1. O le tausaga e sefulu ma le tolu o le nofoa‘iga a le tupu o Nepukanesa, o le aso e luasefulu ma le lua o le ulua‘i masina, na fai ai le i‘uga i le ‘āiga o Nepukanesa le tupu o tagata Asuria, o le a si‘i le tau‘a.
2. Ma ‘ua vala‘au atu i le ‘au matutua uma, ma ta‘ita‘i ‘au uma, mōna tagata tau ma ‘ua taupulepule fa‘alilo fa‘atasi ma i latou.
3. Ma ‘ua fa‘aali atu ai o lona manatu lea, na te fia tu‘uina o nu‘u uma i lalo o lana pule.
4. ‘Ua fiafia o i latou uma i lenā fa‘aaliga, ‘ona vala‘au atu lea le tupu o Nepukanesa ‘iā Holofene, le ta‘ita‘i o ana ‘au,
5. ma ‘ua fa‘apea atu ‘iā te ia: ‘Ia e si‘i le tau‘a i mālō uma o le itū i sisifo, ‘ae maise o nu‘u na latou solia la‘u poloa‘iga.
6. ‘Aua le fa‘apelepele ou mata i se tasi mālō, ‘e te fa‘atūina fo‘i la‘u pule i ‘a‘ai nofo ‘olo uma lava.
7. ‘Ona vala‘au lea e Holofene i ta‘ita‘i ma faipule o le ‘au a Asuria, ma ‘ua na fa‘ala‘ei‘au mo le tau‘a, e pei ‘ona poloa‘i mai ai le tupu, e selau luasefulu afe o ‘au e sāvavali ma le sefulu ma le lua afe o le ‘au fanafana i ū o ti‘eti‘e i solofanua.
8. Ma ‘ua poloa‘i ‘ia muamua atu i ana ‘au le vao kamela e lē mafaitaulia ma mea e tusa ma le tausiga lelei o ana ‘au, ‘atoa ma lafu povi ma lafu mamoe e lē mafaitaulia.
9. ‘Ua poloa‘i ‘ia la‘uina o saito mai le nu‘u ‘atoa o Suria, ma teuina e tusa ma lana ui atu ai.
10. ‘Ua na ‘ave fo‘i ma ia le auro ma le ario tele anoanoa‘i nai le maota o le tupu.
11. ‘Ona alu lea o ia ma lana ‘au ma nofoa ta‘avalevale ma le ‘au ti‘eti‘e i solofanua ma le ‘au fanafana i ū, ‘ua latou ufitia le fogā‘ele‘ele e pei o sē akerise.
12. ‘Ua na sopo‘ia o tuā‘oi o Asuria, ‘ona o‘o atu lea i mauga tetele o Age o lo‘o i le itū tauagavale o Kilikia, ‘ua na maua o latou ‘a‘ai uma ma ‘ua na ā‘ea o latou ‘olo uma lava.
13. ‘Ua na ā‘ea fo‘i le ‘a‘ai matuā ta‘uta‘ua o Meloti, ‘ua na vetea fo‘i o le fānauga a Tasesa, ma le fānauga a Isamaeli o ē sa mau i tuā‘oi o le fanua tu‘ufua ma le itū i matū o le fanua o Kelona.
14. ‘Ona ia sopo‘ia lea le Eufirate, ‘ua o‘o atu i Mesopotamia ma ‘ua na fa‘ato‘ilaloina o ‘a‘ai tūmauga uma lava sa i ai, e āfua i le alia o Mamere e o‘o atu i le sami.
15. Ma ‘ua na maua lo latou lau‘ele‘ele e āfua i Kilikia e o‘o atu i tuā‘oi o Iafeta o lo‘o mau i le itū i saute.
16. ‘Ua na ‘ave fa‘atagataotau‘a le fānauga uma a Mitiana, ‘ua na vetea fo‘i a latou ‘oloa uma, ma ‘ua na fasiotia i le pelu i latou uma sa tete‘e atu ‘iā te ia.
17. ‘Ua mavae atu mea ia, ‘ona ia alu ifo lea i fanua o Tamaseko i aso o le seleselega, ma ‘ua susunu o tosaito uma, ma ‘ua poloa‘i ‘ia taia a latou la‘au ma a latou tōvine uma lava.
18. Ma ‘ua matata‘u ai ‘iā te ia o i latou uma sa nonofo i le lau‘ele‘ele.#