1. Uperire omombáma ramo Jesús opa coa jemiñemoñeê, Jae jei jemimboecuerape:
2. Peê peicuaa voí mocoî arajápe oicótajá pe areté guasú Pascua, ja co Caraí Raŷ oñemeêne oyeyuca jaguâ curusu reje.
3. Uperamo voí umi pai ruvicha ja umi caraí ituyáva upepegua oñembyatŷma raé pe pai guasu jérava Caiafas ró cárape,
4. ja oñomonguetá ñemi oñondive oyapyjŷ jaguâ Jesúspe pichyguŷpe icatu jaguâ oyucá Ichupe.
5. Ja jei: Nda iyái co areté guasu yavé ani jaguâ oico aybú co tetâme.
6. Uperamo oi pypé Jesús pe Betaníape pe Simon pe leproso rógape,
7. sapya ou Jendápe peteî cuña peteî mbayru pôjâ jyacuâ pôrâva jepy etéva rejeve, ja oñojê ichupe iñâcâ reje oguapyjápe Jae pe carújápe.
8. Ja ojecha ramo upea jemimboe cuera ipochy ja jei: ¿Maerâpa co sarambi?
9. Peva catu icatu vaerâ moa ñañemû jepy etá reje ja oñemeê vaerâ moa jepycue umi mboriajú cuerape.
10. Ja Jesús ojechacuaama ramo jeija jina upeicha, jei ichupecuera: ¿Maerâpa pemuanguecói co cuña me? Jae oyapo tembiapo ipôrâvarâ Cheve.
11. Umi mboriaju cuerape oime pereco tapia voí penendive. Cheve nda Che rerecoi tapia.
12. Oñojê pype co pôjâ jyâcuâva Che rete reje, oyaponte Che añeñotŷ ramo guârâ.
13. Ja Che jae peême añeté mamo oñemoñeê jaguâme co Evangelio opa co yby yere reje, oñemo jêrâcuâne co Jae oyapo vaecue avei, oñemandua jaguâ jese.
14. Uperamo peteî umi doceva, jérava Judas Iscariote, ojo umi pai ruvicha rendape,
15. ja jei ichupecuera: Mbobypa peicuameê cheve ameê ramo guârâ Ichupe pende pope? Ja jaecuera oicuameê ichupe treinta pirá piré.
16. Ja upeguive jae ojeca oicovo ára iya jaguâ omeê Ichupe ipopecuera.
17. Uperire pe oñypyrûjá árape pe areté mbuyape caraí pegua ou Jesús rendape jemimboe cuera jeivo: ¿Mamópa reipota rombosacoí Ndeve reú jaguâ co Pascua peguârâ?
18. Ja Jae jei: Tapejó pe tetâme petei caraí rendape ja peye ichupe: Ore mboejára jeiuca ndeve: Jiâguíma Che ára. Nde rogape voí ambuetese co Pascua areté Che remimboe cuera rejeve.
19. Upei catu oyapo jemimboe cuera jecópe pe Jesús oyapouca jagueicha ja ombosacoí pe Pascua peguârâ.
20. Ja caaru etéma ramo. Jae oguapy carujápe umi doce jemimboe cuera rejeve,
21. ja ocaru aya jaecuera Jae jei: Che jae peême añete oiméjá peteî peêva Che yapyjyucá vaerâ.
22. Ja ombuasŷ tuvicha jaecuera ja oñypyrû oporandu Ichupe jeivo oyoapycueri: ¿Chepa jae, Ñandeyára?
23. Ja Jae jei: Upe opoêva Che yave co ñaembépe, upéva catu pe Che yapyjyucá vaerâ.
24. Co Caraí Raŷ oyeí jina añeté, oyee jaicha Ichugui pe Santa Escriturape. Angai pe cuimbae co Caraí Raŷ yapyjy ucá járarâ. Ipôrâ vaerâ moa máramo oñemoña ŷ rire pe cuimbae.
25. Upei catu pe Judas pe iyapyjyucájarâ jei: ¿Chepa jae, Ñandeyára?
26. Ja Jae jei: Upeicha! nde ere jaichante voí. Ja ocaru aya jaecuera Jesús oipyjy pe mbuyape ja ojovasá ja oipejaâ ja omeê jemimboe cuerape, ja jei: Coina ape, peúnte. Cóva Che reté.
27. Upeicha avei Jae oipyjy pe mbayru ja ojovasá ja omeê ichupecuera jeívo:
28. Peúnte ichugui opavavé peêcuera. Cóva voí Che ruguŷ pe Ñandeyára remicuameê ypycue pende repŷrâ, oñejê vaerâ jeta rejejape, oyepeapá jaguâ iñangaipa.
