1. A ‘ua fa‘alogo o Iutita i ia ‘upu, le fafine ‘ua oti lana tane; o le afafine ia o Merari, o le atali‘i ia o Osa, o le atali‘i ia o Iosefa, o le atali‘i ia o Usia, o le atali‘i ia o Elai, o le atali‘i ia o Iamino, o le atali‘i ia o Kitiona, o le atali‘i ia o sā Rafā, o le atali‘i ia o Akitopo, o le atali‘i ia Melekia, o le atali‘i ia o Enanu, o le atali‘i ia o Natanua, o le atali‘i ia o Salatielu, o le atali‘i ia o Simeona, o le atali‘i ia o Reupena;
2. a o lana tane o Manase, ‘ua oti i ona po o le seleselega karite;
3. auā sa leoleo o ia i ē fusifusia fusiga karite i le fanua ma ‘ua to‘ia lona ulu i le ‘a‘asa o le la, i le ‘ua oti ai i Paitulia, o lona ‘a‘ai ma ‘ua tanumia ai fa‘atasi mōna tamā.
4. ‘Ae ‘ua tu‘ua ai o lana avā o Iutita, ‘ua ‘atoa tausaga e tolu ma masina e ono talu mai ai.
5. O Iutita ‘ua na teuina mo ia le potu lilo i le falealuga o lona fale, sa nofo puipuia ai o ia mana ‘au‘auna teine.
6. Sa fusi lona sulugātiti i le ‘ofu talatala, sa anapogi fo‘i i aso uma lava o lona ola, vaganā o aso sapati, o aso o le masina fa‘ato‘ā va‘aia ma tausamiga o le ‘āiga o Isaraelu.
7. ‘Ae sa matuā ‘aulelei lava ia; na tu‘u mai fo‘i ‘iā te ia e lana tane o ‘oloa e tele ma le ‘au‘āiga e to‘atele ma fanua ‘ua tūtūmu i lafu povi ma lafu mamoe.
8. Sa sili fo‘i ‘ona ta‘uleleia o ia e tagata uma, auā o lona matuā mata‘u i le Ali‘i ma ‘ua leai se tasi na te ta‘uleagaina ia.
9. O lenei, ‘ua fa‘alogo o ia na folafola e Usia o le a tu‘u atu le ‘a‘ai i le fili i lona lima o aso, ‘ona fe‘au lea e ia o toeaina o Kaperi ma Karame,
10. a ‘ua la ō mai ‘iā te ia ma ‘ua ia fai atu ‘iā te i lā‘ua: O le a ‘ea lenā mea ‘ua loto ai o Usia e tu‘u atu le ‘a‘ai i tagata Asuria, pe ‘āfai ‘ua lē o‘o mai ‘iā te ‘outou se fesoasoani a o le‘i mavae atu lona lima o aso?
11. Po o ai fo‘i o ‘outou ‘ua ‘outou tofotofo i le Ali‘i?
12. E lē se matā‘upu lenā e fa‘atupuina ai le agaalofa o le Ali‘i ‘ae fa‘aoso ai lona lava to‘atama‘i ma fa‘amū ai lona to‘asā.
13. Na fa‘atonu lava e ‘outou le itū aso o le agaalofa o le Ali‘i, ma ‘ua ‘outou tu‘upoina i ai le aso i lo ‘outou faitalia.
14. ‘Ae ui i lea, ‘ona ‘ua ‘onosa‘i le Ali‘i, ‘ia tatou salamō i lenā lava mea, ma liligi o tatou loimata i le fa‘atoga atu i lona alofa mutimutivale.
15. Auā o le Atua e lē fa‘amata‘u lava ia, e pei o se tagata, e lē fa‘aosoina fo‘i lona to‘asā e pei o se atali‘i o le tagata.
16. O le mea lea, ‘ia tatou fa‘amaulaloina o tatou agaga i ona luma, ‘ia mautū i tatou i le loto fa‘amaulalo, o ‘au‘auna atu ‘iā te ia.
17. ‘Ia tatou ta‘uta‘u atu i le Ali‘i ma le tagi, ‘ina ‘ia alofa mai ‘iā te i tatou e tusa ma lona finagalo malie; e pei fo‘i ‘ona atuatuvale o tatou loto i lo latou fa‘amaualuga, ‘ia fa‘apea ‘ona tatou mitamita i lo tatou lava fa‘atauva‘a.
