1. A ‘ou iloa fo‘i i le ‘a‘ao taumatau o lē ti‘eti‘e i le nofoāli‘i, o le tusi ta‘ai ‘ua tusia i totonu ma le tua, ‘ua fa‘amauina i fa‘amaufa‘ailoga e fitu.
2. Na ‘ou iloa fo‘i le agelu malosi na tala‘i atu ma le leo tele, “O ai ‘ea e tatau ‘ona fofola e ia o le tusi ta‘ai ma tatala ona fa‘amaufa‘ailoga?”
3. ‘Ae leai se tasi i le lagi, po o le lalolagi, po o lalo o le lalolagi, na te mafaia ‘ona fofolaina le tusi pe va‘ai i ai.
4. ‘Ona ‘ou tagi tele ai lea, ‘ina ‘ua lē maua se tasi e tatau ai ‘ona fofolaina e ia ma faitau le tusi ta‘ai pe va‘ai i ai.
5. ‘Ona fai mai ai lea ‘iā te a‘u o le tasi o le ‘au toeaina, “‘Aua ‘e te tagi; fa‘auta, ‘ua manumālō le Leona o le itū‘āiga o Iuta o le A‘a o Tavita, e fofola i le tusi ta‘ai, ma tatala i ona fa‘amaufa‘ailoga e fitu.”
6. Na a‘u iloa fo‘i, fa‘auta, na tu mai i le vā o le nofoāli‘i ma mea ola e fa, e i ona tua fo‘i le ‘au toeaina, o le Tama‘i mamoe e peiseaī na fasia, e fitu ona nifo ma ona mata e fitu o Agaga ia e to‘afitu o le Atua ‘ua ‘a‘auina atu i le lalolagi uma.
7. ‘Ua alu atu ia, ma tō mai le tusi ta‘ai nai le ‘a‘ao taumatau o lē ti‘eti‘e i le nofoāli‘i.
8. ‘Ua tō mai e ia le tusi ta‘ai, ‘ona fa‘apa‘ū ai lea o mea ola e fa ma toeaina e to‘aluafulu ma le to‘afa i luma o le Tama‘i Mamoe, ‘ua tofu i latou ma le kitara, ma le ipu auro ‘ua tumu i mea manogi e mū, o talosaga ia a le ‘au pa‘ia.
9. ‘Ua latou pepese fo‘i i le pese fou, ‘ua fa‘apea atu:“‘Ua tatau lava oe ‘ina ‘ia e tago i le tusi ta‘aima tatala i ona fa‘amaufa‘ailoga.Auā na fasia oe, ‘ua e fa‘atauina fo‘i tagata i lou lava toto mo le Atua,mai itū‘āiga uma, ma gagana ‘ese‘ese, ma nu‘u, ‘atoa ma atu nu‘u.
10. ‘Ua faia fo‘i i latou ma nu‘u fa‘atupu o ositaulaga fo‘i i lo matou Atua;e fai fo‘i i matou ma tupu i le lalolagi.”
11. Na a‘u iloa atu fo‘i, ma ‘ou fa‘alogo i le leo o agelu e to‘atele, o ē ‘ua fa‘ata‘ali‘oli‘o i le nofoāli‘i, ma le leo o mea ola e fa ‘atoa ma le ‘au toeaina; o lo latou faitau aofa‘i ‘ua mano ni mano, ma afe ni afe.
12. O lo‘o fa‘apea atu ma le leo tele,“‘Ua tatau lava i le Tama‘i Mamoe na fasia,‘ina ‘ia tu‘uina atu ‘iā te ia le mana, ma le ‘oa, ma le poto,ma le malosi, ma le fa‘ane‘ene‘ega, ma le vi‘iga, ma le fa‘amanū.”
13. Na ‘ou fa‘alogo fo‘i i mea uma na faia o i le lagi, ma le lalolagi, ma lalo ifo o le lalolagi, ma mea fo‘i o i le sami, ‘atoa ma mea uma o i ai i ia mea, o lo‘o fa‘apea atu,“‘Ia ‘iā te ia o lē ti‘eti‘e i le nofoāli‘i ‘atoa ma le Tama‘i Mamoe,le fa‘amanū, ma le fa‘ane‘ene‘ega, ma le vi‘iga, ma le malosi,e fa‘avavau fa‘avavau lava.”
14. ‘Ona fai atu lea o mea ola e fa, “Amene” ‘Ona fa‘apa‘ū lea o toeaina ma ifo atu.