1. “O a‘u nei o le vine moni, a o lo‘u Tamā o lē galue vine ia.
2. O la uma lava o ‘iā te a‘u e lē fua, e ‘ave‘eseina e ia; a o la uma e fua, e teuteu e ia, ‘ina ‘ia fua mai ai atili.
3. ‘Ua uma ‘ona fa‘amamāina o ‘outou i le ‘upu na ‘ou tautala atu ai ‘iā te ‘outou,
4. ‘Inā tumau ia o ‘outou ‘iā te a‘u, o a‘u fo‘i ‘iā te ‘outou. Fa‘apei o le la e lē mafai ona fua pe a na o ia, pe ‘āfai e lē mau i le vine; e fa‘apea fo‘i ‘outou, pe ‘āfai tou te lē tumau ‘iā te a‘u.
5. “O a‘u nei o le vine, o la ‘outou. O lē tumau ‘iā te a‘u, ma a‘u ‘iā te ia, o ia lava e fua tele mai; auā e lē mafaia e ‘outou ‘ona fai se mea e tasi pe a a‘u lē i ai.
6. ‘Āfai e lē tumau se tasi ‘iā te a‘u, ‘ona lafoa‘iina lea i tua pei o le la la‘au, ma fa‘amagoina ‘ona fa‘apotopotoina ai lea e tagata, ma lafo i le afi, ‘ua susunu ai.
7. ‘Āfai tou te tumau ‘iā te a‘u, e tumau fo‘i a‘u ‘upu ‘iā te ‘outou, o mea uma lava tou te manana‘o i ai, tou te ole atu ai, ‘ona faia lea mo ‘outou.
8. E vi‘ia lo‘u Tamā i lenei mea, pe a ‘outou fua tele mai; ‘ona fai ai lea ‘outou mo‘u so‘o.
9. Fa‘apei ‘ona alofa mai o le Tamā ‘iā te a‘u, e fa‘apea lava ‘ona ‘ou alofa atu ‘iā te ‘outou; ‘ia tumau pea ‘outou i lo‘u alofa.
10. ‘Āfai tou te tausia a‘u poloa‘iga, ‘ona tumau lea o ‘outou i lo‘u alofa; pei ‘ona ‘ou tausia poloa‘iga a lo‘u Tamā, ma ‘ou tumau i lona alofa.
11. ‘Ua ‘ou fai atu nei mea ‘iā te ‘outou, ‘ina ‘ia tumau ai lo‘u ‘oli‘oli ‘iā te ‘outou, ‘ia ‘ato‘atoa fo‘i lo ‘outou ‘oli‘oli.
12. “O la‘u poloa‘iga lenei, ‘ia ‘outou fealofani, pei ‘ona ‘ou alofa atu ‘iā te ‘outou.
13. E lē sili lava le alofa o se tasi i lenei alofa, ‘ia tu‘uina atu e se tasi lona ola e sui ai ana uō.
14. O a‘u uō ‘outou, pe ‘āfai tou te faia mea, uma lava ‘ou te fai atu ai ‘iā te ‘outou.
15. ‘Ou te lē toe ta‘ua ‘outou o ‘au‘auna, auā e lē iloa e le ‘au‘auna le mea e faia e lona ali‘i; a ‘ua ‘ou ta‘ua ‘outou o uō, auā ‘ua ‘ou fa‘ailoa atu ‘iā te ‘outou mea uma na ‘ou fa‘alogo ai i lo‘u Tamā.
16. Tou te le‘i filifilia a‘u, ‘ae na ‘ou filifilia ‘outou ma ‘ou tu‘uina atu ‘outou, ‘ia ‘outou ō ma ‘ia ‘outou fua mai ni fua, ma ‘ia tumau o ‘outou fua; ‘ina ‘ia foa‘iina atu ‘iā te ‘outou e le Tamā mea uma lava tou te ole atu ai ‘iā te ia i lo‘u igoa.
17. O la‘u poloa‘iga lenei ‘iā te ‘outou, ‘ia ‘outou fealofani.
18. “‘Āfai e ‘ino‘ino mai le lalolagi ‘iā te ‘outou, ‘ua ‘outou iloa ‘ua muamua ‘ona ‘ino‘ino mai ‘iā te a‘u.
19. ‘Āfai a ni tagata o le lalolagi ‘outou, po ‘ua alofa mai le lalolagi i ona tagata; ‘ae lē ni o le lalolagi ‘outou, a ‘ua ‘ou filifilia ‘outou nai le lalolagi, o le mea, lea e ‘ino‘ino ai le lalolagi ‘iā te ‘outou.
20. ‘Ia ‘outou manatua le ‘upu na ‘ou fai atu ai ‘iā te ‘outou, ‘E lē sili le ‘au‘auna i lona ali‘i.’ ‘Āfai ‘ua latou fa‘asauā mai ‘iā te a‘u, e fa‘asauā fo‘i ‘iā te ‘outou; ‘āfai ‘ua latou tausia la‘u ‘upu, latou te tausia fo‘i la ‘outou.
21. ‘Ae faia e i latou ia mea uma ‘iā te ‘outou ‘ona o lo‘u igoa, auā e le‘i iloa e i latou o lē ‘ua ‘auina mai a‘u.
22. ‘Āfai ‘ana a‘u lē sau ma tautala atu ‘iā te i latou, po ‘ua leai sa latou agasala; a o lenei, e leai se mea e ufiufi ai la latou agasala.
23. O lē ‘ino‘ino mai ‘iā te a‘u, ‘ua ‘ino‘ino fo‘i o ia i lo‘u Tamā.
24. ‘Ana a‘u le‘i faia ‘iā te i latou o galuega e le‘i faia lava e se tasi, po ‘ua leai sa latou agasala; a o lenei, ‘ua latou va‘ai mai, ma latou ‘ino‘ino mai ‘iā te a‘u ‘atoa ma lo‘u Tamā.
25. ‘Ae peita‘i ‘ia taunu‘u ai le ‘upu ‘ua tusia i la latou tulafono, ‘‘Ua latou ‘ino‘ino mai fua lava ‘iā te a‘u.’
26. “A maliu mai le Fesoasoani, o lē ‘ou te ‘auina mai ‘iā te ‘outou mai le Tamā, o le Agaga lea e tupu mai ai le ‘upu moni, o lē maliu mai mai le Tamā, o ia lava e molimau ‘iā te a‘u.
27. Tou te molimau fo‘i, auā ‘ua ‘outou fa‘atasi ma a‘u talu le amataga.#