1. Upe jaárape Jesús osê oga gui ja oguapy jina pe ŷguasu rembeype,
2. ja upeyave ou iyatŷ iyerecuévo jeta umi ybypora. Upeareje Jae oyupi mbayrúpe, ja oguapy pypé, ja oime oñemboŷ pe ŷrembey reje umi iyatŷva jicuai.
3. Upei catu jeta oñeê Jae ichupecuera mbaerâângá ñeê rupi ja jei: Peina oime guaú mbae ñemitŷjára osê vaecue oñemitŷvo,
4. ja oñemitŷ aya, joa pe mbae raŷî pe tape yképe, ja ou guaú umi guyráí ja voí joupá ichupecuera.
5. Ja oime guaú joa jemitŷ itá raŷîme iyŷby pocâjápe, ja voíeté jeñoî jetaŷjápe yby.
6. Ja osêvove pe cuarajŷ ocáipá ja ipirú voí, nda japói jague reje.
7. Oime avei guaú jaŷî joa rei vaecue ñûatî-ndŷpe ja ocacuaa voívé umi ñûatî ja ombopytúpá.
8. Oime jaŷî avei joa guaú vaecue yby pôrâ jápe, ja jiá pôrâ, oime jiŷva cien, ja ambue jiŷva sesenta, ja ambue jiŷva treinta.
9. Oimeraêva iyapysáva toyapysacante!
10. Upemaramo ou Jendápe jemimboe cuera ja jei: ¿Maerâpa reñeê ichupecuera guaujápe co mbaeraânga ñeême?
11. Ja Jae jei: Peêmente oñemeê peicuaa jaguâ umi ñeê ñemingué pe yvapegua reco rejeguáva. Umi ambuecuecuerape noñemeêi.
12. Oimeraêva oguerecóvape, oñemeêvéne jembŷ reí peve, ja oimeraêva oguerecoŷva pe oguerecomimíva yepe oñemboíne ichugui.
13. Upearâ voi añeê ichupecuera guaujápe co mbaeraânga ñeême. Upeicha voi vaerâ: omaê ramo yepe umiva, ndojechai, ja oyapysaca ramo yepe nojendui ja ndoicuaai.
14. Upeicha voí oyeju ichupecuera jei jagueicha pe ñemoñeêjára Isaias:Pende apysápe pejendúne ja upea rejeve yepe nda peicuaaichene; pende resape pemaêne ja upea rejeve yepe nda pejechacuaaichene.
15. Umi tecové co tetâmegua oñemoatêî ipyapŷ iñanambusúcue gui, ja iyapysápe ojendu asŷ jopejŷijápe, ja oñembojesabŷ anichene jaguâ máramo ojecha jesápe terâ ojendu iyapysápe terâ oicuaa ipyaitépe, anichene jaguâ oñemboyeré Che cotŷvo amojesâi jaguâ ichupecuera.
16. Ipoaite pende resá ojechá jáva reje ja pende apysá ojendu jáva reje.
17. Che jae peême catuetei jeta jaguâ umi ñemoñeêjára ymaguare ja imarangatúva ojechásé vaecue co peê pejecháva, ja ndojechai racaé, ja ojendúsé vaecue co peê pejendúva ja nojendúi racaé.
18. Peyapysacánte, upeicharamo, co jeiséva pe Che jae guaú vaecue pe mbae ñemityjaré reje.
19. Oime ramo ojendúvaecue Ñandeyára ñeê yvapegua reco rejegua oicuaa pôrâ ŷ reje jecópe, ou voi pe mbaepochŷ ja ôguenojê reí pe oñeñotŷ vaecue ipyápe. Peva catu pe jaŷî oñemuasaî reí vaecue pe tapé yképeguareicha.
20. Ja pe oñemuasaî reí vaecue itátŷpe, péva catu pe ojendú vaecue pe Ñandeyára ñeé, ja ogueroviá voí vaecue torypápe.
21. Upéva ndojapói catu iyejegui voínte, ja ndoicoaréi, sapyamíguánte upéva, ja sapya, ojasa asy ramo, terâ oyeyopŷ ramo Ñandeyára ñeê rejejápe voí, oñembo pyávaí, ja opoí.
