1. Cova co Jesu Cristo, Tûpâ Ñandeyára Ray Evangelio iñypyrûmbŷjá.
2. Cóicha oyee voí pe Che amondo Che rembiyocuaipe Ne renonderâ ombosacoí vaerâ Nde rapérâ.
3. Oime osapucaiva co ñeê: Pe ñûme pembosacoíke Ñandeyára rapérâ. Pemoî pôrâ pe opyrû jaguâ.
4. Upeicha voí oico pe Juan pe oporo mongaraí jára, ja oñemoñeê oicovo pe ñûme toñemboyeré toñembyasŷ oyepea jaguâ iñangaipa oñemongaraí pype.
5. Ja osê Jendápe ybypóra Judeaŷgua yoa ja Jerusalemŷgua yoa, ja oñemongaraíucá ipo rupi pe ŷ Jordanme, oñemombeú pypé iñangaipa gui.
6. Ja pe Juan iyao camello ragué cue guigua ja icúacuajá mbaepí gui vaecue, ja jembiúrâ jou tucú ja eíra caaguŷ.
7. Ja oñemoñeêjápe jei: Ou voí che rapycuéri pe ipuacavéva chejegui. Nda iyái cheve ayaŷbŷvo ayorá jaguâ ipŷ rejegua sâ.
8. Che pomongaraí peéme ŷ pe. Upéva catu pene mongaraíne peême Espiritu Santo pypé.
9. Uperamo ou sapya avei Jesús pe Nazaret Galileapegua gui, ja oñemongaraíucá Juan po rupi pe ŷ Jordanme.
10. Ja sapyaite osênguévo pe ŷ gui Jae ojecha oyepea ramo yvaga rokê, ja pe Espiritu pycasuroicha ogueyŷ ramo Jese.
11. Ja oico peteî osapucaiva yvágagui jeiva: Nde catu Che Ray rojaŷjuetéva. Che rorerojorŷ tuvichaité Ndeve.
12. Upevove pe Espiritu oñatôi Ichupe ojo jaguâ pe ñû oyeicoŷjápe;
13. ja oico pe ñûme cuarenta arajá peve, ja pe mbaepochy Satanás ipya raâ oicovo. Ja oi umi mbae ivaíva oijápe, ja umi yvapeguante oñanagarecó Jese.
14. Upeguirire oñemoî rire Juan pe ybyracuá rógape, ou Jesús Galileape oñemoñeêvo pe Evangelio pe Tûpâ Ñandeyára ñeê ipyajúva gui, ja jei:
15. Oguajêma jiára ja jiâguima oñemoingó jaguâ Tûpâ Ñandeyára reco marangatu yvapegua rejegua. Peñembyasŷke! Peñemboyeré, ja peroviá co ñeê pyajú Evangelio peguare.
16. Uperire oguata pypé jiconi pe ŷ Galilea rembeŷ reje, sapya ojecha pe Simonpe ja tybyra Andrespe, ombogueyŷ ramo ipyjá pe ŷ pe: jaecuera pirá cutujára voí.
17. Ja Jesús jei ichupecuera: Peyú Che rapycuéri ja Che pomoingone peême cuimbae pyjŷ jára ramo.
18. Upemaramo ojeya ipyjá cuera ja ojo japycuéri.
19. Upegui mîchînte oguatave tenondévo, ja ojecha pe Santiago, pe Zebedeo raŷpe, ja tybŷra Juanpe jicuaiva pe imbaŷrúpe avei, ja omyatyrô jicuai ipyjá.
20. Upevove Jae ojenôi ichupecuera, ja jaecuera ojeyá itúva Zebedeope upe mbayrúpe jembiyocuai rejeve ja ojo japycueri.
21. Ja upegui ou ôguajê Capernaumme ja pe sabado areté árape Jae oiké pe tûpâope ja oporo mboe.
22. Ja ojecharâmô jaecuera pe jemimboé reje: Jae omboe voí ichupecuera iya jáva reje jecópe Ichupe, ja na umi escriva iñarandu reíva cueraichai.
