1. Na a‘u iloa, fa‘auta fo‘i, ‘ua tu mai le Tama‘i Mamoe i le mauga o Siona, ‘ua fa‘atasi fo‘i ma ia tagata e selau afe ma afe e fa sefulu ma le fa o afe, ‘ua tusia le suafa o lona Tamā i o latou muaulu.
2. ‘Ua ‘ou fa‘alogo fo‘i i le leo mai le lagi e pei o le ta‘alili o vai e tele, e pei o le ta‘alili fo‘i o le faititili tetele; ‘ua ‘ou fa‘alogo fo‘i i le leo o ē tā kitara o lo‘o tā ‘iā latou kitara.
3. ‘Ua latou pepese fo‘i e peiseaī o se pese fou i luma o le nofoāli‘i, ma luma o mea ola e fa, ma le ‘au toeaina; e lē mafaia fo‘i e se tasi ‘ona a‘oa‘o i lea pese, na o le selau afe ma afe e fa sefulu ma le fa o afe o ē ‘ua fa‘atauina nai le lalolagi.
4. O tagata ia e le‘i leaga i fafine; auā o taupou i latou; o i latou ia o ē ‘ua mulimuli atu i le Tama‘i Mamoe i mea uma e alu i ai o ia; o i latou ia o ē ‘ua fa‘atauina nai tagata, o ē ‘ua fa‘apolopoloina mo le Atua ma le Tama‘i Mamoe.
5. E lē iloa fo‘i se pepelo i o latou gutu; auā e lē ponā i latou.
6. Na a‘u iloa fo‘i le tasi agelu ‘ua lele i le taulotoaiga o le lagi, ‘ua ‘iā te ia le tala lelei e fa‘avavau e folafola atu i ē nonofo i le lalolagi i atunu‘u uma, ma itū‘āiga, ma gagana ‘ese‘ese, ma nu‘u.
7. ‘Ua fa‘apea atu ma le leo tele, “‘Ia ‘outou matata‘u i le Atua, ma avatu ‘iā te ia le vi‘iga, auā ‘ua o‘o mai le itū aso o lana fa‘amasinoga; ma ‘ia ‘outou ifo i lē na faia le lagi, ma le fanua, ma le sami, ‘atoa ma puna o vai.”
8. ‘Ona mulimuli atu ai lea o le tasi agelu, ‘ua fa‘apea atu, “‘Ua pa‘ū, ‘ua pa‘ū Papelonia o le ‘a‘ai tele, auā ‘ua ia fa‘ainu i nu‘u uma i le uaina o le to‘asā i lana faita‘aga.”
9. ‘Ona mulimuli atu ai lea ‘iā te i lā‘ua o lona to‘atolu o agelu, ‘ua fa‘apea atu ma le leo tele, “‘Ai se tasi e ifo i le manu fe‘ai ma lona fa‘atagata, ma talia le fa‘ailoga i lona muaulu po o lona lima,
10. e inu lava ia i le uaina o le to‘asā o le Atua, ‘ua liligiina atu e lē suia i le ipu o lona to‘asā, o puapuagātia fo‘i ia i le afi ma le teiō i luma o le ‘au agelu pa‘ia ma luma o le Tama‘i Mamoe.
11. O le asu fo‘i o lo latou puapuagā e alu a‘e e fa‘avavau fa‘avavau lava; latou te lē maua fo‘i se filemū i le ao ma le pō o ē ‘ua ifo i le manu fe‘ai ma lona fa‘atagata, ma sē na te talia le fa‘ailoga o lona igoa.”
12. O le mea lenei ‘ua fia maua ai le ‘onosa‘i o le ‘au pa‘ia; o ē ‘ua tausi i poloa‘iga a le Atua ma le fa‘atuatua ‘iā Iesu.
13. Na ‘ou fa‘alogo fo‘i i le leo mai le lagi, ‘ua fa‘apea mai ‘iā te a‘u, “‘Ia e tusi: ‘Amu‘ia e ‘ua oti, o ē ‘ua oti o i le Ali‘i”“E amata i nei ona pō o lea lava,” ‘ua fetalai mai ai le Agaga. “‘Ina ‘ia latou mālōlō ‘iā latou galuega tigā; auā fo‘i o a latou galuega fo‘i e mulimuli ‘iā te i latou.”
14. Na a‘u iloa fa‘auta fo‘i, o le ao sinasina, ‘ua ti‘eti‘e fo‘i i le ao le tasi ‘ua pei o le Atali‘i o le tagata, ‘ua i lona ao le paleali‘i auro, ‘ua i lona ‘a‘ao fo‘i le selesaito ma‘ai.
15. ‘Ua alu atu fo‘i le tasi agelu nai le malumalu, ‘ua ‘alaga ma le leo tele i lē ‘ua ti‘eti‘e i le ao, “‘Inā fa‘ao‘o atu ia lau selesaito, ‘inā sele, auā ‘ua o‘o i ona pō ‘e te selesele ai, auā na afu le saito o le lalolagi.”
16. ‘Ona fa‘ao‘o mai lea e lē ‘ua ti‘eti‘e i le ao lana selesaito i le lalolagi, ‘ua seleseleina ai le lalolagi.
17. ‘Ua alu atu fo‘i le tasi agelu nai le malumalu o i le lagi, ‘ua ‘iā te ia fo‘i le selesaito ma‘ai.
18. O le tasi agelu fo‘i ‘ua alu atu nai le fatafaitaulaga, ‘ua ‘iā te ia le pule i le afi, ‘ua ‘alaga fo‘i ia ma le leo tele i lē ‘ua i ai le selesaito ma, ‘ua fa‘apea atu, “‘Inā fa‘ao‘o atu ia lau selesaito ma‘ai, ‘inā sala ia i fuifui vine o le vine o le lalolagi, auā ‘ua otatā ona fuifui vine.”
19. ‘Ona fa‘ao‘o mai ai lea e le agelu o lana selesaito i le lalolagi, ‘ua sala fo‘i e ia le vine o le lalolagi, ‘ua ia lafo atu fo‘i i totonu o le soligāvine tele o le to‘asā o le Atua.
20. ‘Ua solia fo‘i le soligāvine i tua o le ‘a‘ai, ‘ua alu atu fo‘i le toto nai le soligāvine e o‘o i fa‘agutu o solofanua, e tasi le afe ma le ono o selau o setatio ‘ua pau mai ai.#