Le mataupu

  1. 1
  2. 2
  3. 3
  4. 4
  5. 5
  6. 6
  7. 7
  8. 8
  9. 9
  10. 10
  11. 11
  12. 12
  13. 13

Feagaiga Tuai

Feagaiga Fou

2 Korinito 12 O LE TUSI PA'IA - Ekalesia Katoliko Roma (RSCB)

O le Mitamita o Paulo i ona Puapuagā

1. E ao ‘ina ‘ou mitamita; e lē aogā fo‘i, a o le a o‘o atu la‘u ‘upu i mea na va‘aia ma fa‘aaliga mai le Ali‘i.

2. ‘Ua ‘ou iloa le tasi tagata o Keriso, ‘ua tasi le sefulu ma le fa o tausaga talu ‘ona segia o ia i le lagi tua tolu, — ‘ou te lē iloa pe na i le tino, ‘ou te iloa pe le‘i i le tino; ‘ua silafia le Atua. —

3. ‘Ua ‘ou iloa fo‘i na segia lenā tagata i parataiso, — ‘ou te lē iloa pe na i le tino o ia, pe lē i le tino; ‘ua silafia le Atua. —

4. na fa‘alogo fo‘i o ia i ‘upu e lē mata‘uta‘ua, e lē tatau fo‘i i se tagata ‘ona tautala i ai.

5. O lenā tagata ‘ou te mitamita ai, a ‘ou te lē mitamita ‘iā te a‘u, tau lava o mea ‘ua ‘ou vaivai ai.

6. Auā ‘āfai ana ‘ou fia mitamita, po ‘ua ‘ou lē valea ai; auā o le ‘upu moni ‘ou te fai atu ai; ‘ae sōia, ‘ina ne‘i sili le manatu o se tasi ‘iā te a‘u i mea e va‘ai mai e ia ‘iā te a‘u, po o mea e fa‘alogo mai e ia ‘iā te a‘u.

7. ‘Ina ne‘i fa‘amaualuga a‘u i le silisili ‘ese o mea na fa‘aalia mai, sa tu‘uina mai ‘iā te a‘u le mea matuitui i le tino, o le agelu a Satani, e tu‘i mai ‘iā te a‘u, ‘ina ne‘i ‘ou fa‘amaualuga.

8. Na ‘ou ‘ai‘oi fa‘atolu atu i le Ali‘i ‘ona o lea mea, ‘ina ‘ia alu ‘ese ‘iā te a‘u.

9. ‘Ona fa‘apea mai ai lea o ia ‘iā te a‘u, “O lo‘u nei alofa tunoa e lava lea e fesoasoani ‘iā te oe; auā o le vaivai e fa‘a‘atoaina ai lo‘u mana.” O lea ‘ua tele ai lava lo‘u fiafia i le mitamita i mea ‘ua ‘ou vaivai ai, ‘ina ‘ia tumau i o‘u luga le mana o Keriso.

10. O lea ‘ou te fiafia ai i mea e vaivai ai, o le fa‘aleaga mai, o malaia, o le agatele mai, o le atuatuvale ‘ona o Keriso; auā pe a ‘ou vaivai, ‘ona ‘ou malosi ai lea.

O le Naunauta‘i o Paulo i tagata o Korinito

11. ‘Ua ‘avea a‘u ma vale; a ‘ua tōsina a‘u e ‘outou; auā ‘ana vi‘ia a‘u e ‘outou po ‘ua tatau ai; auā e ui lava ‘ina ‘ou fa‘atauva‘a lava, e leai se mea ‘ou te itiiti ai i ‘aposetolo silisili.

12. Na faia lava fa‘ailoga o le ‘aposetolo ‘iā te ‘outou i le ‘onosa‘i uma, i fa‘ailoga ma vāvega ma mea mamana.

13. Se a se tasi mea na lē tusa ai ‘outou ma nisi ekalesia, na o lea ‘ina ‘ua lē tigāina ‘outou ‘iā te a‘u? ‘Inā fa‘amāgalo mai ia ‘iā te a‘u i lenā agaleaga.

14. Fa‘auta, ‘ua atu tolu lo‘u sauni ‘ou te alu atu ‘iā te ‘outou; ‘ou te lē fa‘atigā fo‘i ‘iā te ‘outou; auā ‘ou te lē sā‘ili ‘iā ‘outou mea, ‘ae peita‘i o ‘outou lava; auā e lē tatau ‘ona fa‘aputu ‘oa e le fānau mo mātua, a o mātua mo le fānau.

15. ‘Ou te matuā fiafia lava e fa‘auma a‘u mea, ia fa‘aumatia fo‘i a‘u ‘ona o ‘outou agaga; auā e ui lava ‘ina atili ai ‘ona itiiti ‘ona alofagia o a‘u, ‘ae matuā tele pea lo‘u alofa atu ‘iā te ‘outou.

16. ‘Inā tu‘u ia o lea. Na lē mafatia ‘outou ‘iā te a‘u; a o la‘u fai togafiti ‘ua maua ai ‘outou e a‘u i le ‘ole‘ole.

17. Pe na ‘ou sā‘ili mea ‘iā te ‘outou ma le ‘ole‘ole e so latou na ‘ou ‘auina atu ‘iā te ‘outou?

18. Na ‘ou ‘ai‘oi ‘iā Tito, na ‘ou ‘auina atu fo‘i i lā‘ua ma le tasi uso. Pe na sā‘ili mea ‘ea Tito ‘iā te ‘outou ma le ‘ole‘ole? Na matou lē sāvavali ‘ea ma le loto e tasi? Na matou lē tulagāvae fa‘atasi ‘ea?

19. O lenei, tou te manatu ‘ea matou te fa‘atonu atu la matou amio ‘iā te ‘outou? O lo‘o i luma o le Atua, o matou o tautala atu ai nei o i matou ‘ua ‘iā Keriso; le ‘au pele e, ‘ua faia ia mea uma e fa‘amafanafanaina ai ‘outou.

20. Auā ‘ou te fefe ne‘i iloa ‘outou e a‘u, e lē fa‘apei ‘ona ‘ou loto i ai, pe a ‘ou alu atu, ne‘i iloa fo‘i a‘u e ‘outou, e lē pei ‘ona ‘outou loto i ai; ne‘i ‘iā te ‘outou o misa, o fa‘amatatau‘a, o fa‘alotoa, o finau vale, o ‘upu‘esega, o tuaupua, o loto fa‘afefeteina, o fa‘alētaupulea.

21. ‘Ina ne‘i fa‘amaulaloina a‘u e lo‘u Atua ‘ona o ‘outou, i lo‘u toe alu atu ‘iā te ‘outou; ‘ona ‘ou fa‘anoanoa lea i nisi e to‘atele o ē na agasala anamua, ma ‘ua lē salamō i le amio leaga, ma le faita‘aga, ma le mataitu na latou faia.#