1. ‘Ua fetalai atu ia mea e Iesu, ‘ona tepa a‘e lea o ona fofoga i le lagi, ‘ua fa‘apea atu, “Lo‘u Tama e, ‘ua o‘o mai le aso. Tu‘u mai ia le mamalu i lou Atali‘i, ‘ina ‘ia tu‘u atu fo‘i e lou Atali‘i le mamalu ‘iā te oe.
2. Auā ‘ua e foa‘i mai ‘iā te ia le pule i tagata uma lava, ‘ina ‘ia avatu e ia le ola e fa‘avavau ‘iā te i latou uma lava na e foa‘iina mai ‘iā te ia.
3. O le ola e fa‘avavau fo‘i lenei, ‘ia latou iloa oe le Atua moni e to‘atasi, ‘atoa ma lē ‘ua e ‘auina mai, o Iesu Keriso lea.
4. ‘Ua ‘ou tu‘u atu le mamalu ‘iā te oe i le lalolagi; ‘ua ‘ou fa‘aumaina le galuega na e tu‘uina mai ‘iā te a‘u, ‘ou te faia.
5. O lenei fo‘i, lo‘u Tama e, ‘ia e tu‘u mai ‘iā te a‘u le manuia fa‘atasi ma oe, o le manuia lava sa ‘iā te i tā‘ua ma oe, a o le‘i faia le lalolagi.
6. “‘Ua ‘ou fa‘aali atu lou suafa i tagata na e foa‘i mai ‘iā te a‘u ai le lalolagi; sa fai i latou mou, ‘ua e foa‘iina mai fo‘i i latou ‘iā te a‘u, ‘ua latou tausia fo‘i lau afioga.
7. O lenei, ‘ua latou iloa o mea uma na e foa‘iina mai ‘iā te a‘u, mai ‘iā te oe lava ia.
8. O ‘upu fo‘i na e tu‘u mai ‘iā te a‘u, ‘ua ‘ou tu‘uina atu ‘iā te i latou ‘ua latou talia fo‘i, ma ‘ua latou iloa, e moni ‘ua ‘ou sau mai ‘iā te oe; na talitonu fo‘i i latou ‘ua e ‘auina mai a‘u.
9. “‘Ou te tatalo mo i latou; ‘ou te lē tatalo mo le lalolagi, a o i latou na e foa‘iina mai ‘iā te a‘u, auā o ou tagata lava i latou.
10. O a‘u mea uma, o au lava ia; o au mea, o a‘u lava ia; ‘ua vi‘ia fo‘i a‘u ‘iā te i latou.
11. ‘Ou te lē i ai pea i le lalolagi, a o i latou, e i le lalolagi lava i latou; ‘ou te alu atu fo‘i ‘iā te oe. Le Tamā pa‘ia e, ‘ia e tausi ‘iā i latou i lou suafa o ē na e foa‘i mai ‘iā te a‘u, ‘ina ‘ia tasi o i latou, fa‘apei o i tā‘ua.
12. ‘Ua ‘ou tausia i latou i lou suafa, ‘ina ‘ua ‘ou ‘iā te i latou i le lalolagi; ‘ua ‘ou leoleo i ē na e foa‘i mai ‘iā te a‘u, e leai fo‘i se isi o latou ‘ua fano, na o le tagata o le malaia, ‘ia taunu‘u ai le Tusi.
13. O lenei, ‘ou te alu atu ‘iā te oe, ‘ou te fai atu fo‘i nei mea a o ‘ou i le lalolagi, ‘ina ‘ia maua e i latou lo‘u ‘oli‘oli ‘ia ‘ato‘atoa ai i totonu ‘iā te i latou.
14. ‘Ua ‘ou tu‘u atu lau afioga ‘iā te i latou; ‘ua ‘ino‘ino fo‘i le lalolagi ‘iā te i latou, auā e lē mai le lalolagi i latou, fa‘apei o a‘u ‘ou te lē mai le lalolagi a‘u.
15. ‘Ou te lē ole atu ‘ina ‘ia e ‘ave ‘ese ‘iā te i latou i le lalolagi, a ‘ia e tausi ‘iā te i latou mai lē o lo‘o leaga.
16. E lē ni o le lalolagi i latou, fa‘apei o a‘u fo‘i, ‘ou te lē mai le lalolagi a‘u.
17. ‘ia e fa‘apa‘iaina i latou i lau ‘upu moni; o lau afioga o le ‘upu moni lea.
18. Fa‘apei ‘ona e ‘auina mai a‘u i le lalolagi, ‘ua fa‘apea fo‘i a‘u ‘ona ‘auina atu o i latou i le lalolagi.
19. ‘Ou te fa‘apa‘ia fo‘i a‘u e sui a‘i i latou, ‘ina ‘ia fa‘apa‘iaina o i latou i le ‘upu moni.
20. “E lē fa‘apito la‘u tatalo mo i latou nei, a o i latou fo‘i e fa‘atuatua mai ‘iā te a‘u ‘ona o la latou ‘upu;
21. ‘ina ‘ia tasi i latou uma, fa‘apei o oe le Tamā o i totonu ‘iā te a‘u, o a‘u fo‘i o i totonu ‘iā te oe, ‘ina ‘ia tasi i latou i totonu ‘iā te i tā‘ua; ‘ina ‘ia talitonu le lalolagi ‘ua e ‘auina mai a‘u.
22. O le mamalu fo‘i ‘ua e foa‘i mai ‘iā te a‘u, ‘ua ‘ou foa‘i atu ‘iā te i latou, ‘ina ‘ia tasi o i latou, fa‘apei o i tā‘ua ‘ua tasi;
23. o a‘u o i totonu ‘iā te i latou, o oe fo‘i o i totonu ‘iā te a‘u, ‘ina ‘ia fa‘a‘ato‘atoaina i latou ‘ia tasi; ‘ina ‘ia iloa ai fo‘i e le lalolagi, na e ‘auina mai a‘u ma e alofa mai ‘iā te i latou, fa‘apei ‘ona e alofa mai ‘iā te a‘u.
24. Lo‘u Tamā e, o lo‘u loto lenei ‘iā te i latou ‘ua e foa‘iina mai ‘iā te a‘u, ‘ina ‘ia latou fa‘atasi ma a‘u i le mea ‘ou te i ai, ‘ina ‘ia latou va‘aia i lo‘u mamalu na e foa‘iina mai ‘iā te a‘u; auā ‘ua e alofa mai ‘iā te a‘u a o le‘i fa‘avaeina le lalolagi.
25. “Le Tamā amiotonu e, e le‘i iloa oe e le lalolagi, a o a‘u, ‘ua ‘ou iloa oe, ‘ua iloa fo‘i e i latou nei, ‘ua e ‘auina mai a‘u.
26. ‘Ua ‘ou fa‘ailoa atu fo‘i lou suafa ‘iā te i latou, o le a ‘ou fa‘ailoa atu ai fo‘i; ‘ina ‘ia i totonu ‘iā te i latou le alofa ‘ua e alofa mai ai ‘iā te a‘u, o a‘u fo‘i i totonu ‘iā te i latou.”