1. ‘Ua latou ō, ‘ona alu atu lea o Iutita i lona potu tatalo, ‘ua ‘ofu fo‘i o ia i le ‘ofu talatala ma lulu‘u le lefulefu i lona ulu; ma ‘ua pa‘ū faō i luma o le Ali‘i, o tagi atu i le Ali‘i, o fa‘apea atu:
2. “Le Ali‘i e, le Atua o lo‘u tamā o Simeona, na e tu‘u mai ‘iā te ia le pelu e taui atu ai i tagata ‘ese na latou agasala i o latou tu‘inanau ‘ele‘elea, na latou fa‘aleaga le tino o le taupou ma fa‘amasiasi ‘iā te ia;
3. ma ‘ua e tu‘uina o latou fafine ‘ia vetea, o latou afafine e fai ma pologa ma o latou ‘oloa e vaevaeina i au ‘au‘auna na mā‘elegā i latou ‘ona o oe; ‘ou te ole atu, le Ali‘i e, ‘ia e fesoasoani mai ‘iā te a‘u le fafine ‘ua oti lana tane.
4. Auā o oe lava na e faia mea muamua; o oe fo‘i na e saunia mea na mulimuli mai ai, i lo ‘ua faia lava le mea na e finagalo i ai.
5. Auā ‘ua fa‘atonuina o ou ala uma, o au fa‘amasinoga fo‘i ‘ua fa‘amauina i lau silafaga.
6. “‘Ia e silasila nei i le togālauapi o tagata Asuria, e pei ‘ona e finagalo e silasila i le togālauapi o tagata Aikupito, i le aso na tago ai i latou i le ‘au‘upega ma tuliloa ai i au ‘au‘auna, o fa‘alagolago i o latou nofoa fa‘ata‘avalevale ma la latou ‘au e ti‘eti‘e i solofanua ma le to‘atele o latou tagata tau.
7. ‘Ae na e silasila i lo latou togālauapi, ‘ona lailoa lea i latou i le pogisā.
8. ‘Ua goto o latou vae i le moana ma ‘ua ufitia i latou i le suāsami.
9. “Le Ali‘i e, ‘ia fa‘apea fo‘i ma i latou nei ‘ua fa‘alagolago i lo latou to‘atele ma ‘ua latou mitamita i o latou kariota ma o latou tui, o latou talitā, a latou ū fanafana ma a latou tao;
10. ma ‘ua latou lē iloa o oe lava, lo matou Atua, ‘e te fa‘aumatia i itūtau‘a talu le amataga, i le o le Ali‘i o lou lea suafa.
11. “‘Ia e lu‘i tau lou ‘a‘ao, e pei o aso anamua, ma e nutipalaina lo latou malosi i lo oe malosi; ‘ia fa‘aumatia i lou to‘atama‘i le malosi o i latou ‘ua folafola mai latou te fa‘aleaga lou malumalu ma fa‘a‘ele‘elea le fale fetāfa‘i o lou suafa ma fafa‘i i o latou pelu le nifo o lou fatafaitaulaga.
12. “Le Ali‘i e, ‘ia e foa‘i mai ‘ina ‘ia ‘oti‘eseina lona fa‘amaualuga i lana lava pelu.
13. ‘Ia maileia o ia i le matāsele o ona mata pe a matamata mai o ia ‘iā te a‘u; ‘ia e fasioti fo‘i ‘iā te ia i ‘upu malie a o‘u laugutu.
14. ‘Ia e foa‘i mai le loto mausalī ‘ina ‘ia ‘ou ‘ino‘ino ‘iā te ia, ma le malosi ‘ina ‘ia ‘ou fa‘ato‘ilalo ai ‘iā te ia.
15. “Auā o le fa‘amanatuga lea i lou suafa pe a faia‘ina ia i lima o le fafine.
16. Auā e lē o le to‘atele o tagata e fa‘avae ai o lou mana, le Ali‘i e, e lē lagolago lou finagalo i le malosi o solofanua; ‘e te le‘i fiafia fo‘i talu le amataga i ē fa‘amaualuga; a ‘ua e finagalo malie pea lava i le talosaga a ē fa‘amaulalo ma ē agamalū.
17. “Le Atua e o le lagi, le tupu‘aga o vai tetele ma le Ali‘i o mea uma na faia, ‘ia e fa‘afofoga mai ‘iā te a‘u le tagata pagātia, ‘ua tagi atu ma le fa‘alagolago i lou agaalofa.
18. Le Ali‘i e, ‘ia e manatua lau feagaiga ma ‘ia e tu‘u mai le ‘upu i lo‘u gutu ma fa‘amausalī le tonu ‘ua fai i lo‘u loto, ‘ina ‘ia tumau pea lou malumalu ‘ona pa‘ia ‘iā te oe,
19. ma ‘ia iloa ai e nu‘u uma o oe o le Atua ma ‘ua leai se tasi Atua, ‘ua na o oe lava.”