1. O a‘u o Paulo, o le ‘aposetolo a Iesu Keriso i le finagalo o le Atua, ma lo tatou uso o Timoteo.I le ekalesia a le Atua o i Korinito, ‘atoa ma le ‘au pa‘ia uma o i Akaia uma lava.
2. ‘Ia ‘iā te ‘outou le alofa tunoa ma le manuia mai le Atua lo tatou Tamā, ‘atoa ma le Ali‘i o Iesu Keriso.
3. ‘Ia fa‘amanūina le Atua, o le Tamā o lo tatou Ali‘i o Iesu Keriso, o le Tamā e ona le alofa mutimutivale, o le Atua fo‘i e ana le fa‘amafanafanaga uma.
4. O lē na te fa‘amafanafanaina mai ‘iā te i matou i le matou puapuagā uma lava, ‘ina ‘ia matou mafaia ‘ona fa‘amafanafana atu ‘iā te i latou ‘ua maua i se tasi lava puapuagā, i le fa‘amafanafanaga ‘ua fa‘amafanafanaina ai i matou e le Atua.
5. Auā pei ‘ona tele ‘iā i matou o tigā ‘ona o Keriso ‘ua fa‘apea fo‘i ‘ona tele o le fa‘amafanafanaina o i matou e Keriso.
6. Pe ‘āfai ‘ua puapuagātia i matou, ‘ua fa‘apeaina ‘ona o le fa‘amafanafanaina ma fa‘aolaina o ‘outou, o lo‘o matuā galue ma le ‘onosa‘i i ia lava tigā ‘ua matou tigā ai; pe ‘āfai fo‘i ‘ua fa‘amafanafanaina i matou, ‘ua fa‘apeaina ‘ona o le fa‘amafanafanaina ma le fa‘aolaina o ‘outou.
7. ‘Ua tumau fo‘i lo matou fa‘atuatua ‘iā te ‘outou; o lo‘o matou iloa, fa‘apei ‘ona fa‘atasia ‘outou i tigā, e fa‘apea fo‘i i le fa‘amafanafanaina.
8. Auā le ‘au uso e, matou te loto ‘ina ‘ia ‘outou iloa lo matou puapuagā na o‘o mai ‘iā te i matou i Asia, sa silisili ‘ona mafatia tele ai o i matou, e le‘i a‘u i ai lo matou malosi, na o‘o lava ‘ina matou masalo ai a matou oti.
9. A o i matou, sa i o matou loto le manatu o le a oti, ‘ina ne‘i matou fa‘atuatua ‘iā te i matou, a ‘ia fa‘atuatua i le Atua na te toe fa‘atūina ē ‘ua oti.
10. O lē na lavea‘i mai ‘iā i matou ai le oti e matuā leaga, o le a lavea‘i mai fo‘i, ‘ua matou fa‘amoemoe fo‘i ‘iā te ia, na te lavea‘i mai pea ‘iā te i matou.
11. O ‘outou fo‘i o lo‘o fesoasoani mai i le tatalo mo i matou, ‘ina ‘ia fa‘afetai atu le to‘atele ‘ona o i matou i le alofa na o‘o mai ‘iā te i matou ‘ona o le to‘atele.
12. Auā o lenei le mea matou te mitamita ai, o le mau a le matou loto fuatia ifo, o le pa‘ia ma le fa‘amaoni fa‘aleatua sa matou amio ai i totonu o lenei lalolagi, ‘ae maise i le fa‘afeagai ma ‘outou, e lē ‘ona o le poto fa‘alelalolagi, a o le alofa tunoa o le Atua.
13. E leai se mea ‘ua matou tusia e lē mafai ‘ona ‘outou faitau ma malamalama i ai; ‘ua ‘ou fa‘amoemoe fo‘i o le a ‘ato‘atoa lo ‘outou malamalama.
14. E pei ‘ona fa‘alē‘ato‘atoa nei lo ‘outou malamalama i lenei mea. ‘Ua mafai ai ‘ona ‘outou mitamita ‘ona o i matou ‘ia fa‘apea fo‘i ‘ona matou mitamita ‘ona o ‘outou i le Aso o le Ali‘i o Iesu.
15. O lo‘u mautinoa fo‘i i lenei mea, sa ‘ou manatu ai ‘ou te mua‘i alu atu ‘iā te ‘outou, ‘ina ‘ia ‘outou maua fa‘alua se alofa;
16. ‘ou te ui atu ai ‘iā te ‘outou i Maketonia, ‘ou te toe sau fo‘i ‘iā te ‘outou mai Maketonia, ‘ona molia ai lea o a‘u e ‘outou i Iutaia.
17. O lenei, pe i ai ‘ea sa‘u manatu fa‘alētonu ‘ina ‘ua fa‘apea ‘ona ‘ou filifili? Pe ‘ou te filifili ‘ea i la le tino i mea ‘ou te filifili ai, ‘ina ‘ia ‘iā te a‘u le “Ioe, ioe,” ma le “Leai, leai?”
18. ‘Ae fa‘amao‘i le Atua, sa lē “Ioe ma Leai” la matou ‘upu ‘iā te ‘outou.
19. Auā o le Alo o le Atua, o Iesu Keriso o lē na tala‘iina atu ‘iā te ‘outou e i matou, o a‘u ma Siluano, ma Timoteo, sa lē “Ioe ma Leai,” a ‘ua ‘iā te ia na o le “Ioe lava.”
20. Auā o ia o le “Ioe” i mea uma ‘ua folafolaina e le Atua, o le mea lea ‘ua tatou “Amene” ai fo‘i e ala ‘iā te ia, e o‘o ai le vi‘iga o le Atua.
21. O lē fa‘atumauina fo‘i i matou fa‘atasi ma ‘outou ‘iā Keriso, ma na fa‘au‘uina i tatou, o le Atua lea;
22. o lē ‘ua fa‘amaufa‘ailogaina mai i tatou, ma ‘ua foa‘iina mai le fa‘amaoni o le Agaga i o tatou loto.
23. ‘Ou te augani fo‘i, ‘ia sisila mai le Atua i lo‘u nei loto, o lo‘u fa‘apelepele ‘iā te ‘outou, na lē o‘o ai la‘u malaga i Korinito.
24. E leai fo‘i so matou e fia pule i lo ‘outou fa‘atuatua, a o fesoasoani i matou i lo ‘outou ‘oli‘oli; auā o le fa‘atuatua tou te tumau ai.#