1. Upei catu Jae opuâ ja oyeí upegui ja ou Judea cotŷvo pe ŷ Jordan mboypŷri ja upepe iyaty Jendápe tapiaguaicha umi oñembyatŷva, ja oyepocuaa jaicha Jae omboe yeby ichupecuera.
2. Uperamo ôguajê Jendápe fariseo cuera ja ojaâmbotávo Ichupe oporandu Ichupé: ¿Ipôrâpa peteî omendávape ojeyavo jembirecópe?
3. Ja Jae oñeê ichupecuera jeivo: ¿Mbaépa pe Moises rembiapoucapŷ peême?
4. Ja jei jaecuera: Moisés jei icatújá oyapoucá cuatia oyepea jaguâ oyuejegui icatu jaguâ oyojeyá.
5. Upei catu Jesús jei ichupecuera: Pende pya jâtâ járejente omoî cuatiápe peême co tembiapoucapŷ.
6. Upeicharamo yepe pe iñypyrúmbŷpe opambae, Tûpâ Ñandeyára oyapo vaecue ichupecuera cuimbae ja cuña.
7. Upeareje pe cuimbae ojeya vaerâ itúva ja isŷpe oyejeá jaguâ oguembirecó reje,
8. ja upeicha umi mocoî vaecue oñemoingó vaerâ peteî ramonte. Upeicharamo na mocoîvemái jaecuera, peteîntema.
9. Upeicharamo pe Tûpâ Ñandeyára omboyuayú vaecue anive terei ombo yuaby oyuejegui cuimbae cuera.
10. Uperire oikema ramo ogape, jemimboe cuera oporandu yeby Ichupe upe mbae reje avei.
11. Ja Jae jei ichupecuera: Oimeraêva ojeyá vaecue oguembirecópe, omenda yeby ramo cuña ambué reje ombuaiucá ichupe mendaré,
12. ja pe cuña ojeyá reí ramo iménape omenda jaguâ cuimbae ambué reje, jae avei ombuiucá ichupe mendaré.
13. Uperire oguerú Ichupe mitâmimi opoco jaguâ jesecuera. Ja umi jemimboe cuera oyaó ichupecuera.
14. Upei catu Jesús ojecha pype upea, ipochy ja jei ichupecuera: Tové pejeyante toú Che rendape umi mitâmi: anikena peyoco ichupecuera. Coaichagua voí umi Tûpâ Ñandeyára reco marangatu rejegua.
15. Che jae peême catuetei oimeraêva oguerojorŷŷva, Tûpâ Ñandeyára reco marangatu peteî mitâicha, mbaeveicharamo ndoikeichéne pypé.
16. Upei catu Jae ojupi ichupecuera iyŷva ári ja ojovasá peteî teîme ichupecuera omoîvo ipo jese cuera.
17. Upegui osê yebŷvo ojo jaguâ tapepe, sapyaite oñani oúvo peteî cuimbae oñesû Ichupe ja oporandú Ichupe: Ore poromboejára marangatú ¿mbaé mbaépa ayapo vaerâ icatu jaguâ ajupitŷ pe tecové apyraŷva?
18. Ja Jesús jei ichupe: ¿Mbaeréjépa ere Che marangatújá? Ndipóri marangatúva jaetéva, peteî añonte, upéva catu Tûpâ Ñandeyára.
19. Nde reicuaa umi Tûpâ Ñandeyára rembiapoucapy: Ani reporoyuca: Ani rembuai mendare, Ani rembaeabykŷ, Ani remboyá rei nde rapicha reje, Ani reporo mbotaby, Embueté nde rú ja nde sŷ pe.
20. Ja jae jeí Ichupe: Ore poro mboejára, umimbae ambuayepá vaecue che pyajú guivé voí.
21. Upei catu Jesús omaê jesé ja ojayjú gui ichupe oguerojorŷ jeivo: Peteî mbaénte oime reicôtevêva. Terejónte, eñemû opa mbae rerecóva reje, ja emeê jepycué umi mboriajú cuerape, ja upeicharamo rereco vaerâ nembaeteérâ iñongatupŷrâ yvagape, ja eyo Che rapycuéri Che reŷí rejeguarâ.
22. Ja ipyambyasŷ eterei jae jei jague reje Jae ichupe upeicha, ja ojo iñangau: jetambae rerecojá reje co caraí guasú.
23. Upei catu Jesús omaê pypé iyerecuévo jei jemimboe cuerape: Jasŷpe oikéne umi mbaererecojá Tûpâ Ñandeyára reco marangatújápe.
24. Ja jemimboe cuera ojecharâmô co iñeêngué jei vaecue reje Jae. Upévareje Jesús jei yeby ichupecuera: Che raŷ cuera; mbae jypyú co yaiké jaguâ Tûpâ Ñandeyára reco marangatujápe.
25. Ojasa voívé peteî camello pe okê ipychiî rupi (pe jérava Yu resá) oiké jaguâ gui pe teco marangatu Tûpâ Ñandeyára rejeguape peteî mbaererecojá.
26. Upei catu ojecharâmô tuvichaité jaecuera ja jei oyoupe: ¿Upeicharamo avápa icatune ojupitŷ co teco mârâ ŷ jaguâ me?
27. Upei catu Jesús omaê jesecuera ja jeí ichupecuera: Añeté catu mbae icatuŷva umi ybypórape upéva. Tûpâ Ñandeyárape ndaupéichái. Opambae voí icatu Tûpâ Ñandeyára.
