1. A ‘ua o‘o atu i le afiafi, ‘ona fa‘atelevave atu lea o ana ‘au‘auna i o latou fale ‘ie; ‘ona pupuni lea e Pakoa le faitoto‘a o le potu ma ‘ua alu lava ia.
2. ‘Ae sa lailoa uma i latou i le uaina.
3. A ‘ua na o Iutita lava i le potu.
4. ‘Ae sa ta‘oto o Holofene i lona moega, o moegase ‘ona ‘ua matuā ‘onā o ia.
5. Ma ‘ua fai atu o Iutita i lana ‘au‘auna ‘ia tu i fafo o ia i luma o le potu ma leoleo ai.
6. ‘Ona tu lea o Iutita i luma o le moega, o tatalo ma loimata ma le memu o ona laugutu ‘ae lē leoa,
7. o fa‘apea ane: “‘Ia e fa‘amalosi mai ‘iā te a‘u, le Ali‘i e, le Atua o Isaraelu, ma ‘ia e silasila ifo i lenei itū aso i le galuega a o‘u lima, ‘ina ‘ia e fa‘aea lou ‘a‘ai o Ierusalema, e tusa ma lau folafolaga ma ‘ia ‘ou fa‘ao‘oina le mea ‘ua ‘ou manatu i ai ma lo‘u fa‘atuatua o oe lava o le a mafaia ai.”
8. ‘Ua uma ana ‘upu ia, ‘ona fa‘alatalata atu lea o Iutita i le poutū ‘ua i le ulu o le moega o Holofene ma ‘ua tatala le pelu sa tautau ai i le filifili.
9. ‘Ua tō a‘e le pelu, ‘ona pu‘e lea i lona foga ma ‘ua fai ane: “‘Ia e fa‘amalosi mai ‘iā te a‘u, le Ali‘i e, le Atua, i lenei itū aso.”
10. Ma ‘ua ia tā fa‘alua i lona tuāua ma ‘ua vavae‘ese lona ulu, ‘ona tatala lea o le ‘ie o lona nofoāli‘i sa fa‘amau i poutū ma ‘ua na fulisia i lalo lona tino mutu.
11. ‘Ua lē pine fo‘i ‘ona ulufafo o ia, ma ‘ua tu‘u atu i lana ‘au‘auna le ulu o Holofene, ma ‘ua poloa‘i atu ‘ia tu‘uina i lana taga.
12. ‘Ona ulufafo lea o i lā‘ua, e tusa ma la la masani, e peiseaī o le a ō e tatalo, ma ‘ua la te‘a ‘ese i le togālauapi; ‘ua la ta‘amilo i le vaimauga ma ‘ua o‘o atu i le faitoto‘a o le ‘a‘ai.
13. ‘Ua tu mamao o Iutita ma fai atu i ē leoleo i le pavali: “‘Ia ‘outou tatalaina o faitoto‘a, auā o lo‘o fa‘atasi ma i mā‘ua le Atua ‘ua na faia se vāvega i Isaraelu.”
14. A ‘ua fa‘alogo e tagata ia i lona leo, ‘ona latou vala‘au ai lea i toeaina o le ‘a‘ai;
15. ma ‘ua latou taufetuli ‘iā te ia uma lava, o tagatanu‘u ‘atoa ma ali‘i, auā sa lē toe fa‘amoemoe i latou o le a toe fo‘i mai o ia.
16. Ma ‘ua latou tutuina o sulu ma ‘ua latou fa‘ata‘ali‘oli‘o uma lava ‘iā te ia; a ‘ua a‘e o ia i le mea maupu‘epu‘e ma ‘ua poloa‘i ‘ia latou fa‘alologo. Ma ‘ua latou fa‘alologo uma.
17. ‘Ona fai atu lea o Iutita: “‘Ia ‘outou vivi‘i atu i le Ali‘i lo tatou Atua, ‘ua na lē tu‘ulafoa‘iina o ē fa‘alagolago ‘iā te ia;
18. ma ‘ua ia fa‘ataunu‘u ‘iā te a‘u, o lana ‘au‘auna, lona agaalofa na ia folafolaina i le ‘āiga o Isaraelu ma ‘ua ia fasiotia anapō i lo‘u lima le fili o lona nu‘u.”
