Le mataupu

  1. 1
  2. 2
  3. 3
  4. 4
  5. 5
  6. 6
  7. 7
  8. 8
  9. 9
  10. 10
  11. 11
  12. 12
  13. 13
  14. 14
  15. 15
  16. 16

Feagaiga Tuai

Feagaiga Fou

1 Korinito 16 O LE TUSI PA'IA - Ekalesia Katoliko Roma (RSCB)

O Sauniga ‘Ese‘ese ma le Moliga o le Alofa

1. A o le aotelega mo le ‘au pa‘ia, pei ‘ona ‘ou poloa‘i atu i ekalesia i Kalatia, ‘ia fa‘apea fo‘i ‘outou ‘ona fai.

2. O le aso muamua o lea vaisapati ma lea vaisapati, ‘ia ‘outou ta‘itasi ma tu‘u ane ai ni ana mea, ‘ia fa‘atatau mea e teu ma lona manuia ‘ina ne‘i faia ni aotelega pe a ‘ou alu atu.

3. Pe a ‘ou alu atu, ‘ona ‘ou ‘auina atu lea ma le tusi o i latou ē filifilia e ‘outou, latou te momoli atu ‘iā ‘outou mea alofa i Ierusalema;

4. ‘ae ‘āfai e tatau ‘ona ‘ou alu fo‘i, matou te o fa‘atasi ma a‘u.

O Fuafuaga a Paulo

5. ‘Ou te alu atu fo‘i ‘ia te ‘outou pe a ‘ou ui ane Maketonia; auā ‘ou te ui ane lava i Maketonia.

6. Atonu fo‘i tatou te mau ma ‘outou, pe se‘ia te‘a mai le tau ma‘alili; ‘ina ‘ia molia e ‘outou la‘u malaga i se mea ‘ou te alu i ai.

7. Auā ‘ou te lē loto ‘ina ‘ou afe atu e asiasi ‘iā te ‘outou i nei ona po; ‘ae ‘ou te fa‘amoemoe ‘ina ‘ia levaleva ane lo‘u nofo ‘iā te ‘outou, pe a finagalo i ai le Ali‘i.

8. ‘Ae ‘ou te nofo pea i Efeso se‘ia o‘o i le Penetekoso.

9. Auā ‘ua fa‘aavanoa mo a‘u le faitoto‘a lautele ma le matuā aogā, e to‘atele fo‘i o ē fa‘atu‘i ‘ese.

10. ‘Āfai e alu atu Timoteo, ‘ia ‘outou fa‘aeteete ‘ina ‘ia ‘iā te ‘outou o ia ma le lē mata‘u; auā ‘ua faia e ia le galuega a le Atua pei o a‘u nei lava.

11. O le mea lea ‘aua ne‘i ta‘ufa‘atauva‘aina ai o ia e se tasi, a ‘ia molia mai o ia e ‘outou ma le saogalemū, se‘ia o‘o mai o ia ‘iā te a‘u; auā ‘ou te fa‘atalitali atu ‘iā te ia ma le ‘au uso.

12. O lo tatou uso fo‘i o Apolo, sa tele lo‘u ‘ai‘oi atu ‘iā te ia, ‘ina ‘ia latou ō atu ma le ‘au uso ‘iā te ‘outou; ‘ae lē loto lava ia ‘ina alu atu i ona po nei, ‘ae alu atu pe a o‘o mai ona pō e tatau ai.

O ‘Upu Mulimuli

13. ‘Inā mataala ia ‘outou, ‘ia ‘outou tumau i le fa‘atuatua, ‘ia ‘outou fa‘atamatane, ‘ia fa‘amalolosi ‘outou.

14. ‘Ia faia uma a ‘outou mea i le alofa.

15. Le ‘au uso e, ‘ua ‘outou iloa le ‘āiga o Setefana, o le fa‘apolopolo i latou i Akaia, ma ‘ua tu‘uina atu i latou e i latou e ‘au‘auna i le ‘au pa‘ia; ‘ou te ‘ai‘oi atu ‘iā te ‘outou,

16. ‘ia ‘outou usiusita‘i i ē o fa‘apea, ‘atoa ma i latou uma o ē fesoasoani mai ma tautigāina.

17. ‘Ua ‘ou fiafia i le o‘o mai o Setefana ma Fotunato ma Akaiko, auā ‘ua latou fa‘a‘ato‘atoa mai a ‘outou mea sa totoe;

18. auā ‘ua latou fa‘amafanafanaina lo‘u loto, ‘atoa ma lo ‘outou; o le mea lea ‘ia ‘outou tali lelei ai i ē ‘ua fa‘apea.

19. O lo‘o alolofa atu ‘iā te ‘outou ekalesia o i Asia. O lo‘o alolofa tele ‘iā te ‘outou i le Ali‘i o Akula ma Pisila, ma le ekalesia i lo la fale.

20. O lo‘o alolofa atu ‘iā te ‘outou le ‘au uso uma.‘Ia ‘outou fealofani i le feasogi pa‘ia.

21. O a‘u o Paulo, si ‘ou alofa atu ‘iā te ‘outou i la‘u lava tusilima.

22. ‘Ai se tagata e lē alofa i le Ali‘i o Iesu Keriso ‘ia anatema maranata lava ia.

23. ‘Ia ‘iā te ‘outou le alofa tunoa o le Ali‘i o Iesu Keriso.

24. ‘Ia ‘iā te ‘outou uma lo‘u alofa ‘iā Keriso Iesu. Amene.