1. ‘Ae lē aogā ‘ona ‘ou tusi atu ‘iā te ‘outou i le alofa i le ‘au pa‘ia.
2. Auā ‘ua ‘ou iloa i lo ‘outou loto fesoasoani, na ‘ou mitamita ai i luma o Maketonia, i la‘u ta‘u atu ‘iā i latou ‘ua saunia Akaia talu mai le tausaga ‘ua mavae; o lo ‘outou mā‘elegā fo‘i na tupu ai le losilosi i le to‘atele.
3. A ‘ua ‘ou ‘a‘auina atu le ‘au uso lenā, ‘ina ne‘i fa‘alēaogāina lo matou mitamita ‘iā te ‘outou i lenei mea, a ‘ia uma ‘ona ‘outou saunia, pei ‘ona ‘ou fai atu ai;
4. ‘ina ne‘i fa‘amāina i matou, ‘ae tu‘u pea ia ‘outou, i lenei fa‘amalosi i le mitamita, pe ‘āfai matou te ō atu ma ni Maketonia, ‘ona iloa ai lea o ‘outou ‘ua lē uma ‘ona saunia.
5. O le mea lea na ‘ou manatu ai, e tatau ‘ona ‘ou ‘ai‘oi atu i le ‘au uso lenā, latou te muamua atu ‘iā te ‘outou, ‘ia mua‘i sauniuni ai la ‘outou mea alofa, na ta‘ua mai anamua; ‘ina ‘ia uma ‘ona sauni o le mea, e pei o se mea alofa lava, ‘ae lē pei o se mea na tupu i le matape‘ape‘a.
6. A o la‘u lenei e fai atu, o lē ‘ua itiiti ana saito e lūlū, e itiiti fo‘i ana e selesele mai; a o lē ‘ua tele ana e lūlū, e tele fo‘i ana e selesele mai.
7. ‘Ia ta‘ito‘atasi ma foa‘i e pei ‘ona filifili i lona loto; ‘aua ma le tigā, ‘aua fo‘i ma le fa‘atauānauina; auā e alofa le Atua i lē ‘ua foa‘i ma le loto malie.
8. E mafai fo‘i e le Atua ‘ona fa‘afaula‘i ‘iā te ‘outou o mea alofa uma; o lo‘o fa‘alavaina i aso uma o mea uma ‘iā te ‘outou i mea uma lava, ‘ina ‘ia faula‘i ‘iā te ‘outou o galuega lelei uma.
9. Pei ‘ona tusia,“‘Ua ia fa‘asalalauina ana mea; ‘ua ia avatu i ē matitiva,e tumau lana amiotonu e fa‘avavau.”
10. O lenei, o lē ‘ua foa‘i tele mai fatu saito i lē ‘ua lūlū ai, ma le areto e ‘ai ai, o lē a ‘ia foa‘i tele mai lava a ‘outou saito e lūlū ai o le a fa‘ateleina fo‘i e ia le fua o la ‘outou amiotonu.
11. O le a fa‘atamao‘āigaina ‘outou i mea uma lava, e i‘u ai i le matamau uma, e tupu ai le fa‘afetai i le Atua ‘ona o i matou.
12. Auā o le sauniga alofa o lenei galuega, e lē na ‘ona maua mai ai e le ‘au pa‘ia o mea na latou matitiva ai, ‘ae fa‘atele ai le vi‘iga i le Atua i le tele o le fa‘afetai.
13. O le a latou vivi‘i atu i le Atua, auā o le a fa‘ailoa i lenei galuega alofa lo ‘outou gaua‘i lea i le tala lelei ‘iā Keriso, i le ma le matamamau o le alofa fai tele ‘iā te i latou ‘atoa ma tagata uma;
14. o la latou tatalo fo‘i mo ‘outou, o le a naunau tele atu ai ‘iā te ‘outou, ‘ona o le alofa tunoa o le Atua ‘ua matuā tele ‘iā te ‘outou.
15. Fa‘afetai i le Atua i lana mea foa‘i fua e lē mafa‘amatalaina.