1. Sa fa‘apea fo‘i lo‘u lava manatu, ‘ou te lē toe alu atu ‘iā te ‘outou ma le tigā.
2. Auā ‘āfai ‘ou te fa‘atigā ‘iā te ‘outou, po o ai sē na te fa‘afiafia mai ‘iā te a‘u, ‘āfai e lē o ia ‘ua fa‘atigāina e a‘u?
3. Sa ‘ou tusi atu fo‘i lea lava mea ‘iā te ‘outou, ‘ina ne‘i ‘ou alu atu ‘ona fa‘atigāina lea o a‘u e i latou o ē ‘ua tatau ‘ona ‘ou ‘oli‘oli ai; ‘ou te fa‘atuatua lava ‘iā te ‘outou uma, o lo‘u nei fiafia, o le fiafia lea o ‘outou uma.
4. Auā o le puapuagā tele ‘atoa ma le atuatuvale o le loto na ‘ou tusi atu ai ‘iā te ‘outou ma loimata e tele; e le‘i ‘ina ‘ia fa‘atigāina ‘outou, a ‘ia ‘outou iloa ai lo‘u alofa ‘ua matuā tele ‘iā te ‘outou.
5. O lenei, ‘āfai ‘ua fa‘atupuina le tigā e se tasi, ‘ua ia lē fa‘atigā ‘iā te a‘u na o a‘u, ‘ae peita‘i (‘ina ne‘i ‘ou fa‘amamafa atu), ‘atoa ma ‘outou uma.
6. Sōia le faia se tasi mea i lenā tagata, tau lava o lenā sala na fa‘asalaina ai o ia e le to‘atele.
7. A o lenei, ‘ia ‘outou fa‘amāgalo atu ma fa‘amafanafana atu i lenā tagata, ‘ina ne‘i tofatumoanaina o ia i le tigā matuā tele.
8. O lea ‘ou te ‘ai‘oi atu ai ‘iā te ‘outou ‘ina ‘ia fa‘amauina lo ‘outou alofa ‘iā te ia.
9. O le mea lava lea na ‘ou tusi atu ai, ‘ina ‘ia ‘ou iloa le fa‘ailoga ‘iā te ‘outou, po ‘ua ‘outou ‘ana‘ana i mea uma.
10. O lē ‘ua ‘outou fa‘amāgalo atu i ai se mea, o a‘u fo‘i lea; auā ‘āfai ‘ua ‘ou fa‘amāgalo atu se mea, o lē ‘ua ‘ou fa‘amāgalo atu i ai, ‘ua ‘ou faia lea ‘ona o ‘outou i luma o Keriso;
11. ‘ina ne‘i ‘ole‘olegia i tatou e Satani; auā tatou te lē vālea i ana togafiti.
12. Na ‘ou alu atu fo‘i i Teroa ‘ona o le tala lelei ‘iā Keriso, na tōina mai fo‘i ‘iā te a‘u se faitoto‘a e le Ali‘i,
13. a ‘ou te le‘i iloa sina filemū i lo‘u loto, ‘ina ‘ua ‘ou lē maua lo‘u uso o Tito; a ‘ua ‘ou fa‘amāvae atu ‘iā te i latou, ‘ona ‘ou alu atu lea i Maketonia.
14. ‘Ua fa‘afetai i le Atua, o lē ‘ua matou manumālō ai pea lava ‘ona o Keriso, o lē ‘ua matou fa‘aali atu ai fo‘i i nu‘u uma le manogi o le matā‘upu ‘iā te ia.
15. Auā o le nanamu i matou ‘iā Keriso i le Atua i ē o fa‘aolaina, ‘atoa ma ē o malaia;
16. o le manogi o le oti e o‘o i le oti i nisi; a o le manogi o le ola e o‘o i le ola i nisi. Po o ai fo‘i sē tusa ma nei mea?
17. Auā o i matou nei, e lē pei o le to‘atele o ē o fa‘afilogia le afioga a le Atua; a ‘ua matou tautalatala atu mai le loto lelei, mai le Atua fo‘i, o i luma o le Atua, o i matou ‘ua ‘iā Keriso.#