29. Che jae peême coanga guive ndaŷuvéi jaguâ Che co parral rycuéré gui upe yau jaguâ ipyajúva ára peve pene ndive Che Ru yvapegua rendape.
30. Uperire opurajeipáma ramo osê ojovo pe Olivas itáatŷrape.
31. Upei catu Jesús jei ichupecuera: Opavavé peê peñembo pyávaíne Cheve co pyjaré, oyeé jagueicha voí pe Santa Escriturape: Ayapíne pe ovecha rerecuápe, ja isarambipáne pe ovecha atŷra.
32. Upegui aicové yeby rire ajane pene renonde Galileape.
33. Upei catu oñeê Pedro ja jei Ichupe: Opavavé oñembo pyávaí ramo yepe Ndeve, che nico máramo nañembo pyávaí chéne.
34. Ja Jesús jei ichupe: Añeté Che jae Ndeve anga pyjaré voí osapucai mboyvé ryguasu nde Che momârâmane mbojapŷ yeby.
35. Ja jei Ichupe Pedro: Tecôtevê ramo yepe amano Nendive, máramo no romomârâi chene Ndeve. Upeicha avei jeipa umi ambuecue jemimboe cuera avei.
36. Upegui ôguajê Jesús jendive cuera pe tendape jérava Getsemané, ja jei jemimboecuerape: Peguapŷ coápe peê aja peve Che amongoty añemboe jaguâ.
37. Ja Jae ogueraja jaeñojápe Pedrope, ja umi Zebedeo raŷ cuera mocoîvepe. Upei catu Jae oñypyrû ombuasŷ eterei ja oyepyapŷ tuvicha.
38. Ja jei ichupecuera: Che ángape Che pyámbyasŷ tubichaité amano jaguâicha. Pepytá ape Che reromaña jaguâ.
39. Upei catu Jae ojo tenondemivé ja oñesû ovapŷvo ja oñemboe jeivo: Che Ru, icatu ramo tojasá Chejegui co mbayrú. Upeichaŷramo yepe, anichene Che aipota jaicha, toiconte Nde reipota jaicha.
40. Upei catu oú jemimboe cuera rendape ja oyuju oké jicuai, ja jei Pedrope: ¿Ndicatuipa, upeicharamo, Che reromaña sapyami.
41. Pemaña ja peñemboe, ani jagua peiké pe aña pende pyaraâ jaguâme. Pende pyapŷpe añete pene kyrêî, pende retente jeungue.
42. Upei catu oyeí yeby ichuguicuera ja oñemboe yeby: Che Ru, icatu ŷ ramo ojasa Chejegui co mbayru Che jaŷú ŷ reje ipype, toyeyaponte Ne rembipota!
43. Ja ou yeby ja oyuju oké jicuai; jopejŷi eterei voí jaecuera.
44. Ja Jae ojeya ichupecuera, ja ojo yeby, ja oñemboe yeby mbojapy yebyjápe jei yebyvo yepi guaicha.
45. Uperire ou yeby jemimboe cuera rendape, ja jei ichupecuera: Pekénte gueteri ja pepytuú peê. Peina Chejáma. Anga voi jiâguíma co Caraí Raŷ oñemeê jaguâ umi angaipavóra pope.
46. Pepuânte, yaja! Peina jiâguíma pe Che pyjyucájarâ.
47. Ja oñeê aya gueteri jina peína ou pe Judás umi doce rejeguáva, ja oi jendive tecové iyatŷva kysé pucu ja ybyrá rejeve, umi paí ruvicha ja caraí ituyáva upepegua remimbou cuera voí.
48. Ja pe ipyjŷucájarâ omboe voí raé tenonderâ ichupecuera jeivo: Pe che ayurupyte vaerâme upéva Jae. Peipyjynte Ichupe.
49. Ja upevove jae oñemboya Jesús rendape ja jei: ¿Maitéipa ore mboejára? ja oyurupyté Ichupe.
50. Ja Jesús jei ichupe: Eyaponte, Che îrû, pe reyapo vaerâ reyúvo. Upemaramo oñemboya jaecuera ja oyapocoi Jesús reje, ja oyapyjy Ichupe.
51. Ja sapyaite peteîva Jesús rejeguáva omondo ipo ja ojekyi ikysé pucu ja oikytî pe paí guasu rembiguaipe ja onambió.
52. Upei catu Jesús jei ichupe: Emoingué yeby nde kysé pucu jyrúpe. Opa umi kysé pucu oiporúva guive kysé pucúpe omanombáne.
53. Sapya reimoâ Che ndicatúijá ayerure Che Ru pe Che pŷtŷvô jaguâ, ja sapyaite Jae ombou moa Cheve jetave doce jembiyocuai yvapegua atŷra gui.
