1. Upemaramo oñeé Jesús umi oñembyatŷvape jicuai ja jemimboe cuerape, ja jei:
2. Oime umi iñarandúva ja umi fariseo oguapŷ pe Moises oguapyjá ári.
3. Upeicharamo, umi jeiva guive jaecuera peyapopánte ja pembuayepá jecópe. Opaichavó yepe ani peyapo jembiapocueicha. Jaecuera voí jei, ja ndoyapoi.
4. Jaecuera oñapytî guaú mbae ipojŷiva icatuŷvaerâ yarajá, ja omoî guau umi cuimbae cuera atúa ári, ja jaecuera voí na peteî icuâme yepei nomomŷiséi umimbae.
5. Ja umi jembiapo voí yepe oyapopá oyejecha potávonte umi caraí gui. Jaecuera ombopŷvé umi isŷva rejegua, ja ombopucúvé iyao yeguajá.
6. Oipyjy umi tenda oyeguapŷjá tenondévégua umi caruguasujápe, ja upeicha avei umi oyeguapŷjá tenondévégua umi tûpâope.
7. Jaecuera obŷá eterei oúpá ramo otûpânoî ichupecuera umi tapé rupi, ja ombojéra ramo ichupecuera Ore mboejára umi ybypóra.
8. Peêcuera voí ani peñembo jéraucá mboejára ramo. Oime voí peteî añó pene mboejaraeté, ja opavavé peêcuera oyuejeguante.
9. Upeicha avei ani pembojéra avavepe pende ru ramo co ybyari. Peteî añó oime pende Ru, pe oiméva yvape.
10. Upeicha avei ani peñembo jéraucá mburuvicha ramo. Peteî añónte oime pende Ruvichá, pe Cristo catu jae.
11. Ja pe tuvichavéva pende apytepe toico pene rembiguai ramo.
12. Ja oime ramo oñembo tuvicháva oyupe, upéva oñemo mîchîne. Ja oime ramo oñemo mîchîva oyupe, upéva oñembo tuvicháne.
13. Angai peêva, peê pene arandúva ja fariseo peêsénteva, pende rová mocoîva! Peê pemboty pe yvaga rokê umi ybypóra rová reje. Peê voínte nda peikei, ja umi ambuecue cuera umi oikesévape yepe peê na pemoinguéséi.
14. Angai peêcuera pene arandúva, ja fariseo peêsénteva, pende rová mocoiva! Peê peúpáva umi cuña tyreŷ gui joga cuera yepe, ja upeyave pembo tabyjápe peñemboe pucu guaujápe peicovo, upévareje peê peyeyopŷ pojŷivéne.
15. Angai peêcuera pene arandúva ja peê fariseo peêsénteva, pende rová mocoîva! Peê pemboyerepáva pe ŷguasu ja co yby peñejaâvo pemoingo pendeyupeichagua ramo peteî ybypóra añópente, ja anga peyapyjŷma ramo ichupe, peê pemo añaretâ raŷvé yoa yoa ichupe pendejegui voi.
16. Angai peêcuera, peê tapécuaajá pende resápysóŷva! Peê peye oime ramo omeêva iñeê pe tûpaô rŷepŷ rérape, mbaevé ndeiseijá, ja oime ramo omeêva iñeê pe óro tûpaô ryepype oiva rérape, upea jeisejá oimejá jae ombuecovia vaerâ.
17. Pende taby ja pende resa ŷ va peê! ¿Mávapa pe tuvichavéva? ¿Pe óropa terâpa pe tûpaô ryepŷ pe óro mongaraíjá?
18. Upeicha avei peê peye oime ramo omeêva iñeê pe mbae caraí rendá rérape mbaevé ndeiseijá, upegui oime ramo omeêva iñeê pe mbae caraí jiari oiva rérape, upea jeisejá oimejá jae ombuecovia vaerâ.
19. Peê pene âcâjâtâite, ja pende resa pysoŷva peê! ¿Mávapa pe tuvichavéva? ¿pe mbae caraí terâpa pe mbae caraí rendá ñane mbae meêmbyré mongaraíjá?
20. Upeicharamo, pe omeêva iñeê pe mbae caraí renda rérape omeê iñeê upea rérape ja opambae jiari oiva rérape avei.
21. Upeicha avei oime ramo omeéva iñeê pe tûpaô ryepŷ rérape omeê iñeê upea rérape ja Upe ipype oicóva rérape avei.
22. Upeicha avei oime ramo omeêva iñeê pe yvaga rérape, omeê iñeê Tûpâ Ñandeyára oguapyjá rérape, ja Upe jiari oguapŷva rérape avei.
