1. ‘Ua mavae ia mea, ‘ona ‘ou iloa atu lea o le agelu o lo‘o alu ifo i le lagi, ‘ua ‘iā te ia le pule sili; ‘ua malamalama fo‘i le lalolagi i lona pupula.
2. ‘Ua matuā ‘alaga fo‘i o ia ma le leo tele, ‘ua fa‘apea ane, “‘Ua pa‘ū, ‘ua pa‘ū Papelonia le ‘a‘ai tele. ‘Ua ‘avea fo‘i o ia ma mea e nofo ai temoni, ma mea e puipui ai agaga leaga uma, o le mea fo‘i e puipui ai manu felelei uma e leaga ma le ‘inosia.
3. Auā ‘ua feinu nu‘u uma i le uaina o le to‘asā i lana faita‘aga, ‘ua faita‘aga fo‘i ma ia tupu o le lalolagi, o le faula‘iga o ana mea fa‘afiafia ‘ua tamao‘āiga ai ē ‘ua fa‘atau ‘oa o i le lalolagi.”
4. ‘Ua ‘ou fa‘alogo fo‘i i le tasi leo mai le lagi, ‘ua fa‘apea mai,“Lo‘u nu‘u e, ‘ia ‘outou ō ‘ese ‘iā te ia,‘ina ne‘i fa‘atasia ‘outou i ana agasala,‘ina ne‘i tofusia fo‘i ‘outou i ona mala.
5. Auā ‘ua pa‘i atu ana agasala i le lagi,‘ua manatua fo‘i e le Atua ana amioleaga.
6. ‘Ia ‘outou taui atu ‘iā te ia ‘ia pei ‘ona taui mai e ia ‘iā te ‘outou,‘ia ‘outou taui fa‘alua ‘iā te ia e tusa ma ana galuega;o le ipu fo‘i na liligi mai ai e ia,a ‘outou liligi fa‘aluaina atu ai ‘iā te ia.
7. E pei ‘ona mitamita o ia ‘iā te ia lava, mōna ‘ua fa‘afiafia o ia ‘iā te ia,‘ia fa‘apea ‘ona ‘outou tu‘uina atu ‘iā te ia o le puapuagā ma le fa‘anoanoa.Auā ‘ua fa‘apea ifo o ia i lona loto,‘‘Ou te nofo nei o le tupu fafine,‘ou te lē se fafine ‘ua oti lana tane,‘ou te lē iloa lava se fa‘anoanoa.’
8. O le mea lea e o‘o mai ai i le aso e tasi ona mala,o le fa‘ama‘i ma le fa‘anoanoa, ma le oge;e susunuina fo‘i o ia i le afi;auā e mamana lava le Ali‘i le Atua o lē fa‘amasino ‘iā te ia.”
9. O tupu fo‘i o le lalolagi ē na faita‘aga ma fa‘afiafia i latou fa‘atasi ma ia, i latou te taufaitagi ‘iā te ia ma taufaitagitu‘i ‘ona o ia, pe a latou iloa atu le asu o lona susunuina.
10. O ē tutū mamao i latou ‘ona o le fefe i lona puapuagā, e fa‘apea atu, “Auē, auē Papelonia e, le ‘a‘ai tele ma le ‘a‘ai malosi! auā o le itū aso e tasi ‘ua o‘o mai ai lau sala.”
11. O fa‘atau‘oa fo‘i i le lalolagi e taufaitagi i latou ma fa‘anoanoa ‘ona o ia; auā e lē toe fa‘atau e se tasi a latou ‘oloa.
12. O le ‘oloa auro, ma ario, ma ma‘a tāua, ma penina, ma ‘ie vavae, ma ‘ie pāuli, ma le silika, ma le ‘ie mūmū, ma la‘au manogi uma, ma ipu nifo elefane uma, ma ipu la‘au matuā tāua uma, ma le ‘apamemea, ma le u‘amea, ma le ma‘amora,
13. ma kinamomi, ma mea manogi, ma le suāu‘u manogi, ma le pulu lipano, ma le uaina, ma le u‘u olive, ma le falaoa lelei, ma le saito, ma manu, ma mamoe, ma solofanua, ma nofoa fa‘ata‘avalevale, o pologa fo‘i, ‘atoa ma agaga o tagata.
14. “‘Ua te‘a fo‘i ma oe o fua na e tu‘inanau i ai, ‘ua toe fo‘i ma oe mea lālelei uma ma mea pupula, ‘e te lē toe maua lava ia mea.”
15. O ē fa‘atau ia mea, o ē tamao‘āiga ‘ona o ia, latou te tutū mamao ma le fefe i lona puapuagā, o lo‘o taufaitagi ma fa‘anoanoa,
16. o lo‘o fa‘apea atu, “Auē, auē le ‘a‘ai tele,na ‘ofu i le ‘ie vavaema le pāuli ma le mūmū,na teteu fo‘i i auro,ma ma‘a tāua ma penina.
17. Auā o le itū aso e tasi ‘ua fa‘aumatia ai le ‘oloa ‘ua sili ‘ona tele.” O tautai uma, ‘atoa ma tagata uma o i va‘a, ma ‘auva‘a, ‘atoa uma ma ē feoa‘i i le vasa, ‘ua tutū mamao i latou,
18. ma latou ‘alalaga ‘ina o iloa mai le asu o lona susunuina, ‘ua fa‘apea,“O fea se ‘a‘ai e tusa ma lenei ‘a‘ai tele?”
19. ‘Ua latou lafo a‘e fo‘i le ‘ele‘ele i latou ulu, ‘ua ‘alalaga, ma taufaitagi, ma fa‘anoanoa, ‘ua fa‘apea atu,“Auē, auē le ‘a‘ai tele,na tamao‘āiga ai i latou uma o ē o i ai va‘a i le vasa,‘ona o ana mea tāua.Auā o le itū aso e tasi ‘ua fa‘atafunaina ai o ia.
20. ‘Ia e ‘oli‘oli ‘ona o ia, le lagi e,‘atoa ma ‘outou tagata pa‘ia ma ‘aposetolo ma perofeta.Auā ‘ua fa‘asalaina o ia e le Atua ‘ona o le fa‘asalaina o ‘outou e ia.”
21. ‘Ua si‘itia fo‘i o le tasi agelu malosi o le ma‘a e pei o se ma‘aolo tele, ma lafo i le sami, ‘ua fa‘apea atu,“E fa‘apea ‘ona lafotūina o Papelonia le ‘a‘ai tele,e lē toe iloa lava.
22. E lē toe lagona fo‘i ‘iā te oe le leo o ē tā kitara ma ē lagi siva,ma ē ili fagufagu, ‘atoa ma ē ili pū;e lē toe iloa fo‘i ‘iā te oese tufuga e to‘atasi o se faiva e tasi,e lē toe lagona fo‘i ‘iā te oe le ta‘alili o le ma‘aolo,
23. e lē toe pupula mai fo‘i ‘iā te oe,se malamalama o se molī,e lē toe lagona fo‘i ‘iā te oe,le leo o le fa‘ato‘āfaiavā ma le fa‘ato‘ānofotane;auā o ou tagata fa‘atau‘oa o tagata sili ia o i le lalolagi,auā ‘ua fa‘asesēina nu‘u uma i au togafiti fa‘ataulāitu.
24. ‘Ua iloa fo‘i ‘iā te oe le toto o perofeta ma le ‘au pa‘ia,ma i latou uma ‘ua fasiotia i le lalolagi.”#