1. O le ‘a‘ano lenei o mea o lo‘o tautala ai nei, ‘ua ‘iā i tatou le ositaulaga sili e fa‘apenā, o lē ‘ua nofo i le itū taumatau o le nofoāli‘i o lē Silisili‘ese o i le lagi.
2. O le ‘au‘auna i le mea pa‘ia, ma le fale fetāfa‘i moni, sa fa‘atūina e le Ali‘i, ‘ae lē o tagata.
3. Auā ‘ua tofia ositaulaga sili uma ‘ina ‘ia ositaulaga i mea alofa ma taulaga; o le mea lea e ao ai ‘ina ‘ia i ai fo‘i i lenei ositaulaga sili o se mea e ositaulaga a‘i.
4. Auā ‘āfai ‘ana i ai o ia i le lalolagi, po ‘ua lē fai o ia ma ositaulaga, auā o lo‘o i ai ositaulaga o ē ositaulaga i mea alofa e tusa ma le tulafono.
5. O ē e ‘au‘auna i le mea fa‘aa‘oa‘o ma le ata o mea fa‘alelagi, pei ‘ona a‘oa‘oina o Mose e le Atua, ‘ina a fai le fale fetāfa‘i; auā na fetalai mai o ia, “‘Ia oe, ne‘i e lē faia mea uma lava e pei o le fa‘atusa sa fa‘aali atu ‘iā te oe i le mauga.”
6. A o lenei, ‘ua maua e ia le faiva e sili, e pei ‘ona faia o ia ma puluvaga o le feagaiga e sili ‘ona lelei, o le ‘ua fa‘amauina i mea na folafolaina e sili ‘ona lelei.
7. Auā ‘ana sa‘o ‘ona lelei o le feagaiga na muamua, po ‘ua lē sā‘ilia sona lua.
8. Auā ‘ua ta‘ua e ia ‘ua lē sa‘o lē na muamua, ‘ona fetalai atu lea o ia ‘iā te i latou, o lo‘o fetalai mai le Ali‘i,“O lo‘o fetalai mai le Ali‘i, Fa‘auta mai, e o‘o mai ona aso,‘ou te osi ai se feagaiga fou ma le ‘āiga o Isaraelu ‘atoa ma le ‘āiga, o Iuta.
9. E lē pei o le feagaiga na ‘ou faia ma o latou tamā,i le aso na ‘ou tago atu ai i o latou lima e ta‘ita‘i atu ‘iā te i latou nai le nu‘u o Aikupito.Auā o lo‘o fetalai mai le Ali‘i, na lē tumau i latou i la‘u feagaiga,‘ona ‘ou tu‘ulafoa‘i ai lea ‘iā te i latou.
10. A o le feagaiga lenei ‘ou te faia ma le ‘āiga o Isaraelupe a mavae atu ia aso, o lo‘o fetalai mai ai le Ali‘i,‘ou te tu‘uina atu a‘u tulafono i o latou mafaufau,ma ‘ou tusia i o latou loto.E fai fo‘i a‘u mo latou Atua,e fai fo‘i i latou mo‘u nu‘u.
11. Latou te lē a‘oa‘o atu fo‘i ta‘itasi i lē la te tuā‘oi, ma ta‘itasi i lona uso,e fa‘apea atu, ‘‘Ia e iloa le Ali‘i.’Auā e iloa a‘u e tagata uma lava,o tagatanu‘u ‘atoa ma ali‘i.
12. Auā ‘ou te fa‘amāgalo ‘iā latou amioleaga,‘ou te lē toe manatua fo‘i a latou, agasala ma o latou solitulafono.”
13. O lana fetalaiga lea, “O le feagaiga fou,” ‘ua ta‘utuai ai e ia o lē ‘ua muamua; a o le mea ‘ua ta‘utuai ma ‘ua tauāu ‘ina vaivai, ‘ua latatala lea ‘ina mavae.#