1. ‘Ua mavae nei mea, ‘ona ‘ou fa‘alogo lea e peiseaī o le leo tele o le motu o tagata e to‘atele o i le lagi, ‘ua fa‘apea atu, “Aleluia; ‘Ua i le Ali‘i lo tatou Atua le fa‘aolataga, ma le vi‘iga, ma le fa‘ane‘ene‘ega, ma le mana.
2. Auā e fa‘amaoni, e tonu fo‘i ana fa‘amasinoga; auā ‘ua fa‘asalaina e ia le fafine talitane e sili, o lē na fa‘aleagaina le lalolagi i lana faita‘aga, ‘ua ia taui atu ‘iā te ia lava le toto o ana ‘au‘auna.”
3. ‘Ua latou toe fai atu, “Aleluia; ‘ona alu a‘e ai lea o lona asu e fa‘avavau fa‘avavau lava.”
4. ‘Ua fa‘apa‘ū toeaina e to‘aluafulu ma le to‘afa, ma mea ola e fa, ma ‘ua ifo i le Atua o lē ti‘eti‘e i le nofoāli‘i, ‘ua fa‘apea atu, “Amene; Aleluia.”
5. ‘Ua o‘o mai fo‘i le leo mai le nofoāli‘i, ‘ua fa‘apea mai, “‘Ia vivi‘i atu i lo tatou Atua, o ‘outou ana ‘au‘auna uma, ma ‘outou o ē matata‘u ‘iā te ia, o tagata nu‘u ‘atoa ma ali‘i.”
6. ‘Ua ‘ou fa‘alogo fo‘i e peiseaī o le leo o le motu o tagata e to‘atele, e peiseaī o le ta‘alili o vai e tele, e peiseaī o le ta‘alili fo‘i o faititili tetele, ‘ua fa‘apea atu, “Aleluia; auā ‘ua fai ma tupu le Ali‘i le Atua e ona le malosi uma lava.
7. ‘Ia tatou fiafia ma ‘oli‘oli, ma tu‘u atu le vi‘iga ‘iā te ia; auā ‘ua o‘o mai le tausama‘aga o le Tama‘i Mamoe, o lona faletua fo‘i ‘ua saunia o ia e ia.
8. ‘Ua tu‘uina atu fo‘i ‘iā te ia ‘ina ‘ia ‘ofu o ia i le ‘ie vavae e mamā ma le pupula.” Auā o le ‘ie vavae o le amio tonu lea a le ‘au pa‘ia.
9. ‘Ua fai mai fo‘i o ia ‘iā te a‘u, “‘Ia e tusi, ‘Amu‘ia e ‘ua tala‘iina i le tausama‘aga o le Tama‘i Mamoe.” ‘Ua fai mai fo‘i o ia ‘iā te a‘u, “O afioga moni ia a le Atua.”
10. ‘Ona ‘ou fa‘apa‘ū atu lea i luma o ona vae e ifo ‘iā te ia; a ‘ua fai mai o ia ‘iā te a‘u, “‘Ia oe, ‘aua lava; o a‘u o lou uso a ‘au‘auna, o so lou ‘au uso fo‘i ‘ua i ai i le mau ‘iā Iesu; ‘ia e ifo i le Atua.”Auā o le agaga o le valo‘aga o le mau lea ‘iā Iesu.
11. Na a‘u iloa atu le lagi ‘ua avanoa, fa‘auta fo‘i, o le solofanua sinasina, o lē ti‘eti‘e ai fo‘i ‘ua igoa ia o le Fa‘amaoni ma le Moni, o le amiotonu fo‘i na te fa‘amasino ai ma tau ai le tau‘a.
12. ‘Ua pei o le mumū o le afi ona fofoga, ‘ua i lona ao fo‘i paleali‘i e tele; ‘ua ‘iā te ia le suafa ‘ua tusia e lē iloa e se tasi ‘ua na o ia lava.
13. ‘Ua ‘ofu fo‘i o ia i le ‘ofu ‘ua fufui i le toto ‘ua fa‘asuafaina o ia, O le ‘Upu a le Atua.
14. O ‘au fo‘i o i le lagi ‘ua mulimuli atu ‘iā te ia i luga o solofanua sisina, ‘ua ‘o‘ofu i latou i le ‘ie vavae sinasina ma le mamā.
15. ‘Ua alu atu fo‘i le pelu ma‘ai nai i lona fofoga, ‘ina ‘ia taia a‘i e ia o nu‘u; e pule fo‘i o ia ‘iā te i latou i le to‘oto‘o u‘amea; e soli fo‘i e ia le soligāvine o le to‘asā mamafa o le Atua e ona le malosi uma lava.
16. ‘Ua ‘iā te ia fo‘i le suafa ‘ua tusia i lona ‘ofu ma lona vae, “O le Tupu o tupu, ma le Ali‘i o ali‘i.”
17. Na a‘u iloa fo‘i le tasi agelu ‘ua tu i le lā; ‘ua ‘alaga fo‘i o ia ma le leo tele ‘ua fa‘apea atu i manu uma e felelei i le taulotoaiga o le lagi, “Ō mai ia, ‘inā ‘outou fa‘apotopoto ane i le faigā‘ai a le Atua silisili,
18. ‘ina ‘ia ‘outou ‘a‘ai i tino o tupu, ma tino o ta‘ita‘i o ‘au ta‘ito‘aafe, ma tino o tagata malolosi, ma tino o solofanua ma ē ‘ua ti‘eti‘e ai, ma tino o tagata uma, o ē sa‘oloto ‘atoa ma pologa, o tagatanu‘u ‘atoa ma ali‘i.”
19. ‘Ona ‘ou iloa lea o le manu fe‘ai, ma tupu o le lalolagi, ma a latou ‘au, ‘ua fa‘apotopotoina e tau ai le ta‘ua ma lē ‘ua ti‘eti‘e i le solofanua ma lana itū tau‘a.
20. ‘Ona pu‘ea lea o le manu fe‘ai ‘atoa ma le perofeta pepelo o lē na fai fa‘ailoga i ona luma, o mea ia na fa‘asesēina ai e ia o ē ‘ua i ai le fa‘ailoga o le manu fe‘ai, ma ē ‘ua ifo i lona fa‘atagata; ‘ua lafoolaina i lā‘ua i le lepa afi ‘ua mū i le teiō.
21. A o ē na totoe, ‘ua fasiotia i latou i le pelu ‘ua alu atu nai le fofoga o lē ‘ua ti‘eti‘e i le solofanua; ‘ona mā‘o‘ona ai lea o manu felelei uma i o latou tino.