22. Ja pe oñemuasaî reí vaecue ñûatîndŷpe, péva catu pe ojendú vaecue Ñandeyára ñeê ja oyepyapŷ eterei pypé mbae co yby arigua reje, ja oñembo taby pypé imbaererecopŷ gui, pe Ñandeyára ñeê oñembo pytúpá ichuguicuera, ja jaecuera opytá reí jiá ŷ rejeguaicha.
23. Ja pe oñeñotŷ vaecue yby pôrâjápe, upéva catu pe ojendú vaecue Ñandeyára ñeê ja ojechacuaa pôrâ vaecue jiá pôrâitéva ja oiméne jiŷva cien, ja ambue jiŷva sesenta ja ambue treinta.
24. Upemaramo oñeê yeby guaujápe mbaeraânga ñeê ambuépe jeivo: Co teco yvapegua rejegua oyogua cuimbaepe oñotŷ vaecue guaú mbae raŷî ipôrâva iñûme:
25. ja oké aya jicuai, ou guaú pe iyaeŷva jesé, ja oñotŷ yoa caavó vaí raŷî pe temityngue apytépe ja oyeí voí.
26. Ja jokŷma ramo ja jiátama ramo, uperamo guaú oyecuaa avei pe caavó vaí.
27. Ja pe oga yára rembiguai cuera ou Jendápe ja jei ichupe: ¿Caraí, nereñotŷipa raé mbae raŷî ipôrâva ne ñûme? ¿Mamóguípa, upeicharamo, osê co caavó vai?
28. Ja jei guaú ichupecuera: Oiméne raé peteî iyaeŷva chereje oyapo vaecue upea. Ja jaecuera jei guaú ichupe: ¿Reipotápa, upeicharamo, rojo jaguâ rojapoóvo umia?
29. Ja jae jei guaú ichupecuera: Ajaniri! Icatu, upeicharamo, pemonoôvo pe caavó vaí pejapoóne avei jendive pe che remityácué ipôrâva.
30. Pejeyánte, tocacuaa oñondive pe ñamonoô jaguâ ára peve, ja uperamo pe ñamonoô jaguâ árape amombeúne umi imonoôjarâpe: Pemonoô raê co caavó vaí, ja peñapytî atŷra rupi oyejapŷ jaguâ. Pe temityácué pôrâ pembyatypá cheve pe iñongatú jaguâ me.
31. Uperire omboe yeby ichupecuera guaujápe jeivo: Co teco marangatú yvapegua rejegua oyogua pe mostaza raŷîme oipyjŷ vaecue cuimbae oñotŷvo pe icocuepe.
32. Upéva voí mîchîvéva opa ambue mbae raŷîva gui, upeicharamo yepe ocacuaa rire oñembo tuvichavé umi ambue cue ybyráígui, ja oñembo ybyrá râcâ, ja ou umi guyra ovevéva ja oñembo jaitŷ jâcâ reje.
33. Upei catu jei yeby ichupecuera guaujápe mbaeraângá ñeême jeivo: Co teco marangatu yvapegua rejegua oyogua pe mbuyapé mbobujarâme oipyjŷva cuña ja oyajoíva mbojapy kilo mbae icuípyré pypé, ja ojeya reí iyavevopá peve.
34. Opa umimbae oñeê Jesús guaujápe mbaeraânga ñeê rupi umi ybypóra oñembyaty jicuáivape, ja co mbaeraânga ñeê ŷ reje noñeêi mbaevé ichupecuera.
35. Upeicha oico jecópe pe oyeé vaecue pe ñemoñeêjaré yurú rupi:Aipeane Che yuru añeêvo guaujápe, ja oñejêmba reine Che yuru gui ñeê ñemi iyajoípyré co yby ñemoñá ypy jague mboyvé voí.
36. Upegui omondo Jesús umi ambuecuecuerape ja ou ogape ja ôguajê Jendápe jemimboecuera jeivo: Ore mboemi oreve mbaépa jeise co ñeê guaújá pe caavó vaí ñûme guaguiguare?
