1. Upeicha ôguajê pe ŷguasu mboypŷri umi Gesarene retâme,
2. ja ogueyŷma ramo Jae pe mbayrú gui, ou ojuvâitivo Ichupe umi omano vaecue oñeñotŷ jague gui peteî cuimbae mbaepochy rembitarová vaiva,
3. oico vaecue umi omano vaecue oñeñotŷ jague rupi, ja ndicatuvéima oyeyoco oñeñapytîme yepe.
4. Jeta yeby voí oñeñapytî racae itacupysâ pypé ja itasâ pypé, ja umi itasâ omopêpêmba racae ja umi itacupysâ ombuaipa racae, ja ndipóri ipuaca vaerâ jese.
5. Ja osapucai oicovo tapia ára ja pyjarepe umi omano vaecue oñeñotŷ jague rupi, ja umi itáatŷra rupi ja oime yepi oyecutu oyupe itápe.
6. Ja ojechama ramo Jesúspe mombyry guive yepe oñani ja oñesû Ichupe,
7. ja osapucai jâtâ ja jei: ¿Mbaepa reipota chejegui, Nde Jesús Tûpâ Ñandeyára pe Tuvichaitéva Raŷ? Ayerure Ndeve Tûpâ Ñandeyára rérape ani che muanguecoi!
8. Upeicha oñeê pe mbaepochy, jei jague reje Jae ichupe: Nde! mbaepochy vaí! Esê catu co cuimbae gui!
9. Ja Jae oporandu ichupe: ¿Mbaéichapa nde réra? Ja jae jei: Legión che réra ore retajá reje.
10. Ja jeta oyerure Ichupe ani jaguâ omondo ichupecuera pe tetâ gui ocápe.
11. Ja oime voí upepe pe itáatŷra rupi peteî curé atŷra tuvicha ocaru jicuai,
12. ja oyeruré Ichupe umi mbaepochy jeivo: Ore mondónte umi curé oijápe roike jaguâ jete pypé cuera.
13. Neí! jei Jae ichupecuera. Ja osê voí umi mbaepochy vaí ja oiké umi curé reté pypé ja pe iyatŷra, (jetacue voí mocoî mil) iñacuâmba ja umi curé joapá peteî itá yvaté ári gui pe ŷguasupe ja joŷguŷpá pe ŷguasupe.
14. Upei catu umi curé rerecuácué cuera oñeguajê ja omojerâcuâ pe tetâme ja pe ñû ocaraguape. Upei catu osê umi ambuecuera ojecha jaguâ mbaépa oyeju raé.
15. Ja ou Jesús rendape ja ojecha pe mbaepochŷ rembitarová vaecuepe oguapy ramo iyao pôrâva ja iñâcâ pôrâ yebŷmava, upe oguereco vaecue ipypé mbaepochy atyra Legion. Ja okyjŷyé jicuai,
16. ja umi jechajaré omombeu ichupecuera mbaéichapa oyeju raé pe mbaepochy rembitarová vaecuepe ja umi curépe avei.
17. Upeagui oñypyrû oyerure Ichupe oyei jaguâ jetâ gui cuera.
18. Ja Jae oyupi pypé pe mbayrúpe, pe mbaepochy rembitarová vaecue oyerure Ichupe oime jaguâ Jendive.
19. Ja Jae ndoipotai. Jei mante ichupe: Terejo nde rogape nde rejegua cuerape ja emombeupá ichupecuera mbaeichaguápa mbaeguasu Tûpâ Ñandeyára oyapo raé ndereje ja mbaéichapa Jae nde poriajuvereco raé ndeve.
20. Upeicha oyeí ja omo jêrâcuâ oicovo oparupi Decapolispe opa âmbae Jesús oyapo vaecue jese: ja oime ojecharâmô yoa.
21. Upegui oyebyma ramo Jesús pe mbayrúpe mboypŷri gui oñembyatŷ Jendápe jeta iyatŷvo, ja Jae oi pe ŷguasu rembeŷpe,
22. ja upeyave ou peteî mburuvicha tûpâo rejegua jérava Jairo, ja ojecha vove jae Ichupe oñesû Ichupe,
23. ja oyerure rure Ichupe, jeivo: Jasŷeté jina chejegui che rayŷmi omano jaguâicha. Eyókena emoî Nde po jese jesaîmba yeby jaguâ, ja upeicharamo, oicove vaerâ.