19. Ma ‘ua tō a‘e le ulu o Holofene nai le taga ma ‘ua fa‘aali atu ‘iā te i latou, o fa‘apea atu: “O le ulu lenei o Holofene, o le ta‘ita‘i o le ‘au a Asuria; o le ‘ie fo‘i lenei o lona nofoāli‘i sa ia ta‘oto ai i lona ‘onā, ‘ua taia ai o ia e le Ali‘i lo tatou Atua i le lima o le fafine.
20. A o lo‘o soifua le Ali‘i lava ia, ‘ua leoleo ‘iā te a‘u e lana agelu i lo‘u alu atu ‘i‘inā ma lo‘u nofo ai ma lo‘u toe fo‘i mai ‘i‘inei; ma ‘ua lē tu‘uina e le Ali‘i o ‘au, o lana ‘au‘auna, ‘ia fa‘aleagaina, a ‘ua toe ta‘ita‘i mai a‘u ‘iā te ‘outou o mamā lava a‘u i agasala uma, o ‘oli‘oli i lona manumālō ma lo‘u saogalemū ma le lavea‘iina o ‘outou.
21. ‘Ia fa‘amanū ‘iā te ia o ‘outou uma, auā e agalelei o ia, auā e tumau lona agaalofa i le fa‘avavau.”
22. ‘Ua latou ifo atu uma i le Ali‘i, ma ‘ua latou fai mai ‘iā te ia: “‘Ua fa‘amanuiaina oe e le Atua i lona mana, auā ‘ua na nutipala o tatou fili ‘iā te oe.”
23. A o Usia, o le ta‘imua o le nu‘u o Isaraelu, ‘ua fai mai ‘iā te ia: “‘Ua fa‘amanuiaina oe, lo‘u afafine e, e le Ali‘i le Atua silisili ‘ese, i fafine uma lava o le lalolagi.
24. ‘Ia vi‘ia le Ali‘i, ‘ua na faia le lagi ma le lalolagi, ‘ua na ta‘ita‘iina lou lima e taia a‘i le ulu o le ta‘ita‘i o tatou fili;
25. auā ‘ua na fa‘amamaluina lou igoa i le aso nei, e lē toe te‘a ‘ese ai ou vi‘iga i laugutu o tagata latou te manatua i le fa‘avavau le mana o le Ali‘i; ‘ua e lē fa‘apelepele i lou ola, ‘ona ‘ua e iloa o puapuagā ma le tigā o lou nu‘u, a ‘ua e pupulu i lona malaia i luma o lo tatou Atua.”
26. Ma ‘ua fai ane le nu‘u ‘atoa uma: “Amene! Amene!”
27. A ‘ua vala‘auina Akiora, ‘ua sau ma ‘ua fai atu Iutita ‘iā te ia: “O le Atua o Isaraelu, na e fai ai lau molimau na te taui ma sui i ona fili, o ia ‘ua na vavae‘ese i le po anapō i lo‘u lima le ulu o i latou uma e lē fa‘atuatua.
28. ‘Ina ‘ia e mautinoa ai fo‘i lea mea, o le ulu lenei o Holofene ‘ua na tauemu i le Atua o Isaraelu i le tauemuga o lona fa‘amaualuga, ‘ua na fa‘amata‘u fo‘i ‘iā te oe i le oti, o fa‘apea atu: A pu‘eina le nu‘u o Isaraelu, ‘ona ‘ou poloa‘i lea ‘ia tuia lou tino i le pelu.”
29. A ‘ua iloa atu e Akiora le ulu o Holofene, ‘ona tetemū lea o ia i le mata‘u, ‘ua pa‘ū faō i le ‘ele‘ele ma ‘ua matapogia o ia.
30. A ‘ua toe ola o ia ma toe maumanatu, ‘ona pa‘ū to‘ele lea i ona vae, ‘ua ifo mai ‘iā te ia ma ‘ua fa‘apea mai:
31. “‘Ua fa‘amanuiaina oe e lou Atua i fale ‘ie uma lava o Iakopo, auā o nu‘u uma e ta‘uina ai o lou igoa, e fa‘amamaluina ai le Atua o Isaraelu ‘ona o oe.”