18. Auā ‘ua lē mulimuli i tatou i agasala a o tatou tamā, ‘ua latou tu‘ulafoa‘i lo latou Atua ma ifo atu i atua ‘ese.
19. ‘Ona o lea amio leaga ‘ua tu‘uina ai i latou i le pelu, ‘ia vetea fo‘i ma tauemuina e o latou lava fili; a o i tatou, ‘ua tatou lē iloa se tasi Atua, na o ia lava.
20. ‘Ia tatou fa‘atalitali ma le fa‘amaulalo i lana fa‘amafanafanaga, ‘ona taui atu lea e ia lo tatou toto i o tatou fili ‘ua fa‘asauā mai; na te fa‘amaulaloina o nu‘u uma lava e laga mai ‘iā te i tatou, e ‘avea i latou ma tauemuga e le Ali‘i lo tatou Atua.
21. O lenei, sena e, o ‘oulua o toeaina i le nu‘u o le Atua, o lo‘o lagolago ‘iā te ‘oulua o latou agaga, ‘inā ‘oulua fa‘aeaina ia o latou loto i sa ‘oulua apoapoa‘iga, ‘ina ‘ia latou manatua na tofotofoina fo‘i o tatou tamā ‘ina ‘ia iloa ai pe fa‘amaoni la latou ‘au‘auna atu i lo latou Atua.
22. E tatau ‘ona latou manatua na tofotofoina lo tatou tamā o Aperaamo; na tofotofoina i ni puapuagā e tele, ‘ona ‘avea ai lea o ia ma uō a le Atua.
23. E fa‘apea o Isaako, e fa‘apea o Iakopo, e fa‘apea o Mose, ‘atoa ma i latou uma sa fiafia i ai le Atua, ‘ua latou ui atu ma le fa‘amaoni i ni puapuagā e tele.
24. A o ē ‘ua latou lē talia o latou tofotofoga ma le mata‘u i le Atua, a ‘ua fa‘aali atu lo latou le ‘onosa‘i ma ‘ua fa‘alemigao i lo latou muimui i le Ali‘i,
25. na olopalaina i latou e lē na te olopalaina ma ‘ua fano i latou i gata.
26. O lea, ‘aua ne‘i tatou taui ma sui mea ‘ua tatou tigāina ai;
27. a ‘ia tatou tāofi ifo, o fa‘asalaga nei e fa‘atauva‘a pe a fa‘atatau ‘iā tatou agasala, o le sasaga lava lea a le Ali‘i ‘ua a‘oa‘iina ai i tatou e pei o ni ‘au‘auna; ‘ia tatou talitonu ‘ua tutupu mea ia ‘ia o‘o mai ai le a‘oa‘iga, ‘ae lē o le fanoga.
28. Ma ‘ua fai mai ‘iā te ia o Usia ma le ‘au toeaina: O mea moni lava mea uma na e fai mai ai, ma ‘ua leai lava se mea e ponā ai au ‘upu.
29. O lenei la, ‘ia e talosia i matou, auā o oe o le fafine agatonu ma le mata‘u i le Atua.
30. A ‘ua fai atu Iutita ‘iā te i latou: E pei ‘ona ‘outou iloa e mai le Atua o ‘upu na ‘ou mafaia ‘ona tautala ai,
31. ‘ia fa‘apea fo‘i ‘ona ‘outou su‘esu‘e pe mai le Atua le mea ‘ua ‘ou manatu e fai ma ‘ia ‘outou tatalo ‘ina ‘ia fa‘amausalīina e le Atua la‘u filifiliga:
32. E tutū ‘outou i le faitoto‘a o le ‘a‘ai i le po lenā, ‘ae ulufafo ai i mā‘ua ma la‘u ‘au‘auna fafine; ‘ia ‘outou tatalo fo‘i ‘ina ‘ia tepa mai le Ali‘i i lona nu‘u o Isaraelu i lona lima o aso, e pei ‘ona ‘outou folafolaina.
33. ‘Ae ‘ou te lē loto ‘ina ‘ia ‘outou su‘esu‘e i la‘u nei amio se‘ia o‘o lava ‘ina ‘ou ta‘u atua; ‘aua le faia se tasi mea, na ‘ona talosia a‘u i le Ali‘i lo tatou Atua.
34. Ma ‘ua fai mai ‘iā te ia o Usia, le ta‘imua o Iuta: ‘Ia e alu ia ma le manuia, ‘ia ‘iā te oe fo‘i le Ali‘i i le fa‘asalaga o tatou fili. ‘Ona latou tu‘ua lea o ia ma ‘ua latou ō.