23. Ja sapyaite pe tûpâope voí peteî cuimbae mbaepochy tieŷ rembitarováva osapucai, jeivo:
24. ¿Mbaépa reipota orejegui, Nde Jesús Nazareno? ¿Reyúpa raé ore mbuai jaguâ? Aicuaa voí avápa Nde. Tûpâ Ñandeyára remimbou imarangatúva Nde!
25. Ja Jesús ipochŷ ichupe, ja jei: Ekîrîrî, ja esê eyeí ichugui!
26. Upei catu pe mbaepochy tieŷ oipocapá ichupe ja osapucai jâtâjápe osê oyeí voí ichugui.
27. Ja opavavé ojecharâmô tuvichaité, ja oñoporandú oyoupe cuera yepe: ¿Mbaépa coa? Ipyajú vaichagua co jemimboé! Oporo poyjújára vaicha co iyáva ramo vaicha jecópe Ichupe, ja umi mbaepochy tieŷpe yepe Jae oyocuai ja jaecuera iñeêrendú Ichupe.
28. Upemaramo oñemo jêrâcuâ Ichugui oparupi pe Galilea retâ yerecuevo.
29. Upegui osê ramo tûpâo gui ôguajê Santiago ja Juan ndive pe Simon ja Andres rogape.
30. Ja sapya uperamo voí jasŷ jina Simon rembireco sŷpe iñâcânundu eterei, ja omombeu voí Ichupe jese,
31. ja Jae oñemboyá Jendápe ja oipyjy ichupe ipo gui ja omopuâ ichupe. Ja upevove oyeipá ichugui iñâcânundu, ja upei catu jae oyeyocuaiucá Ichupe.
32. Ja caarúma ramo oiké vove cuarajŷ, oguerúpá Jendápe umi jasŷvape cuera ja umi mbaepochy rembitarovápe.
33. Ja iyatŷpá pe okê renondépe opavavé pe tetâmegua.
34. Ja Jae jetape omojesâi, umi ojasa vaíva opaichagua mbaasy gui, ja oity mbaepochy ichugui cuera, ja oyoco umi mbaepochŷpe ani omombeu mbaeve, oicuaa jague reje Jae Cristojá.
35. Ja pyjarevété pytû gueteri opuâ, ja osê ojo pe ñû yeicoŷjape jaeñojápe, ja upepe oñemboe.
36. Ja Simon ja umi ambuecuera oiva jendive ojo ojecávo Ichupe.
37. Ja oyujuma ramo Ichupe, jei: Opavavé Nde recá jicuai.
38. Ja Jae Jei ichupecuera: Yaja mandike umi tetâ ânguijápeguape añemoñeê jaguâ upepe avei: upe jaguâite voí ayu vaecue.
39. Ja Jae oñemonñeê oicovo itûpâope cuera Galileape oparupi, ja oity mbaepochy cuerape.
40. Uperamo ou Jendápe avei peteî leproso iyaipáva ja oyeruré Ichupe oñesûjape ja jei: Reipota ramo icatu Nde che mopôtí.
41. Ja Jae oiporiajuvereco ichupe ja oipyso ipo ja opoco jese ja jei: Che aipota! Ta ne pôtínte!
42. Ja upevove ocañŷmbá ichugui iyaívaí, ja ipôtímba opytávo.
43. Ja Jae omboe ichupe ja omondovo ichupe,
44. jei: Ani remombeu avavépe. Terejónte, eyejechauca pe paípe ja co reñemo pôtí jague reje eicuameê pe Moises omeêucá vaecue oyecuaaucá jaguâ ichupecuera.
45. Opaichavévonte jae osê vove oñypyrú omombeu oparupi opavavépe ja omojerâcuâ pe oyeju jague ichupe, ja upeagui Jesús ndicatuvei oiké pe tetâme oyejechaucájápe: oicónte ocápe ñûreje ocáraré, ja oime oúva ôguajê Jendápe opa cotŷ guivó.