1. Ang Ginoo nag-ingon kanako,
2. “Tawo, ingna sila nga kini ang gisulti sa Ginoong Dios ngadto sa nasod sa Israel: Kataposan na! Miabot na gayod ang kataposan sa tibuok Israel.
3. “Mao na kini ang inyong kataposan. Pahiagomon ko kamo sa akong kasuko ug hukman ko kamo sumala sa inyong binuhatan ug silotan ko kamo tungod sa tanan ninyong salawayong buhat.
4. Dili ko kamo kaluy-an; silotan ko kamo samtang anaa pa kaninyo ang pagkadaotan. Unya makaila kamo nga ako mao ang Ginoo.”
5. Kini ang giingon sa Ginoong Dios: “Nagsunodsunod pag-abot ang katalagman!
6. Miabot na gayod ang inyong kataposan ug dili na kini kapugngan.
7. Ang inyong kalaglagan, O mga Israelita, miabot na gayod; miabot na ang panahon ug duol na ang adlaw sa kagubot ug dili kini adlaw sa malipayong panaghugyaw didto sa kabukiran.
8. “Sa dili madugay buboan ko na kamo sa akong kasuko ug hukman ko kamo sumala sa inyong binuhatan ug silotan ko kamo tungod sa inyong pagkadaotan.
9. Buhaton ko kini sa walay kukaluoy ug wala akoy sayloan. Silotan ko kamo sumala sa inyong pagkadaotan samtang anaa pa kini kaninyo. Unya makaila kamo nga ako, ang Ginoo, maoy magsilot kaninyo.”
10. Ania na gayod ang adlaw! Miabot na ang inyong kalaglagan; namulak na ang pagpanglupig ug nanalingsing na ang garbo.
11. Ang kapintas mitubo ug nahimong bunal sa pagkadaotan; walay mahibilin kanila bisan ang ilang kabahandianon ug kabantog.
12. Miabot na ang panahon ug duol na ang adlaw. Kinahanglan nga dili maglipay ang namalit o magsubo ang namaligya kay silang tanan mahiagom man sa akong kasuko.
13. Ang namaligya dili na makabawi sa ilang puhonan kay silang tanan mahiagom man sa kasuko sa Dios. Mahitabo gayod kini ug tungod sa ilang pagkadaotan walay makaluwas sa ilang kinabuhi.
14. Gipatingog na nila ang trumpeta ug nakapangandam na ang tanan apan walay moadto sa panggubatan kay ipahamtang man kanilang tanan ang akong kasuko.
15. Ang espada atua naghulat sa gawas ug ang kamatay ug gutom anaa sa sulod; mamatay sa espada kadtong atua sa panggubatan ug ang anaa sa siyudad mahiagom sa kamatay ug gutom.
16. Ug kon may makaikyas man ugaling, adto sila modangop sa kabukiran sama sa nahadlok nga mga salampati ug mag-agulo sila tungod sa ilang kasal-anan.
17. Wala nay umoy ang tanang kamot ug mangurog ang ilang tuhod.
18. Magbisti silag sako ug mangalisang sila pag-ayo. Molutaw sa ilang panagway ang kaulaw ug kiskisan nila ang ilang ulo.
19. Ipanglabay na lamang nila ang ilang mga plata ug bulawan ngadto sa kadalanan daw butang nga mahugaw ug dili kini makaluwas kanila sa adlaw sa kasuko sa Ginoo. Dili kini makabusog kanila. Mao kini ang nagdala kanila ngadto sa pagpakasala.
20. Gigamit lamang nila sa pagpasikat ang ilang matahom nga mga alahas ug gikan niini gibuhat nila ang ilang mga diosdios ug uban pang mga butang nga salawayon busa himoon sa Ginoo nga mangil-aran sila sa ilang mga bulawan ug plata.
21. Miingon ang Ginoo, “Unya ipatulis ko kini sa mga langyaw ug mga tawong daotan aron pasipad-an nila kini.
22. Pasagdan ko sila inigpasipala nila sa akong Templo; lungkabon kini sa mga kawatan ug pasipad-an nila kini.
23. “Nagkaguliyang silang tanan. Ang tibuok nasod nalukop sa pinatyanay ug nagkagubot ang tibuok siyudad.
24. Paanhaon ko ang labing bangis nga nasod aron sakmiton ang inyong kabalayan. Putlon ko ang inyong garbo ug hugawhugawan unya ang inyong mga halaran.
25. Inig-abot sa kasakitan, mangita unya kamo sa kalinaw apan dili kamo makakita niini.
26. Magsunodsunod sa pag-abot ang katalagman kaninyo ug walay hunong ang mga huhungihong sa daotang mga balita. Mangita kamog panan-awon gikan sa propeta. Ang mga pari wala nay ikatudlo sa mga tawo ug wala nay ikatambag ang mga kadagkoan.
27. Magbangotan unya ang hari ug kabsag paglaom ang prinsipe ug mangurog sa kahadlok ang katawhan. Silotan ko kamo sumala sa inyong binuhatan ug hukman ko kamo sumala sa inyong paghukom sa uban ug makaila unya kamo nga ako mao ang Ginoo.”