1. ‘Ona tu‘uina mai lea ‘iā te a‘u le u e pei o se to‘oto‘o; ‘ua tu mai fo‘i le agelu, ‘ua fa‘apea mai, “Tula‘i ia, ‘inā fuatia ia le malumalu o le Atua, ma le fatafaitaulaga, ma ē o tapua‘i i ai.
2. A o le lotoā o le malumalu e aupito i tua, lafoa‘i lea, ‘aua fo‘i ‘e te fuaina, auā ‘ua tu‘uina atu i nu‘u ‘ese; latou te solia fo‘i le ‘a‘ai pa‘ia i masina e fagafulu ma le lua.
3. ‘Ou te tu‘uina atu fo‘i i a‘u molimau e to‘alua, la te vavalo ai i aso e tasi le afe e lua selau ma le onogafulu, e ‘o‘ofu i lā‘ua i ‘ie talatala.”
4. O la‘au olive ia e lua, ma tu‘ugāmolī e lua ‘ua tutū i luma o le Ali‘i o le lalolagi.
5. ‘Āfai fo‘i e fia fa‘aleaga se tasi ‘iā te i lā‘ua, ‘ona alu atu ai lea o le afi a‘i o la gutu, e fa‘aumatia ai ē ‘ua fai i lā‘ua mo latou fili; ‘āfai fo‘i e fia fa‘aleaga se tasi ‘iā te i lā‘ua, e tusa ‘ona fa‘apea ‘ona fasiotia o ia.
6. ‘Ua ‘iā te i lā‘ua le pule e pupuni le lagi, ‘ina ‘ia lē tō ifo se timu i aso o la la valo‘aga; ‘ua ‘iā i lā‘ua fo‘i le pule i vai e liu ai ma toto, e taia fo‘i le lalolagi i mala uma, o lo la faitalia pe atu fia.
7. Pe a uma ‘ona la fa‘ai‘uina la la mau, ‘ona si‘i mai lea o le tau‘a ‘iā te i lā‘ua e le manu fe‘ai lē ‘ua alu a‘e nai le tō e lē gata, e manumālō fo‘i o ia ‘iā te i lā‘ua, ma fasioti ‘iā te i lā‘ua.
8. O la tino fo‘i e i ai ia i le ala o le ‘a‘ai tele, o lona igoa pei e fa‘atusa o Sotoma ma Aikupito, o le mea fo‘i na fa‘asatauroina ai lo tatou Ali‘i.
9. E tolu aso ma le vaeluagalemū o le aso e va‘ava‘ai ai i o la tino e nisi mai nu‘u, ma itū‘āiga, ma gagana ‘ese‘ese, ma atu nu‘u ‘ae latou te lē mafafai ‘ona ia tu‘uina atu o la tino i tu‘ugamau.
10. E fiafia fo‘i ē ‘ua nonofo i le nu‘u ‘ona o i lā‘ua, ma latou ‘oli‘oli, ma fe‘avea‘i mea alofa; auā na fa‘atigāina ē ‘ua nonofo i le nu‘u e ia perofeta e to‘alua.
11. A ‘ua mavae aso e tolu ma le vaeluagalemū o le aso, ‘ona uluitinoina ai lea o i lā‘ua e le agaga ola mai le Atua, ‘ona la tutū i luga ai lea o la vae, ‘ona o‘o ai lea o le mata‘u tele i ē na matamata ‘iā te i lā‘ua.
12. ‘Ona la fa‘alogo lea i le leo tele mai le lagi, ‘ua fa‘apea atu ‘iā te i lā‘ua, “‘Inā ō mai ia i luga nei.” ‘Ona la ō a‘e ai lea i le lagi i le ao, ‘ua matamata fo‘i ‘iā te i lā‘ua o ē na fai i lā‘ua mo latou fili.
13. O le itū aso lava lea na tō ai le mafui‘e tele, ‘ua pa‘ū ai fo‘i lona sefulu o vaega o le ‘a‘ai, ‘ua oti fo‘i i le mafui‘e tagata e to‘afitugaafe; ‘ua matata‘u fo‘i ē na totoe, ‘ona latou vivi‘i atu lea i le Atua o le lagi.
14. ‘Ua mavae atu lona lua o auē; fa‘auta, o lona tolu o auē e vave ‘ona o‘o mai.
15. ‘Ua ili fo‘i e lona to‘afitu o agelu le pū, ‘ona i ai lea i le lagi o leo tetele, ‘ua fa‘apea mai, “O le mālō o le lalolagi ‘ua ‘avea mo lo tatou Ali‘i ma lona Keriso, e fai fo‘i o ia ma tupu e fa‘avavau fa‘avavau lava.”
16. O toeaina fo‘i e to‘aluafulu ma le to‘afa, o ē nonofo i o latou nofoāli‘i i luma o le Atua, ‘ua latou fa‘apa‘ū faō, ma ifo i le Atua,
17. ‘ua fa‘apea atu, “Le Ali‘i e, le Atua le ou le malosi uma lava,‘ua matou fa‘afetai atu ‘iā te oe, o lē soifua, o lē na soifua, o lē a afio mai,‘ina ‘ua e tago i lou mana tele ma ‘ua fai oe ma tupu.
18. ‘Ua ita fo‘i nu‘u,‘ona o‘o mai lea o lou to‘asā,ma ona pō e fa‘amasinoina ai ē ‘ua oti,ma taui ai i au ‘au‘auna le ‘au perofeta,ma le ‘au pa‘ia, ma ē ‘ua matata‘u i lou suafa,o tagatanu‘u ‘atoa ma ali‘i,e fano ai fo‘i i latou o ē na fano ai le lalolagi.”
19. ‘Ua fa‘aavanoaina fo‘i le malumalu o le Atua i le lagi, ‘ona iloa atu ai lea o le ‘atola‘au o lana feagaiga i lona malumalu; ‘ona tutupu lea o uila, ma leo, ma faititili, ma le mafui‘e, ma le uato‘a tetele.#