o i latou ‘iā te ia; a ‘ua maliu ‘ese o ia i o latou lima.
40. ‘Ua toe maliu ane o ia i tala atu o Ioritana, i le mea na ulua‘i papatiso ai e Ioane; ‘ua nofo fo‘i o ia i lea mea.
41. ‘Ona ō mai lea ‘iā te ia o tagata e to‘atele, ‘ua fa‘apea mai fo‘i i latou, “E leai lava se fa‘ailoga na faia e Ioane; a o mea uma na fai mai ai e Ioane ‘iā te ia nei, e moni ia.”
42. E to‘atele fo‘i ē na fa‘atuatua ‘iā te ia i lea mea.