1. ‘Ona pese ai lea e Iutita lana pese i le Ali‘i,
2. o fai ane:“‘Ia ‘outou fa‘amanū i le Ali‘i i le tagi o topa,‘ia ‘outou pepese i le Ali‘i i sumepalo,‘ia usu mo ia le salāmo fou.‘Ia ‘outou fa‘ane‘ene‘e ma vala‘au atu i lona suafa.
3. O le Ali‘i na te fa‘aumatia itūtau‘a,o le Ali‘i o lona suafa lea.
4. ‘Ua na tō lona lauapi i totonu o lona nu‘u,‘ina ‘ia lavea‘i ‘iā te i latou mai lima o ē ita mai uma lava.
5. Na sau Asuria mai le atu mauga i le itū i matū i le to‘atele o ana ‘au;o lo latou to‘atele ‘ua punitia ai o vaitafe,‘ua ufitia vaimauga ‘iā latou solofanua.
6. ‘Ua fai mai e susunu e ia lo‘u lau‘ele‘ele,na te fasia o o‘u taulele‘a i le pelu,na te tu‘ua o‘u tamaiti e fai ma vetega,ma o‘u taupou ‘ia nofopologa.
7. A o le Ali‘i e ona le mana uma ‘ua na fa‘amasiasi ‘iā te ia,‘ua na tu‘uina mai o ia i lima o le fafine,‘ua na fasi ‘iā te ia.
8. Auā e lē o le ‘au talavou na pa‘ū ai lo latou toa,e le‘i taia fo‘i o ia i le fānauga a tagata toa,e le‘i tau fo‘i ma ia o tagata maualuluga ma le tino ‘ese.A o Iutita, le afafine o Merari,‘ua na fa‘aumatia o ia i le lālelei o ona mata.
9. Auā ‘ua na tatala ‘ese ona ‘ofu o le fafine ‘ua oti lana tane,ma ‘ua ‘ofu o ia i ona ‘ofu matagofie,‘ina ‘ia ‘oli‘oli ai le fānauga a Isaraelu.
10. ‘Ua na fa‘au‘u ona mata i le suāu‘u manogi,‘ua na fa‘amauina i le pulou ona fuafuati lauulu;‘ua ‘ofu o ia i le ‘ie pulupulu fou i le fia fa‘asesē ‘iā te ia.
11. O ona se‘evae na maileia ai ona mata,o ona lālelei na selea ai lona agaga;‘ua na vavae‘esea lona ulu i le pelu.
12. ‘Ua tetemū o tagata Peresia i lona loto tele,‘ua tetemū fo‘i o tagata Metai i lona loto malosi.
13. “‘Ona pā ai lea le ‘alaga i le togālauapi o Asuria,‘ina ‘ua tutū atu o‘u tagata vaivai ma le lailoa i le fia inu.
14. ‘Ua tuia i latou e tama a teine muli,ma ‘ua fasia i latou e pei o ni tamaiti ‘ua sōsōla,‘ua fano i latou i le tau‘a i luma o le Ali‘i o lo‘u Atua.
15. “‘Ia tatou usu pese i le Ali‘i,‘ia tatou pepese le pese fou i lo tatou Atua.
16. Le Ali‘i e, e sili lava oe ma ‘ua silisili lou malosi,e lē mafai ‘ona mālō se tasi ‘iā te oe.
17. ‘Ia ‘au‘auna atu ‘iā te oe o mea uma na e faia,auā na e fetalai, ‘ona faia ai lea i latou;‘ua e ‘auina mai lou agaga ‘ona tutupu ai lea;ma ‘ua leai sē na te te‘ena o lau vala‘au.
18. “‘Ua gae‘etia i o latou fa‘avae o mauga ‘atoa ma vaitafe;e tatafe o papa e pei o le pulu i ou luma.
19. A o ē matata‘u ‘iā te oe,e mamalu pea i latou i ou luma i mea uma lava.
20. “‘Oi talofa i le nu‘u e laga mai i la‘u fānau! Auā o le Ali‘i e ona le mana uma na te sui ma taui ‘iā te i latou;na te asia i latou i le aso o le fa‘amasinoga.
21. Auā na te tu‘uina ifo le afi ma le ilo i o latou tino,‘ina ‘ia latou mū ai ma tigāina ai e o‘o atu i le fa‘avavau.”
22. ‘Ua mavae atu mea ia, ‘ona ō atu lea o le nu‘u ‘atoa i Ierusalema e ifo atu ai i le Ali‘i; ‘ua uma ona fa‘amamāina i latou, ‘ona momoli atu lea e i latou o taulaga mū ‘atoa ma mea na latou tautō ai ma mea na latou folafolaina.
23. A o Iutita ‘ua ia momoli atu i le Atua o mea uma sa ‘iā Holofene, ‘atoa ai ma ‘au‘upega uma lava o Holofene na tu‘uina mai ‘iā te ia e le nu‘u, ma le ‘ie o lona nofoāli‘i na ia ‘aumaia mai lona fale ‘ie.
24. ‘Ae sa ‘oli‘oli le nu‘u uma i luma o le malumalu; ma ‘ua fa‘ailogaina le fiafia o lona manumālō i masina e tolu, o fa‘atasi i latou ma Iutita.
25. A ‘ua mavae atu aso ia, ‘ona ta‘itasi ai lea ma toe fo‘i atu i lona fale; ma ‘ua fa‘amamaluina lava o Iutita i Paitulia; ‘ua matuā ta‘uleleia o ia i le lau‘ele‘ele uma o Isaraelu.
26. Sa ō gatasi fo‘i lona loto mamā ma lona loto tele, ‘ua na lē iloa se tane i aso uma o lona olaga, talu mai i aso na oti ai lana tane o Manase.
27. A o tausamiga sa fealua‘i ai lava ia ma le mamalu tele.
28. ‘Ua nofo o ia i le fale o lana tane i tausaga e selau ma le lima, ‘ona ia fa‘asa‘olotoina ai lea o lana ‘au‘auna fafine, ‘ona oti lea o ia ma ‘ua tanumia fa‘atasi ma lana tane i Paitulia.
29. ‘Ua fa‘anoanoa le nu‘u uma ‘ona o ia i aso e fitu.
30. A o aso uma lava o lona ola, na leai se tasi e fa‘atigāina Isaraelu, e fa‘apea fo‘i i tausaga e tele ‘ina ‘ua oti o ia.
31. A o le aso o le fiafia i lenā manumālō ‘ua ‘avea e tagata Eperu ma tausamiga ma ‘ua tausia e tagata Iutaia e āfua mai i aso ia e o‘o mai i nei ona po.