1. O le mea lea matou te lē fa‘avaivai ai, o i matou ‘ua i ai lenei faiva, ‘ina ‘ua alofaina i matou;
2. a ‘ua matou lafoa‘i mea lilo e māsiasi ai, e lē o sāvavali ma le amio pepelo, e lē o fa‘afilogia e i matou le afioga a le Atua; a ‘ua fa‘ailoa matou e i matou i le loto fuatia ifo o tagata uma i luma o le Atua i lo matou fa‘aali atu le ‘upu moni.
3. ‘Āfai fo‘i ‘ua ufitia la matou tala lelei, ‘ua ufitia ia i ē ‘ua fano;
4. ‘ua fa‘atauasoina manatu o i latou o ē lē fa‘atuatua e le atua o le lalolagi nei, ‘ina ne‘i pupula atu ‘iā te i latou le malamalama o le tala lelei i le mamalu o Keriso, o ia fo‘i o le fa‘atusa o le Atua.
5. Auā matou te lē tala‘iina i matou, a o Keriso Iesu le Ali‘i; o i matou nei fo‘i o a ‘outou ‘au‘auna ‘ona o Iesu.
6. Auā o le Atua o lē na fai atu, “‘Ia pupula mai le malamalama mai le pouliuli,” ‘ua fa‘apupula mai e ia i o matou loto, ‘ina ‘ia malamalama e iloa ai le mamalu o le Atua i fofoga o Iesu Keriso.
7. A ‘ua ‘iā te i matou lenei ‘oa i ipu ‘omea, ‘ina ‘ia i le Atua le matuā tele o le mana, ‘ae lē mai ‘iā te i matou.
8. ‘Ua puapuagātia i matou i mea uma, ‘ae lē fa‘aatuatuvaleina; ‘ua femēmēa‘i, a e lē matuā femēmēa‘i;
9. ‘ua sauāina, ‘ae lē tu‘ulafoa‘iina; ‘ua lafotūina i lalo, ‘ae lē fano;
10. o lo‘o tau‘ave i le tino e lē aunoa le fasiotia o le Ali‘i o Iesu, ‘ina ‘ia fa‘aalia fo‘i le soifua o Iesu i o matou tino.
11. Auā o i matou nei o lo‘o ola ‘ua tu‘uina atu pea lava i le oti ‘ona o Iesu, ‘ina ‘ia fa‘aalia fo‘i le soifua o Iesu i o matou tino ‘augavale.
12. O lenei, ‘ua galue le oti i totonu ‘iā te i matou, a o le ola i totonu ‘iā te ‘outou.
13. O lo‘o ‘iā te i matou lea lava agaga fa‘atuatua, pei ‘ona tusia, “‘Ua ‘ou fa‘atuatua o le mea lea na ‘ou tautala atu ai; o i matou fo‘i ‘ua matou fa‘atuatua, o le mea lea ‘ua matou tautala atu ai.”
14. ‘Ua iloa e i matou, o ia na toe fa‘atū le Ali‘i o Iesu, e toe fa‘atutūina fo‘i e ia i matou ‘iā Iesu, ma ‘aumaia i matou fa‘atasi ma ‘outou i ona luma.
15. Auā ‘ona o ‘outou o mea uma, ‘ina ‘ia fa‘atele ai le vi‘iga i le Atua e le fa‘afetai o le to‘atele ‘ona o le alofa tunoa ‘ua matuā tele.
16. O le mea lea matou te lē fa‘avaivai ai; auā e ui lava ‘ina tauāu ‘ina uma lo matou tagata i fafo, ‘ua fa‘afouina lē i totonu i lea aso ma lea aso.
17. Auā o lo matou puapuagā māmāsagia ma le vave mavae, e saunia ai mo i matou le mamafa o le mamalu fa‘avavau e matuā silisili ‘ese fo‘i.
18. O lo‘o matou lē mānatunatu i mea ‘ua va‘aia, a o mea e lē va‘aia; auā o mea ‘ua va‘aia e gata mai ia, a o mea e lē va‘aia e fa‘avavau ia.#