1. O ona po o Asueru, o Asueru lea o lē na fai ma tupu e gata mai i Initia e o‘o atu i Aitiope, i itū mālō e tasi le selau e lua sefulu ma le fitu;
2. o ona po ia, ‘ina o nofo le tupu o Asueru i le nofoāli‘i o lona mālō, sa i ai Susana le maota.
3. O le tolu o tausaga o lana nofoa‘iga na ia fai ai le tausamiga ma ali‘i uma ‘ua ‘iā te ia ma ana ‘au‘auna; o ē ‘ua sili o Peresia ma Metai, o ali‘i ma ali‘i o itū mālō, na i ona luma;
4. ‘ina o fa‘aaliatua le sosia o lona mālō mamalu ma le silisili o le matagofie o lona maluali‘i, i aso e tele, o aso e selau ma le valu Sefulu.
5. ‘Ua ‘ato‘atoa ia aso, ‘ona fai ai lea e le tupu o le tausamiga ma tagata uma na i Susana le maota, o ali‘i ‘atoa ma tagata nu‘u, i aso e fitu, i le lotoā o le fanua o le maota o le tupu.
6. Na tautau ai ‘ie lino sinasina; o ‘ie lelei ma ‘ie uli, na fa‘amauina i maea vavae ma le pāuli i mama ario ma pou sesa; na i ai moega auro ma ario i luga o le paepae o paata, ma sesa, ma tara ma sokere.
7. Na avatu ipu auro latou te feinu ai, o ipu e tino ‘ese‘ese, ma uaina a le tupu e tele, e pei ‘ona tatau i le tupu.
8. Na fa‘atatau fo‘i i le tulafono ‘ona inu; ‘ua leai sē na fa‘atauānau atu i se tasi; auā sa fa‘apea ‘ona poloa‘i e le tupu i ē pule uma i lona ‘āiga, ‘ia ta‘itasi le tagata ma lana faitalia.
9. O Vasati fo‘i le masiofo, na ia faia le tausamiga ma fafine i le fale o le tupu, o le fale lea o le tupu o Asueru.
10. O le aso e fitu ‘ina o fiafia le loto o le tupu i le uaina, na ia fai atu ai ‘iā Meumanu ma Piseta, ma Harepona, ma Pigeta, ma Avageta, o Setara ma Karekase, o eunuka ia e to‘afitu ē na ‘au‘auna atu i luma o le tupu o Asueru,
11. ‘ia ‘aumai le masiofo o Vasati i luma o le tupu ma le paleali‘i o le masiofo, ‘ina ‘ia fa‘aali atu lona lālelei i le nu‘u ma ali‘i; auā e lālelei lava o ia.
12. ‘Ae le‘i mafai le masiofo o Vasati ‘ona alu ane i le fe‘au a le tupu na ō atu ai eunuka; ‘ona matuā ita ai lea o le tupu, na tupu tele lava le tigā o lona loto.
13. ‘Ona fai atu lea o le tupu i ē popoto, ē na iloa tausaga; (auā na fa‘apea le masani a le tupu ‘iā te i latou uma na iloa tulafono ma fa‘amasinoga;
14. na latalata ane ‘iā te ia o Karesena, o Setaru, o Atematu, o Tasesa, o Merese, o Maresena, o Memukana, o ali‘i ia e to‘afitu o Peresia ma Metai o ē na iloa fofoga o le tupu, ē na sili i le mālō;)
15. “Se a se mea e faia i le masiofo o Vasati e tusa ma le tulafono, ‘ina ‘ua lē mafai o ia i le ‘upu a le tupu o Asueru na ō atu ai eunuka?”
16. ‘Ona tali mai lea o Memukana i luma o le tupu ma ali‘i, “E lē na o le tupu ‘ua agafa‘api‘opi‘o i ai le masiofo o Vasati ‘ae ‘atoa ma ali‘i uma ma tagata uma o i itū mālō uma o le tupu o Asueru;
17. auā e o‘o atu le tala i le masiofo i fafine uma ‘ona ‘inosia ai lea e i latou o a latou tane, pe a latou ta‘u ane, ‘Na poloa‘i atu le tupu o Asueru ‘ia ‘aumai i ona luma le masiofo o Vasati ‘ae le‘i alu ane o ia.’
18. O tama‘ita‘i fo‘i o Peresia ma Metai ē ‘ua fa‘alogo i le tala i le masiofo, e fai atu ai i latou i le aso nei i ali‘i uma ‘ua i le tupu, ‘ona tele ai lea o le ‘ino‘ino ma le feitaga‘i.
19. ‘Āfai e lelei i le tupu, ‘ia o‘o atu lana afioga mai ‘iā te ia lava, ma ‘ia tusia fa‘atasi ma tulafono a Peresia ma Metai, e lē toe talaina, ‘aua le toe o‘o mai o Vasati i luma o le tupu o Asueru; a ‘ia fai se masiofo a le tupu e sui ai o ia, o se tasi e sili ‘ona lelei ‘iā te ia.
20. A logo atu fo‘i le pule a le tupu, na te faia i lona mālō uma, auā ‘ua tele lea, ona fa‘aaloalo ai lea o fafine uma ‘iā latou tane, o ali‘i ‘atoa ma tagatanu‘u.”
21. ‘Ua lelei fo‘i lenā ‘upu i le manatu o le tupu ma ali‘i; ‘ona faia lea e le tupu e pei ‘ona fai atu ai Memukana.
22. ‘Ua ia avatu tusi i itū mālō uma o le tupu, ‘ua fa‘atatau ma le tusilima a lea itū mālō ma lea itū mālō, e tusa fo‘i ma le gagana a lea nu‘u ma lea nu‘u, ‘ina ‘ia ta‘ito‘atasi le tane ma pule i lona ‘āiga ma ‘ia tautala i le gagana a lona nu‘u.#