1. O lenei, le ‘au pele e, ‘ona ‘ua ‘iā te i tatou o ia ‘upu ‘ua folafolaina mai, ‘ia tatou fa‘amamā ‘iā te i tatou i mea uma e leaga ai le tino ‘atoa ma le agaga, ‘ia fa‘a‘ato‘atoaina lo ‘outou fa‘apa‘iaina i le mata‘u i le Atua.
2. ‘Ia fa‘aavanoa mai ‘outou loto ‘iā te i matou; matou te le‘i agaleaga atu i se tasi, matou te le‘i fa‘aleagaina se tasi, matou te le‘i ‘olegia se tasi.
3. ‘Ou te lē fa‘apea atu e a‘oa‘i ‘iā te ‘outou; auā ‘ua uma ‘ona ‘ou mua‘i fai atu, o lo‘o i o matou loto ‘outou, tatou te oti fa‘atasi ma ola fa‘atasi.
4. E tele lo‘u fa‘amalosi atu ‘iā te ‘outou, ‘ua tele lo‘u mitamita ‘ona o ‘outou; ‘ua fa‘atumuina a‘u i le mafanafana, ‘ou te matuā ‘oli‘oli tele lava i lo matou puapuagā uma.
5. Auā na matou ō mai i Maketonia sa leai se mapu i o matou tino, ‘ae peita‘i sa puapuagātia i matou i mea uma, o tau‘a i fafo, o i totonu o mata‘u.
6. A o le Atua o lē na te fa‘amafanafanaina ē ‘ua fa‘amaulaloina, na ia fa‘amafanafana mai ‘iā te i matou i le o‘o mai o Tito;
7. e lē na o lona o‘o mai, ‘ae peita‘i o le fa‘amafanafanaga fo‘i na fa‘amafanafanaina ai o ia e ‘outou, i lona ta‘u mai ‘iā te i matou lo ‘outou naunau tele, lo ‘outou tagi tele, lo ‘outou mā‘elegā mai ‘iā te a‘u; o le mea lea sa atili ai lo‘u ‘oli‘oli.
8. Auā ‘āfai na ‘ou fa‘atigā ‘iā te ‘outou i le tusi, ‘ou te lē salamō ai, e ui lava ‘ina ‘ou salamō ai; auā ‘ua ‘ou iloa sa fa‘atigāina ‘outou i lenā tusi, na o sina itū aso.
9. O lenei, ‘ou te ‘oli‘oli, e lē ‘ona ‘ua ‘outou tigā, a ‘ona ‘ua i‘u lo ‘outou tigā i le salamō; auā na fa‘atigāina ‘outou e tusa i le Atua, ‘ina ne‘i leaga ‘outou ‘iā i matou i se mea e tasi.
10. Auā o le tigā e tusa i le Atua e tupu ai le salamō e o‘o i le fa‘aolataga e lē toe sa‘afi ai; a o le tigā fa‘alelalolagi e tupu ai le oti.
11. Fa‘auta fo‘i i lenei lava mea, na tigā ‘outou e tusa i le Atua, ‘ua tele lava le filigā na tupu ai ‘iā te ‘outou, i le ma le fa‘atonu, i le ma le loto tigā, i le ma le mata‘u, i le ma le naunau tele mai, i le ma le mā‘elegā, i le ma le taui atu. ‘Ua uma ‘ona fa‘ailoa ‘outou e ‘outou ‘ua ‘outou mamā i lenā mea.
12. O lenei, e ui lava ‘ina ‘ou tusi atu ‘iā te ‘outou, na ‘ou lē faia ‘ona o ia na agaleaga, e lē ‘ona o ia fo‘i na agaleagaina ‘ae peita‘i ‘ina ‘ia fa‘aali atu ‘iā te ‘outou lo matou filigā ‘ona o ‘outou, i luma o le Atua.
13. O le mea lea na fa‘amafanafanaina ai i matou i le fa‘amafanafanaina o ‘outou; sa matuā tele lo matou ‘oli‘oli, ‘ua atili ai ‘ona o le ‘oli‘oli o Tito, auā sa to‘afilemū lona loto ‘iā te ‘outou uma.
14. Auā ‘āfai na ‘ou mitamita ‘iā te ia i se mea ‘ona o ‘outou, ‘ou te lē mā ai; ‘ae pei ‘ona moni o ‘upu uma na matou tautala atu ai ‘iā te ‘outou, e fa‘apea fo‘i lo matou mitamita ‘iā Tito, ‘ua i‘u ‘ina fa‘amaoni lea.
15. ‘Ua atili ai ‘ona mutimutivale o lona alofa ‘iā te ‘outou, i lona manatua o le ‘ana‘ana o ‘outou uma, ‘ina ‘ua talia o ia e ‘outou ma le mata‘u ma le gatete.
16. O lea ‘ou te ‘oli‘oli ai ‘ina ‘ua ‘ou fa‘atuatua ‘iā te ‘outou i mea uma.