28. Upei catu Pedro oñypyrú jei: Coina ape ore rojeyapá opambae, ja royú Nde rapycuéri.
29. Ja Jesús jei ichupe: Añeté co Che jaéva peême. Ndipóri ojeya vaecue joga cuera, tybyra cuerape, tera teindŷra cuerape terâ isype, terâ itúvape terâ tayra cuerape terâ iñû cuera Che rejejápe ja co Evangelio rejejápe,
30. omboyuapy ŷ vaerâ oyoari ichupe cien yeby, co ybyari voí oicové yavé, oga cuera, ja tybyra cuera ja teindŷra cuera, ja isŷ cuera ja taŷra cuera, ja iñû cuera, upeyavévé voí oimene ombojasa asy vaerâ ichupe, ja coágui rire pe tetâ yvapegua yaja jaguâme ojupityne pe tecové apyraŷva.
31. Opaichavévonte oimene jeta tenondegua opytá vaerâ tapycuepe, ja oimene tapycuegua oñemoî vaerâ tenondepe.
32. Ja oguata oicovo jaecuera pe tapepe ojo jaguâ Jerusalempe. Jesús voí ojo jaeñó jenondepe cuera. Jaecuera voi ojecharâmô oicovo, ja oime yepe umi ojova japycueri okyjŷyéva jicuai. Upei catu Jae ojenôi yeby Jendápe umi docepe, ja oñypyrú jei ichupecuera pe oyeju voí vaerâ reje Ichupe:
33. Coina ape, jei, yaja ñaina Jerusalempe ja co Caraí Raŷ oñemeêne umi pai ruvicha ja umi escriva iñarandu reiva po guŷpe, ja omoî vaíne Ichupe, oyuca jaguâicha Ichupe, ja jaecuera omeêne Ichupe umi pytagua po guŷpe,
34. ja umia oyaóne Ichupe ja oindybúne Jesé, ja oinûpâne Ichupe ja oyucáne Ichupe, upei catu Jae oicove yebyne pe mbojapy arajápe.
35. Uperamo oñemboya Jendápe Santiago ja Juan, pe Zebedeo raŷ cuera, ja jei Ichupe: Nde, ore poromboejára, roipota nde reyapo oreve mbae royeruré jaichaguánte voí.
36. Ja Jae jei ichupecuera: ¿Mbae mbaépa peipota ayapo peême?
37. Ja jei Ichupe: Emeêmo oréve, to roguapy peteî Nde acatua coty ja ambue Nde asu coty upe Nde reco yeguaite jaguâme.
38. Ja Jesús jei ichupecuera: Peê nda peicuaai co peyeruréva. ¿Icatúpane peê peŷú pe mbayru Che jaŷú jaguâ gui terâpa icatune peñe mongaraí co Che añemongarai jaguâme?
39. Ja jaecuera jei: Ore icatune. Ja Jesús jei ichupecuera: Añete co mbayrú Che jaŷújarâ gui voí peê avei peŷúne, ja pe Che añemongarai jaguâme voí peê peñe mongaraíne avei.
40. Opaichavévonte peguapŷ jaguâ Che acatua coty terâ Che asu coty nda iyái Cheve ameê jaguâ peême, umi oñemboescoíjarâme voí oñemeê vaerá.
41. Ja umi diez ambue ojenduma ramo upea, oñypyrú ipochy Santiago ja Juanpe.
42. Upei catu Jesús ojenôi ichupecuera ja jei: Peê peicuaa voí umi oyejechacuaáva mburuvicha guasu ramo umi ybypóra cuera apytepe oñembo caraí guasú jiari cuera, ja umi tuvichavéva iyapytepe cuera oñemo mbaeguasu oguerecovo ichupecuera ipo guŷpe cuera.
43. Upeicharamo yepe nda upeicha vaerâi pene paûme cuera voí. Upe oñemo mbaeguasuva pene paûme, toico pene rembiyocuai ramo,
44. ja oimeraêva peêcuerava oicoseva tenonderâ penepaûme toico upeva opavave rembiguai.
45. Co Caraí Raŷ voí ndoui catu oyocuai jagua avavépe, Jae ou voí oyeyocuaiucá jagua umi ambuecue cuerape ja omeê jaguâ oguecove jeta ybypóra repyrâ.
46. Uperire ôguajê Jericope, ja osê yeby pypé Jerico gui jemimboe cuera ndive ja jeta iyaty vaecue Jesé, sapya oî pe Bartimeo, Timeo raŷ pe jesápysóŷva oguapy vaecue jina pe tape yképe oyerurévo tûpâmbae reje.
47. Ja ojendúma ramo jaejá Jesús Nazareno, oñypyrú osapucai jeivo: Nde, Jesús, David Ray, che poriajúverecomí chéve!
48. Ja jeta oyaó ramo yepe ichupe okîrîrî jaguâ jâtâvente osapucai jae: Nde, David Ray, che poriajúverecomí cheve!
49. Upei catu Jesús opytá ja jei: Pejenôinte ichupe! Ja ojenôi pe jesápysóŷvape, ja jei ichupe: Nde pyá guasúnte! Epuâ catu! ne renôi jina.
50. Upei catu jae omombo pe oñañuâ jague jina, ja opuâ oñemboŷ ja ou Jesús rendape.
51. Ja oñeê Jesús ja jei ichupe: ¿Mbae pico reipota ayapo ndeve? Je pe jesaŷva jei ichupe: Nde, ore poro mboejára, toyeby cheve che resápysó!
52. Ja Jesús jei ichupe: Terejónte! Co nde reyerovia já reje reñemyatyrômbáma. Ja upevove jesápysó pôrâ yebyma, ja ojo japycueri pe tapépe.