1. ‘Ona ‘auina lea a latou savali e tupu ma ta‘imua o ‘a‘ai ma itūmālō uma ia, o Suria Mesopotamia ma Suria Sopa, o Lipua ma Kilikia, ‘ua latou ō mai ‘iā Holofene ma le fa‘apea mai:
2. ‘Ia gau lou to‘asā ‘iā i matou, auā e lelei pe a matou ola ma ‘au‘auna atu ‘iā Nepukanesa, le tupu sili, ma ‘ana‘ana ‘iā te oe, ‘ae leaga pe ā oti i matou ma tali i lo matou oti le fa‘asalaga o lo matou nofo pologa.
3. O matou ‘a‘ai uma ma a matou mea uma, o mauga ma mea maupu‘epu‘e ma vaimauga uma, o lafu povi, lafu mamoe ma ‘oti, o solofanua ma kamela, o a matou ‘oloa uma lava ma o matou ‘āiga o lo‘o i ou luma.
4. ‘Ia tu i lau pule a matou mea uma;
5. o i matou ma o matou fānau, o au ‘au‘auna i matou.
6. ‘Ia e sau ‘iā te i matou i le pule fīfīmalie, ma e fa‘aaogā la matou ‘au‘aunaga e tusa ma lou loto malie.
7. ‘Ona alu ifo lea mai le mauga ma ona fitafita ti‘eti‘e solofanua ma le ‘au e to‘atele ma ‘ua maua e ia o ‘a‘ai uma ma i latou uma o ē nonofo i le lau‘ele‘ele.
8. A ‘ua na ‘ave o tane malolosi ma le aogā i le tau‘a a‘i ‘a‘ai uma lava e fai mōna fesoasoani.
9. Ma ‘ua matuā tele le mata‘u ‘ua o‘o i itūmālō ia, e i ai ‘ona ō e fa‘afetaia‘i ‘iā te ia i lana sau o ē sa nonofo i ‘a‘ai uma, o ta‘imua ma ali‘i mamalu fa‘atasi ma tagatanu‘u.
10. Sa latou tali ‘iā te ia ma pale ma sulu, o sisiva ma topa ma fagufagu.
11. ‘Ae ui i la latou faia o ia mea, a ‘ua latou le lavātia ‘ona gausia le sauā o lona loto;
12. auā ‘ua na fa‘atafunaina o latou ‘a‘ai ma ‘ua taia o togāla‘au o tupua;
13. auā na poloa‘i atu le tupu o Nepukanesa ‘iā te ia, ‘ia fa‘aumatia o tupua uma lava o le lau‘ele‘ele, ‘ona o lona mana‘o ‘ia na o ia e ta‘ua o le atua o nu‘u ia o le a mafai ‘ona fa‘ato‘ilaloina i le malosi o Holofene.
14. ‘Ua ui atu fo‘i i Suria Sopa ma le nu‘u ‘atoa o Apamea, ma Mesopotamia ‘atoa, ‘ua o‘o atu i tagata Itumaia i le lau‘ele‘ele o Kipea.
15. Ma ‘ua maua lo latou ‘a‘ai ma ‘ua nofo i ai i aso e tolugafulu, o aso ia na poloa‘i ‘ia la‘ei‘au ai le vaega ‘au ‘ato‘atoa o lona itūtau‘a.