1. Le ‘au uso e, matou te fa‘ailoa atu ‘iā te ‘outou le alofa tunoa o le Atua ‘ua foa‘iina mai i ekalesia i Maketonia;
2. auā na tofotofoteleina i latou i puapuagā ‘ua atili ai lo latou ‘oli‘oli, ‘atoa ma lo latou mativa matuā tele, ‘ua sili ai le faula‘i o lo latou matamau.
3. Auā ‘ou te molimau, na latou loto fua i ai e tusa ‘iā latou mea, e sili fo‘i ‘iā latou mea.
4. ‘Ua matuā ‘ai‘oi mai ‘iā te i matou ‘ina ‘ia talia e i matou le mea alofa, o le alofa fai tele lea e fesoasoani i le ‘au pa‘ia.
5. E lē na o lea, pei ‘ona matou fa‘atuatua i ai, a ‘ua mua‘i tu‘uina atu i latou e i latou i le Ali‘i, ma i matou fo‘i i le finagalo o le Atua.
6. ‘Ua i‘u ‘ina matou ‘ai‘oi atu ‘iā Tito, e pei ‘ona amataina e ia o lenei mea alofa, ‘ia fa‘apea fo‘i ‘ona fa‘ai‘uina ai e ia ‘iā te ‘outou.
7. O lenei, e pei ‘ona faula‘i o mea uma ‘iā te ‘outou, o le fa‘atuatua ma le ‘upu, ma le iloa ma le filigā uma, ‘atoa ma lo ‘outou alofa mai ‘iā te i matou, ‘ia fa‘apea fo‘i ‘ona faula‘i ‘iā te ‘outou o i lenei mea alofa.
8. E lē sa‘u ‘upu poloa‘i lenei ‘ou te fai atu ai, a ‘ona o le filigā o isi, e tofotofo fo‘i pe moni lo ‘outou alofa.
9. Auā ‘ua ‘outou iloa le alofa tunoa o lo tatou Ali‘i o Iesu Keriso, sa tamao‘āiga ia, a ‘ua fa‘amativaina ‘ona o ‘outou, ‘ina ‘ia fa‘atamao‘āigaina ‘outou i lona mativa.
10. ‘Ou te fai atu lau manatu ‘iā te ‘outou i lenei mea; auā e aogā lenei mea ‘iā te ‘outou o ē na mua‘i amataina e lē na ‘ona fai, a ‘ua loto fo‘i i ai talu le tausaga ‘ua mavae.
11. O lenei fo‘i, ia ‘outou fa‘auma ‘ona fai, fa‘apei ‘ona ‘outou fiafia i le loto i ai, ia fa‘apea fo‘i ‘ona ‘outou faia i mea ‘ua ‘iā te ‘outou.
12. Auā ‘āfai ‘ua i ai le loto fiafia, e talileleia lea, e tusa ma mea ‘ua ‘iā te ia, ‘ae lē tusa ma mea e lē o ‘iā te ia.
13. ‘Ou te lē mana‘o ‘ina ‘ia mapu nisi, ‘ae lailoa ‘outou;
14. ‘ae fai fa‘atatau ‘ina ‘ia fesoasoani lo ‘outou tamao‘āiga i lo latou matitiva i nei ona po, ma ia fesoasoani lo latou tamao‘āiga i lo ‘outou matitiva i se aso, ‘ina ‘ia fai fa‘atatau;
15. pei ‘ona tusia, “O lē na i ai mea e tele, e leai sana mea ‘ua toe; o lē na i ai mea e itiiti, e leai se mea ‘ua mativa ai o ia.”
16. Fa‘afetai i le Atua, o lē ‘ua tu‘uina lea lava filigā i le loto o Tito ‘ona o ‘outou.
17. Auā ‘ua ia talia le ‘ai‘oi, a ‘ua sili lona mā‘elegā, ‘ua fua lava ‘iā te ia lona alu atu ‘iā te ‘outou.
18. ‘Ua matou ‘auina atu fa‘atasi ma ia lo tatou uso ‘ua vi‘ia i le tala lelei i ekalesia uma;
19. e lē na o lea, a ‘ua filifilia fo‘i o ia e ekalesia matou te ō malaga ma ‘ia e ‘ave lenei mea alofa ‘ua ‘au‘auna i ai i matou, e iloa ai le vi‘iga o le Ali‘i lava ‘atoa ma lo matou loto fiafia.
20. O lo‘o fa‘aeteete i matou i lenei mea, ne‘i ta‘uleagaina i matou e se tasi i lenei faula‘i o mea matou te ‘au‘auna i ai;
21. o lo‘o sauniuni mea matagofie, e lē na o luma o le Ali‘i, ‘ae ‘atoa ma luma o tagata.
22. ‘Ua matou ‘a‘au fa‘atasi ma i lā‘ua lo matou uso, ‘ua matou iloa so‘o lona filigā i mea e tele, a o lenei, ‘ua atili ai ‘ona filigā ‘ona o lona fa‘atuatua tele ‘iā te ‘outou.
23. A fesili mai se tasi ‘iā Tito, ‘ua ma fa‘atasi ma a‘u, ‘ua ma fai galuega fa‘atasi fo‘i ‘iā te ‘outou; a fesili fo‘i i o matou uso, o sāvali i latou a ekalesia, e vi‘ia ai Keriso.
24. O lenei, ‘ia ‘outou fa‘aali atu ‘iā te i latou, i luma fo‘i o ekalesia, se fa‘ailoga o lo ‘outou alofa, ma lo matou mitamita ‘ona o ‘outou.#