54. Upeicharamo, mbaéichapa icatúne oyeyapo jecope pe Santa Escriturape oyeéva upeicha voí vaerâjá.
55. Upemaramo Jesús jei umi iyatŷvape jicuai: Peteî imondavaichapepa pesê peyúvo pende kysé pucu ja ybyra rejeve Che yapyjŷ jaguâ? Opa árape aguapŷ aicovo pe tûpâope aporo mboévo, ja peê nda Che yapyjŷi vaecue.
56. (Opa umimbae oyeju voí oico jaguâ jecope pe oyee vaecue Santa Escriturape umi ñemoñeêjára yuru rupi.) Ja upepe jemimboe cuera ojeyapá Ichupe, ja oñeguâjêmba.
57. Upei catu umi oipyjy vaecue Jesúspe, ogueraja Ichupe pe pai guasu Caiafas rendape oñembyatŷ jaguepe voí umi iñarandúva ja umi caraí ituyáva.
58. Ja Pedro ou japycuéri, mombyry Ichugui oicovo, pe pai guasu corapŷ peve ja oike pypé ja oguapy umi tembiyocuai ndive ojecha jaguâ mbaépa oyejú vaerâ.
59. Ja umi pai ruvicha ja umi carai ituyáva ja umi mburuvicha yoa ojecá jei vaerâ yapú Jesú reje oime jaguâicha oyuca jaguâ Ichupe.
60. Ja ndicatui oyuju mbaeve, oyejechaucá ramo yepe jeta jei vaecue yapú Jesé. Uperire oyejechaucá mocoî tecové jei vaecue:
61. Cóva nico jei vaecue: Icatu Che ambuai Tûpâ Ñandeyára roga marangatú, ja mbojapŷ arajápe amopuâmba yebyne.
62. Upei catu opuâ oñemboŷ pe pai guasu ja jei Ichupe: ¿Ndipóripa rembojovai jaguâ umivape cuera? ¿Mbaé mbaepa coa omboyáva umia Ndereje?
63. Ja oguero kîrîrî Jesús. Ja pe paí guasu jei yeby Ichupe: Ta romoñeê Ndeve Tûpâ Ñandeyára oicovéva rérape ere jaguâ Ndépa pe Cristo, Tûpâ Ñandeyára Raŷ?
64. Ja Jesus jei ichupe: Upeicha! nde ere jaichante. Anga tae pôrâite abei peême coanga rire pejecha jaguâ co Caraí Raŷ oguapŷ ramo pe Ipuacaitevéva acatua coty ja ou ramo yvagui umi arai paûme.
65. Upei catu pe pai guasu omondoropá iyao ja jei: Oñeê vaí Tûpâ Ñandeyára reje! ¿Maerâpa ñaicôtevê oicuaaucáve vaerâ. Peina anga peê voi pejendúma raé oñeê vaí ramo Ñandeyára reje.
66. ¿Mbaépa jiâ peême? Ja jaecuera oñeê ja jei: Iyánte Ichupe oyeyuca jaguâ.
67. Upei catu oindybu jová reje, ja oinûpâ Ichupe, ja ojovápeté,
68. jeivo: Ejaûvônte oreve. Nde Cristo, yajecha avápa Ne nûpâ raé?
69. Upeyave Pedro oime oguapy ocápe pe corapŷpe, ja ôguajê Jendápe peteî tembiguai cuñáva ja jei: Nde avei reime vaecue co Jesús pe Galileaŷgua ndive.
70. Ja jae omomârâ Ichupe opáva renondepe, ja jei: Ndaicuaai co nde eréva.
71. Ja jae osê pe okême, ja ojecha ichupe cuñatâí ambue, ja jei umi upepe oi vaecuepe: Co tecové avei oi vaecue co Jesús Nazaréno ndive.
72. Ja jae omomârâ yeby Ichupe oñeê jâtâvo Tûpâ Ñandeyára rérape jeivo: Che ndaicuaai pe cuimbaepe.
73. Uperiremi umi oñemboŷva upepe ôguajê Pedro rendape ja jei ichupe: Añetejápe nde avei Upéva cueraguá. Ne ñeê yepe ne mombeú.
74. Upemaramo jae oñypyrû oñeê tieŷ omondopávo ichupecuera añaretâme ja oñeêvo Tûpâ rérape ja jeivo: Che ndaicuaai pe cuimbaepe. Ja upevove osapucai ryguasú.
75. Ja Pedro imanduá pe Jesús ñeêngue reje jei vaecue ichupe: Osapucai mboyvé ryguasu Che momârâ maneraé Cheve mbojapy yeby. Ja jae osê ocape ja jasê oyajeóvo ombuasŷ ete gui.