24. Ja Jae ojo jendive. Ja umi jeta oñembyatŷ vaecue ojo japycueri avei ja iyatŷpáité Jese.
25. Ja oime peteî cuña oyapoma raé doce años jasy ypy jagué tuguy guasu gui.
26. Ja oñepôjânôucáma racae jeta poropôjâno jára cuerape, ja upeicha ombojŷcupáma racae pe oguerecomimi vaecue, ja opaichavévonte mbaeveté ndopytuúi, jasŷ jasŷvé ojóvo mante reí.
27. Sapya ojendúma raé Jesús rerâcuâ, ja upeicha ou japycué guivó umi ambuecue iyatŷ vaecue jina apytépe ja opoco iyao reje.
28. Jei nipo raé ipyápe: sapya apocomi ramo iyao rejente che resaîne.
29. Ja upevove jypá pe tuguy joa vaecue ichugui, ja jae oñeñandu jete pype jesaîmbámajá pe mbae ivaíva gui.
30. Upevove Jesús ojechacuaáma ramo iyejegui voí osê jagué Ichugui ipuacacué gui oyeré umi iyatŷva apytépe ja jei: ¿Avápa raé opoco Che ao reje?
31. Upei catu jei Ichupe jemimboe cuera: ¿Nde rejechaipa oime jetajá iyatŷva Nde reje? ¿Upeicharamo, maerâpa ere: ¿Avápa raé opoco Chereje?
32. Ja Jae omaê oparupi iyerecuévo ojecha jaguâ mávapa oyapó raé upea.
33. Upei catu pe cuña okyjŷyé orŷrŷipa, oicuaa pypé pe oyejú vaecue ichupe, ou ja oñesû Ichupe, ja oñemombeupá Ichupe jecópe.
34. Ja Jae jei Ichupe: Che rayŷ reyeroviá guínte ne resaî repytávo. Terejo nde pya guapy! Eico mârâve ŷ reje co tucumbócué gui.
35. Ja oñeê aya yepe oime oúva pe tûpâo ruvicha roga gui jeíva: Omanóma nde rayŷmi. ¿Maerâpa reyocuaivé co ore poromboejárape?
36. Upei catu Jesús ojendu pypé pe jeiva, jei pe mburuvichápe: Ani rekyjŷyé! Eyeroviánte!
37. Upegui Jae ndoipotai avavé ojo Jendive, Pedro ja Santiago ja Juan, Santiago rybŷ, umia añónte.
38. Ja upeicha ôguajê pe mburuvicha rogape. Ja ojecháma ramo Jae iyaŷbú ramo yoa umi oyajeóva jina ja jasêva jicuai,
39. Jae oiké ja jei ichupecuera: ¿Mbaerejépa pende aybú ja peyajeó? Co mitâ cuña nomanoi, okénte jina!
40. Ja jaecuera oñembojorŷ Jese. Upei catu Jae omosêmba ichupecuera, ja omoingue pe cotŷpe pe mitâ cuña rú ja isŷpe nte añó, ja umi Jendive oivape, ja upeicha oiké pe mitâ cuña oijape.
41. Ja Jae oipyjy pe mitâ cuña po, ja jei ichupe: Taleitha coum! (Mitâ cuña jae ndeve, epuânte! yae mo avá ñeême.)
42. Ja sapyaite opuâ voí pe mitâ cuña ja oñemboŷ ja oguatá. Oime oguereco voí doce años. Ja jaecuera oñemondŷi ja ojecharâmô tuvichaité.
43. Ja Jae jei ichupecuera anichene jaguâ oicuaaucá avavépe âmbae gui ja jei ichupecuera omongarú jaguâ ichupe.