37. Ja Jae jei ichupecuera: Pe oñotŷva guaú pe mbae raŷî ipôrâva, upéva catu co Caraí Raŷ. Pe ñû oñotŷjápe co yby catu.
38. Umi mbae raŷî ipôrâva guaú, umiva catu pe yvapegua ruvicha guasu rejegua cuera, ja umi caavó vaí guaú, umia catu pe mbaepochy rejegua cuera,
39. ja pe iyaeŷva ñandereje oñotŷva guaú umia, upéva catu pe mbaepochŷ voí, ja pe oñemonoô jaguâ ára guaú oicone pe oñemombá jaguâ árape co yby, ja umi omonoôjarâ, umíva catu umi yvapegua.
40. Upeicharamo, pe caavó vaí oñembyatŷ yoá yoá jaicha oyejapŷ jaguâ tatape, upeicha avei oico vaerâ pe co yby oñemombá jaguâ árape.
41. Pe Caraí Raŷ omboune jemimbou cuera yvapeguape, ja umiva omonoômbáne umi jesegua apytegui umi oporombotieŷvape ja umi oñembojecovaíjárape,
42. ja oityne ichupecuera pe tatacuá ratápe: upepe catu oicone pe tasê guasú ja taiñeê ete.
43. Uperamo ojesapé veráne umi imarangatúeté jecopeguáva pe cuarajyicha pe Túva Juvichá guasu yvapegua rendape. Oimeraêva iyapysáva toyapysacante!
44. Upeicha avei co teco marangatu yvapegua rejegua oyogúa petei tacateŷjá iñongatupyrâ oñeñotŷ vaecue ñûme, ja sapya peteî carai oyuju reí ja oyajoí yeby, ja jorŷ gui ojo ja oñemû opa oguerecóva reje oyogua jaguâ pe ñû.
45. Upeicha avei pe teco marangatu yvapegua rejegua oyoguá pe oñemûjárape ojecáva oicovo umi itá verá jacateŷjarâ,
46. ja sapya oyujuma ramo peteî itá verá jepŷetéva, ojo ja oñemû opa oguerecóva reje oyoguá jaguâ ichupe.
47. Upeicha avei pe teco marangatu yvapegua rejegua oyogua pe pyjápe ñamoinguéva ŷguasupe, ja ñamonoôjá opaichagua pirá,
48. ja jenyjêmbama ramo pe pyjá ñanojê pe ŷrembeype ja yaguapŷvo ñamonoô umi ipôrâva imbayrurâme ja umi ivaíva ñamombo.
49. Upeicha avei oicone co yby oñemombá jaguâ árape. Osêne umi yvapegua ja oipeáne umi ivaívape umí imarangatúva apytegui,
50. ja oitŷne ichupecuera pe tatacuá ratápe. Upepe oicone tasê guasú ja taiñeê ete.
51. ¿Peicuaa pôrâpa peê mbaépa jeisé opa âmbae? Ja jaecuera jei Ichupe: Jeê! Roicuaa.
52. Ja Jae jei ichupecuera: Upeareje opa iñarandúva imboepyré co teco marangatu yvapegua rejegua reje, upéva oyoguá caraí oga yárape ôguenojêva iñongatupŷ ryrú gui mbae ipyajúva ja mbae ituyáva.
53. Uperire jeipa maramo Jesús umi ñeê guaujápe ojo upegui.
54. Ja ou rire oguetâme omboé oicovo itûpâope cuera ja ojecharâmô jaecuera ja jei. ¿Mamóguípa iya co caraípe iñarandú jaguâ ja ipuacáité jaguâ cóicha?
55. ¿Ndajaeipa co tecové pe ybyra rombaapojára ray? ¿Nda jérai pico isŷpe María? ja tybyra cuera Jacóbo, ja José ja Simon ja Judás?
56. ¿Ja noimbái pico ñanendive jeindŷra cuera avei? ¿Mamóguipa, upeicharamo, iya ichupe opa âmbae?
57. Ja oñembo pyávaí jaecuera Ichupe. Jesús voí jeinte ichupecuera: Ndipóri ñemoñeêjára oyeyeroviá ŷ já, oguetâme voínte, ja oguógateépe, upépente ndo yeyeroviávái.
58. Upévareje Jae nda jetai mbaeguasu jechapyrâ oyapo upepe ndo yeroviai jague reje jicuai Jese.