1. O lenei, le ‘au uso pa‘ia e, ē ‘ua tofutofusia i le vala‘au mai le lagi, ‘inā mafaufau ia i le ‘aposetolo ma le ositaulaga sili ‘ua ta‘uta‘uina e i tatou, o Keriso Iesu lea.
2. Na fa‘amaoni o ia i lē na tofia o ia, pei o Mose fo‘i ‘ona “fa‘amaoni i le ‘āiga o le Atua.”
3. Auā e ta‘uaogāina o ia i le mamalu e sili i lo Mose, pei ‘ona sili o le vi‘iga o lē saunia le fale i lo le fale.
4. Auā e ta‘itasi fale ma saunia e se tasi; a o lē na te saunia mea uma lava o le Atua lea.
5. Na fa‘amaoni lava Mose i lona ‘āiga uma, o le ‘au‘auna ia, ‘ina ‘ia molimau o ia i mea o le a tala‘iina mai.
6. Peita‘i ane o Keriso, o le Alo ia e pule i lona lava ‘āiga; o lona ‘āiga i tatou, pe ‘āfai tatou te tāofi mau i le loto tele ma le mitamita i le fa‘amoemoe.
7. O le mea lea, pei ‘ona fetalai mai ai le Agaga Pa‘ia,“O le aso nei ‘āfai tou te fa‘alogo ai i lona si‘ufofoga,
8. ‘aua tou te fa‘ama‘a‘a i o ‘outou loto,pei ‘ona faia i le finauga i le aso o le fa‘a‘ono‘ono i le vao.
9. Sa fa‘a‘ono‘ono mai ai o ‘outou tamā ‘iā te a‘u, sa tofotofo mai ai ‘iā te a‘u,a ‘ua latou iloa a‘u galuega i ona tausaga e fagafulu.
10. O le mea lea na ‘ou ‘ino‘ino ai i lenā tupulaga, ma ‘ou fai ane,‘‘Ua sesē pea lava i o latou loto,‘ua lē iloa e i latou o‘u ala.’
11. ‘Ona ‘ou tautō ai lea i lo‘u ita,‘Latou te lē sao atu lava i lo‘u mālōlōga.’”
12. Le ‘au uso e, ‘ia ‘outou, ne‘i i ai i so ‘outou le loto leaga ma le lē fa‘atuatua, tou te ō ‘ese ai i le Atua soifua.
13. A ‘ia ‘outou fēfa‘amafanafanaa‘i i lea aso ma lea aso, manū o ta‘ua o le “aso nei,” ‘ina ne‘i loto ma‘a‘a so ‘outou i le pepelo o le agasala.
14. Auā e mafuta fa‘atasi o i tatou ma Keriso, pe ‘āfai tatou te tāofi mau lava i lo tatou mua‘i fa‘atuatua e o‘o i le gata‘aga.
15. Manū o fai mai,“O le aso nei ‘āfai tou te fa‘alogo ai i lona si‘ufofoga,‘aua tou te fa‘ama‘a‘a i o ‘outou loto,pei ‘ona faia i le finauga.”
16. Auā o ai ‘ea i latou ē na finau ‘ina ‘ua latou fa‘alogologo? E lē o i latou uma ‘ea ē na ō atu nai Aikupito sa ta‘ita‘iina e Mose?
17. O ai fo‘i i latou sa ‘ino‘ino o ia i ai i ona tausaga e fagafulu? E lē o i latou ‘ea ē na agasala, sa oti o latou tino i le vao?
18. O ai fo‘i i latou ‘ina ‘ia tautō i ai, latou te lē sao atu i lona mālōlōga? E lē o i latou ‘ea ē na fa‘alogogatā?
19. O lenei, ‘ua tatou iloa na lē mafai ‘ona sao atu i ai i latou ‘ona o le lē fa‘atuatua.