1. Ang Ginoong Dios miingon, “Tawo, pahibaloa si Gog, ang pangulo sa Mesec ug sa Tubal, nga ako kaaway niya.
2. Gikan sa labing layong bahin sa amihanan, palisoon ug pasulongon ko siya sa kabukiran sa Israel.
3. Unya balion ko ang pana nga anaa sa iyang walang kamot ingon man ang mga udyong nga anaa sa iyang tuo.
4. Mangamatay ang iyang kasundalohan didto sa kabukiran sa Israel ug ipakaon ko sila sa mga langgam ug sa mga mananap.
5. Mangapukan sila diha sa kaumahan kay mao kini ang akong pagbuot.
6. Sunogon ko ang Magog ug ang mga nagpuyo nga malinawon didto sa kabaybayonan. Makaila unya sila nga ako mao ang Ginoo.
7. Ipaila ko ang balaan kong ngalan taliwala sa akong katawhan, ang mga Israelita, ug dili ko na itugot nga pasipad-an pa ang akong ngalan. Masayran unya sa mga nasod nga ako mao ang Ginoo, ang balaang Dios sa Israel.”
8. Miingon ang Ginoong Dios, “Hibaw-i ninyo nga mahitabo gayod kini.
9. Unya panguhaon sa mga nagpuyo sa mga siyudad sa Israel ang mga taming, mga kalasag, mga pana ug mga bangkaw ug gamiton nila kini nga sugnod sulod sa pito ka tuig.
10. Busa dili na sila mangahoy pa sa kalasangan kay mao na man lay ilang isugnod ang mga hinagiban. Ilogan nila ang nangilog kanila ug sakmitan nila ang nagsakmit sa ilang kabtangan.” Ang Ginoong Dios maoy nagsulti niini.
11. Ang Ginoo miingon, “Niadto unyang adlawa ihatag ko kang Gog ang Walog sa Mga Magpapanaw ingon nga iyang lubnganan diha sa Israel. Nahimutang kini sa sidlakang bahin sa Patayng Dagat ug makasagabal kini sa mga magpapanaw. Adto didto ilubong si Gog ug ang daghan niyang kasundalohan ug nganlan na kinig Walog sa Kasundalohan ni Gog.
12. Ang katawhan sa Israel maoy molubong kanila sulod sa pito ka bulan aron kahinloan ang yuta.
13. Ilubong sila sa tanang katawhan ug pasidunggan ang katawhan sa Israel tungod sa akong kadaogan, nag-ingon ako, ang Ginoong Dios.
14. Human sa pito ka bulan, magpili silag mga tawo aron pagsuroy sa tibuok nasod ug paglubong sa mga minatay nga wala pa ikalubong aron kahinloan ang yuta.
15. Kon sa ilang pagsuroy may makakitag bukog sa tawo, butangan nila kinig timaan alang sa tiglubong nga maoy molubong niini didto sa Walog sa Kasundalohan ni Gog.
16. (Duol niining waloga mao ang siyudad sa Hamona.) Niining paagiha ilang kahinloan ang yuta.”
17. Giingnan ako sa Ginoong Dios, “Tawo, sultihi ang tanang matang sa langgam ug ang tanang mananap: Tambong kamo sa kasaulogan nga akong giandam alang kaninyo, usa ka dakong kasaulogan diha sa kabukiran sa Israel. Makakaon kamog unod ug makainom kamog dugo.
18. Makakaon kamo sa unod sa mga sundalo ug makainom kamo sa dugo sa mga kadagkoan sa kalibotan nga sama sa mga karnero, mga kanding ug mga baka nga gikan sa Basan.
19. Matagbaw kamog kaon sa tambok ug inom sa dugo hangtod nga mahubog kamo sa kasaulogan nga akong giandam.
20. Diha sa akong kan-anan mabusog kamo sa mga unod sa kabayo ug sa mga nagkabayo niini ingon man sa mga sundalo ug sa mga tawong gamhanan. Ako, ang Ginoong Dios maoy nagsulti niini.”
21. Ang Ginoo miingon, “Ipakita ko ang akong himaya sa tanang mga nasod ug masayran unya nila ang akong gahom sa pagbuhat sa akong kabubut-on.
22. Ang mga Israelita mahibalo unya nga ako, ang Ginoo mao ang ilang Dios sukad sa maong adlaw hangtod sa kataposan.
23. Ug masayran unya sa mga nasod nga ang mga Israelita nabihag tungod sa ilang pagkadaotan kay ila man akong gibudhian ug tungod niini gitalikdan ko sila ug gitugyan sa ilang mga kaaway ug busa nangamatay sila pinaagi sa gubat.
24. Gisilotan ko sila sumala sa ilang mga sala ug kalapasan ug gitalikdan ko sila.”
25. Busa ang Ginoong Dios nag-ingon, “Ibalik ko kang Jacob ang iyang kadato ug kaluy-an ko ang katawhan sa Israel. Ipakita ko nga ako manalipod sa akong balaang ngalan.
26. Inigpuyo na nila sa ilang yuta diin wala nay angay kahadlokan, malimtan nila ang ilang kaulawan nga ilang nahiagoman tungod sa ilang pagbudhi kanako.
27. Mahitabo kini tapos ko sila makuha gikan sa kayutaan sa ilang mga kaaway. Pinaagi kanila ipaila ko ang akong pagkabalaan atubangan sa kanasoran.
28. Unya maila sa Israel nga ako gayod mao ang Ginoo nga ilang Dios kay ako may nagpabihag kanila ngadto sa kanasoran ug ako usab ang nagpapauli kanila sa ilang kaugalingong yuta. Wala gayoy mahibilin kanila didto sa ubang nasod
29. ug dili ko na gayod sila talikdan ug ibubo ko ang akong espiritu sa katawhan sa Israel. Ako, ang Ginoong Dios, maoy nagsulti niini.”