1. O le fa‘atuatua o le fa‘alagolago lea i mea ‘ua fa‘amoemoe i ai, o le mautinoa lea o mea e lē o va‘aia.
2. Auā ‘ona o lea na ta‘uleleiina ai o ē anamua.
3. O le fa‘atuatua ‘ua tatou iloa ai na faia mea uma i le afioga a le Atua; na faia fo‘i mea ‘ua va‘aia i mea ‘ua lē aliali mai.
4. O le fa‘atuatua na avatu ai e Apelu i le Atua le taulaga e sili ‘ona lelei i lo Kaino; ‘ona o lea ‘ua ta‘ua ai o ia ‘ua amiotonu, o lo‘o ta‘uleleia ana taulaga e le Atua; ‘ua oti o ia, a o lona fa‘atuatua ‘ua tautala mai ai pea o ia.
5. O le fa‘atuatua na ‘ave‘eseina ai Enoka ‘ina ‘ia lē o‘o ‘iā te ia le oti, “na lē iloa fo‘i o ia, auā na ‘avea o ia e le Atua.” Auā a o le‘i ‘ave‘eseina na ta‘ua ai o ia o lē ‘ua fiafia i ai le Atua.
6. A leai fo‘i se fa‘atuatua e lē mafai ‘ona fiafia mai o ia; auā e tatau i lē alu atu i le Atua ‘ona talitonu o lo‘o soifua o ia, o ia fo‘i na te tauia mai o ē matuā sā‘ili ‘iā te ia.
7. O le fa‘atuatua na fausia ai e Noa le va‘a ‘ina ‘ua mata‘u, e ola ai lona ‘āiga, ‘ina ‘ua a‘oa‘oina e le Atua i mea e le‘i va‘aia i ia ona po, na ia fa‘asalaina ai le lalolagi, ‘ua na maua ai fo‘i le amiotonu, o le amiotonu lea e i le fa‘atuatua.
8. O le fa‘atuatua na ‘ana‘ana ai Aperaamo, ‘ina ‘ua vala‘auina o ia e alu i le mea o le a maua e fai mōna fanua, na ia alu fo‘i e le‘i iloa po o fea a alu i ai.
9. O le fa‘atuatua sa āumau ai o ia i le nu‘u na folafolaina, ‘ina o fai mo tagata ‘ese, sa nofo i fale ‘ie, ‘atoa ma Isaako ma Iakopo, o ē na tofia fa‘atasi ma ia i lea lava mea na folafolaina.
10. Auā na ia fa‘atalitali atu i se ‘a‘ai ‘ua fa‘avaeina, o lona mata‘isau ma le tufuga o le Atua lea.
11. O le fa‘atuatua fo‘i na maua ai e Sara lava le malosi e fānau ai, na fānau fo‘i e ia ‘ina ‘ua mavae tausaga o lona malosi, auā na manatu o ia e fa‘amaoni mai o ia na folafola mai.
12. O le mea lea sa tutupu mai ai i le to‘atasi, o ia fo‘i ‘ua lata ‘ina oti, “o le to‘atele lava pei o fetū o le lagi, pei o le oneone fo‘i i le matāfaga e lē mafaitaulia.”
13. Na oti i latou nei uma lava o fa‘atuatua, e le‘i maua mea na folafolaina, a ‘ua iloa ai e i latou ‘ae mamao, ma latou talia ma le fiafia, ma latou ta‘utino mai o tagata ‘ese i latou ma āumau i le lalolagi.
14. Auā o i latou o ē fai mai ‘upu fa‘apenā, ‘ua latou matuā fa‘ailoa mai o lo‘o sā‘ili e i latou lo latou lava nu‘u.
15. Auā fo‘i ‘ana manatua e i latou le nu‘u ‘ua latou ō mai ai, po ‘ua mafaia e i latou ‘ona toe fo‘i atu i ai.
16. A o lenei, ‘ua latou naunau lava i le nu‘u e sili ‘ona lelei, o le fa‘alelagi lea; o le mea lea e lē mā ai le Atua ‘iā te i latou, ‘ina ‘ia ta‘ua o ia o lo latou Atua; auā ‘ua saunia e ia o le ‘a‘ai mo i latou.
17. O le fa‘atuatua na fai taulaga ai Aperaamo ‘iā Isaako, ‘ina o tofotofoina o ia, o lē na talia fo‘i ‘upu na folafolaina ‘ua ia avatu ma taulaga o lona atali‘i o to‘atasi.
18. Sa fetalai mai le Atua ‘iā te ia, “E vala‘auina lau fānau ‘iā Isaako.”
19. ‘Ua manatu o ia e mafaia e le Atua ‘ona toe fa‘atū mai tagata nai ē ‘ua oti, o lea fo‘i na ia toe maua mai ai o ia, ‘ua fai lea ma fa‘atusa.
