1. ‘Ua sau fo‘i i le tasi o ia agelu e to‘afitu sa i ai ipu e fitu, ‘ua tautala mai ‘iā te a‘u, ‘ua fa‘apea mai ‘iā te a‘u, “Sau ia, ‘ou te fa‘ailoa ‘iā te oe le fa‘asalaina o le fafine talitane e sili, o lē ti‘eti‘e i vai e tele.
2. ‘Ua faita‘aga ma ia o tupu o le lalolagi, ‘ua ‘onā fo‘i ē o nonofo i le lalolagi i le uaina o lana faita‘aga.”
3. ‘Ua ia ‘avea fo‘i a‘u a i le vao i le Agaga; ‘ona ‘ou iloa lea o le fafine ‘ua ti‘eti‘e i le manu fe‘ai mūmū, ‘ua lilo i igoa fāifai, e fitu ona ulu ma ona nifo e sefulu.
4. ‘Ua ‘ofu le fafine i le ‘ie pāuli ma le mūmū, ‘ua teuteu fo‘i i auro, ma ma‘a tāua, ma penina, ‘ua i lona lima le ipu auro ‘ua tumu i mea e ‘inosia ma le leaga o lana faita‘aga.
5. ‘Ua tusia fo‘i i lona muaulu le igoa e lilo, lona uiga “Papelonia le ‘a‘ai tele, o le tinā o fafine talitane ma mea e ‘inosia i le lalolagi.”
6. Na ‘ou iloa fo‘i le fafine ‘ua ‘onā i le toto o le ‘au pa‘ia ma le toto o ē na molimau ‘iā Iesu.‘Ua ‘ou iloa atu ‘iā te ia, ‘ona ‘ou matuā ofo tele ai lea.
7. ‘Ona fai mai lea o le agelu ‘iā te a‘u, “Se a le mea ‘ua e ofo ai? ‘Ou te ta‘u atu ‘iā te oe le uiga lilo o le fafine, ma le manu fe‘ai ‘ua ia ti‘eti‘e ai, e fitu ona ulu ma ona nifo e sefulu.
8. O le manu fe‘ai na e iloa, sa i ai, ‘ua lē i ai fo‘i, o le a alu a‘e fo‘i o ia ai le tō e lē gata, e alu atu fo‘i o ia i le malaia; o ē nonofo i le lalolagi e le‘i tusia o latou igoa i le tusi o le ola talu ‘ona fa‘avaeina o le lalolagi, latou te taufaiofo, pe a iloa le manu fe‘ai sa i ai, ‘ua lē i ai fo‘i, o lo‘o i ai lava.
9. “O le mea lenei e tusa ai le atamai ma le poto. O ulu e fitu o mauga ia e fitu, ‘ua nofo ai le fafine;
10. o tupu fo‘i ia e to‘afitu; e to‘alima ‘ua pa‘u‘ū, o lo‘o i ai le tasi, e le‘i o‘o mai nei fo‘i le tasi; pe ā o‘o mai e tusa ‘ona sa‘asa‘a ona pō e tumau ai.
11. O le manu fe‘ai fo‘i sa i ai, ‘ua lē i ai fo‘i, o lona to‘avalu lea, nai le to‘afitu fo‘i o ia, e alu atu fo‘i o ia i le malaia.
12. O nifo fo‘i e sefulu na e iloa, o tupu ia e to‘asefulu, ‘ua lē o‘o ‘ina maua o latou mālō, ‘ae maua e i latou le pule pei o tupu e tasi le itū aso fa‘atasi ma le manu fe‘ai.
13. ‘Ua loto gatasi i latou nei, latou te avatu fo‘i o latou malosi ma a latou pule i le manu fe‘ai.
14. Latou te tau le tau‘a ma le Tama‘i Mamoe, ‘ae manumālō le Tama‘i Mamoe ‘iā te i latou, auā o le Ali‘i ia o ali‘i ma le Tupu o tupu; o ē ‘ua ‘iā te ia fo‘i ‘ua vala‘auina i latou, ma filifilia, ma fa‘amaoni.”
15. ‘Ona fai mai lea o ia ‘iā te a‘u, “O vai na e iloa, o lo‘o ti‘eti‘e ai le fafine talitane, o nu‘u ia, ma motu o tagata, ma atunu‘u, ma gagana ‘ese‘ese.
16. O nifo fo‘i e sefulu na e iloa i le manu fe‘ai, latou te ‘ino‘ino i le fafine talitane, ma fa‘asaunoa ‘iā te ia, ma tō ‘ese ona ‘ofu, latou te ‘a‘ai fo‘i i lona tino, ma susunu ‘iā te ia i le afi.
17. Auā ‘ua tu‘uina atu e le Atua i o latou loto ‘ia faia lona finagalo, latou te loto gatasi fo‘i e avatu lo latou mālō mo le manu fe‘ai, se‘ia taunu‘u afioga a le Atua.
18. O le fafine fo‘i na e iloa, o le ‘a‘ai tele lea, e i ai le pule i tupu o le lalolagi.”