23. Angai peêcuera pene arandúva ja fariseo peêsénteva, pende rová mocoîva! Peê pemeêva jecópe tûpâmbae ne mentagui ja ne aneldogui ja ne cominogui, ja upea aya pemboŷké umi Ñandeyára rembiapoucapŷ ipoguasuvéva, pe teco mboyoyájá ja pe poro poriajuverecojá ja pe yeroviajá. Cova tecôtevê raê peyapo pemboŷké ŷ reje yepe umi mbae ambuecue.
24. Peê tapécuaajá pende resapŷsoŷva voí, pemboguáva peteî mbariguímí, ja upeichavo pemôcôva peteî camellope!
25. Angai peêcuera pene arandúva ja fariseo peêsénteva pende rová mocoîva! Peê pemopôtí pôrâ pe mbayrú apé, ja pe ñaembé apé, ja jyepŷpe jenyjêmba jina pe poro mbaeabykŷsejá ja pe iñâcâjâtâsejá gui.
26. Nde fariseo sapysoŷva, emopôtí raê pe mbayru ryepŷ ja pe ñaembé ryepŷ icatu jaguâ ipôtí pe iyapé avei.
27. Angai peê pene arandúva ja peê fariseo peêsénteva, pende rová mocoîva, peê peyoguá panteón oñemo morôtî vaecuepe, ocá guió iyapé yajecha ipôrâitejá, jyepŷpe voí jenyjêmba umi teôngué cangué cué gui, ja opaichagua mbae kyá gui.
28. Upeichaite avei peê. Peê ocá guió peyechaucá umi caraípe jecopegua rejegua ramo vaicha, pende pyapŷpe voí pene renyjê továmocoîgui ja jecoŷ gui.
29. Angai peê pene arandúva ja peê fariseo peêsénteva, pende rová mocoîva peê pemyatyrôva umi ñemoñeêjára ymaguaré oñeñotŷ jague renda ja pemboyeguáva umi imarangatu vaecue panteón,
30. ja peyéva Ore voí ore roime rire umi ore ru ypycue oico ramo guaré, na mo royejea raéi jesecuera oñojê jaguepe jaecuera umi ñemoñeêjára ymaguare ruguŷcué.
31. Upeicharamo, peê voi peyecuaaucá pende yupe voínte peêcuera umi ñemoñeêjára ymaguare yucájaré rejegua cuerajá.
32. Ja anga iya peême pemombá jaguâ pende ru ypycué rembiapo rângue.
33. Peê mbói catu peê mbói rejegua! ¿Mbaéichapa peñeguajêne pe oñembo jecovia vaerâ peême pe añaretâme gui?
34. Upearâ voí ambou pene rendape ñemoñeêjárape, ja imbaecuaajárape, ja iñarandúvape. Oimene ichugui cuérava peé peyuca vaerâ ja oimene pemoî vaerâ yepe curusu reje ja oimene peinûpâ vaerâ pene tûpâope yepe, ja pemoñá vaerâ peteî tetâ gui ambue tetâ meve.
35. Upeicharamo, oñembo jecoviáne peême opa umi imarangatúva jecopeguáva ruguŷcué oñejé vaecue co ybyári pe Abel marangatu ruguŷcué guive pe Zacarías pe Barakías raŷ ruguŷcué peve pe peyucá vaecue pe tûpâo ryepŷ ja pe Altar (mbae carai renda) paûme.
36. Che jae peême catuetei añetejápe opa âmbae oñembojecovia vaerâjá co tetâmegua coangaguape.
37. Nde, Jerusalem, Jerusalem, nde, umi ñemoñeêjára yucajaré, nde reyapíva itápe umi ne rendape oñemboúvape, ¿mbobŷ yebŷpa raé aipota oñembyatŷ nde raŷ cuera Chendive ombyatŷ jaicha pe ryguasú tayra cuera ipepo guŷpe, ja peê nda peipotai.
38. Angama oyejeyá nandí peême pende roga tapéra ramo.
39. Che jae peême catuetei peê nda Che rechaveí jaguâ Cheve co anga guive upe peye jaguâ ára peve: Ta imombeu catu pyrâ pe Ñandeyára rérape oúva.