20. O le fa‘atuatua na fa‘amanuia atu ai Isaako ‘iā Iakopo ma Esau i mea atalī.
21. O le fa‘atuatua na fa‘amanuia ta‘itasi atu ai e Iakopo i atali‘i o Iosefa, ‘ina a oti o ia, “na ifo fo‘i o ia ma to‘ona‘i i le ulu o lona to‘oto‘o.”
22. O le fa‘atuatua na fa‘amanatu mai ai e Iosefa, ‘ina a oti, i le ō ‘ese atu le fānauga a Isaraelu, ma na poloa‘i atu ai ‘iā i latou i ona ivi.
23. O le fa‘atuatua sa natia ai Mose i masina e tolu e ona mātua, ‘ina ‘ua fānau mai o ia, auā na la iloa o ia o le tama tino lelei; na lē fefefe fo‘i i lā‘ua i le poloa‘iga a le tupu.
24. O le fa‘atuatua na lē mafai ai e Mose, ‘ina ‘ua matua o ia, ‘ona ia ta‘ua o ia o le tama a le afafine o Farao.
25. ‘Ua filifili o ia ‘ia agaleagaina o ia fa‘atasi ma tagata o le Atua e lelei ai, ‘ae ‘aua le ‘iā te ia le fiafia i le agasala e vave mavae.
26. ‘Ua manatu o ia i le ‘upu fāifai ‘ona o Keriso o le ‘oa lea e sili i fa‘aputuga ‘oa o Aikupito; auā sa fa‘anaunau o ia i le taui.
27. O le fa‘atuatua na tu‘uina ai e ia o Aikupito, ‘ua lē fefe i le ita o le tupu; auā na fa‘amalosi o ia pei o sē iloa atu i le lē o va‘aia.
28. O le fa‘atuatua na ia fai ai le paseka, ma le sausauina atu o le toto, ‘ina ‘ia lē papa‘i ane ‘iā i latou o lē na fano ai ulumatua.
29. O le fa‘atuatua ‘ua latou ui ai i le sami ulaula pei o le ‘ele‘ele matūtū; ‘ua taumafai i ai tagata Aikupito, ‘ona malelemo ai lea o i latou.
30. O le fa‘atuatua na solo ai pā o Ieriko, ‘ina ‘ua fa‘ata‘amiloina i ona aso e fitu.
31. O le fa‘atuatua, na lē oti fa‘atasi ai Raava le fafine talitane ma ē na fa‘alogogatā, ‘ina ‘ua talifilemūina o ia ē na asiasi i le nu‘u.
32. Se a fo‘i la‘u e toe fai atu? Auā e sa‘asa‘a le aso e tala atu ai ‘iā Kitiona, ma Parako, ma Samasoni, ma Iefata, ma Tavita, ma Samuelu, ma le ‘au perofeta.
33. O ē na fa‘ato‘ilaloina mālō i le fa‘atuatua, na fai ai amiotonu, na maua ai mea na folafolaina, ‘ua pupuni ai gutu o leona.
34. Na tinei ai le malosi o le afi, na sao ai i le mata o le pelu, na fa‘amalosia ai i latou, sa vaivai, na ‘avea ai ma fitafita i tau‘a, na tutuli ai ‘au a nu‘u ‘ese.
35. Na maua mai e fafine o latou tagata oti ‘ina ‘ua toetū mai; na fa‘ataugāina nisi, ‘ua lē talia e i latou le olataga, ‘ina ‘ia maua e i latou le toetū mai e sili ‘ona lelei.
36. Na tofotofoina isi i tauemuga, ma sasaina, ‘atoa ma noanoataga, ma tu‘uina i fale puipui.
37. Na fetogia i latou i ma‘a, na vaevae‘esea i ‘ili, na oti i latou na fasia i le pelu, na feoa‘i solo ma ‘o‘ofu i pa‘u mamoe ma pa‘u ‘oti; o mativa i latou ma puapuagātia ma fa‘asaunoaina.
38. E lē aogā le lalolagi ‘ona i ai o i latou; na feoa‘i solo i latou i vao, ma mauga, ma ana, ma lua i le ‘ele‘ele.
39. O i latou uma ia o ē na ta‘uleleia ‘ona o le fa‘atuatua, na lē maua o i latou le mea na folafolaina.
40. ‘Ina ‘ua saunia e le Atua se tasi mea e sili ‘ona lelei mo i tatou, ‘ina ‘ia lē fa‘a‘ato‘atoaina i latou pe a lē i ai i tatou.